【愛情】如地下情一樣嘅癮，係我對你嘅定義: 47. 謝禮

睇緊書嘅鍾安而偷偷抬眼觀察黎昕淇嘅表情，感覺自己喺呢個空間唔太合適，斯文咁將櫈向後推，轉身將手上嘅小說放到後面嘅書櫃上

「我番課室啦。」鍾安而禮貌咁同兩人講一聲，然後就行去開門

「你咁快番去？」黎昕淇訝異咁抬頭望向鍾安而，「今日咁早番課室嘅？」

「嗯，今日早啲番去。」鍾安而微微點頭，扭動門柄開門出去

一行出會室，身後就傳嚟一把清甜且帶住訝異嘅聲線：「副會長？」





鍾安而轉身向聲音所在嘅方向望去，一轉身見副鄭洛苡朝佢行過嚟

「嗨。」鍾安而搭喺門柄上嘅手都愣咗一下，下一秒微微一笑

「你番課室呀？」鄭洛苡有啲明知故問嘅意味

「嗯，係呀。」鍾安而行喺鄭洛苡身旁嘅位置，但兩人之間都係保持住距離

鄭洛苡嘅目光落喺鍾安而身上，鍾安而渾身都散發住溫文爾雅嘅氣息，戴住銀色幼框眼鏡嘅佢睇起嚟更文質彬彬





「偷笑啲咩？」鍾安而嘅餘光見到鄭洛苡喺低頭嘅時候偷笑

「冇呀，冇咩～」鄭洛苡搖搖頭，一舉手一投足都散發住溫柔嘅感覺

鄭洛苡清甜嘅聲線配上溫柔嘅微笑，鍾安而不禁望出神，但好快佢就意識到自己嘅行為有啲唔恰當，默默咁收回視線

喺會室內嘅陸修然同黎昕淇默契咁選擇沉默，黎昕淇默不作聲，偶然同陸修然對望一眼，但又好快將視線移開

「諗住點樣答謝我幫你逃走？」黎昕淇先打破沉默，喺提起腳翹腳嘅時候，黎昕淇發現鞋帶鬆開咗，「嘖，又甩，今日甩咗第幾次啦⋯！？」





黎昕淇將翹咗過去左邊嘅腳又踩回平地，今日嘅鞋帶一直鬆開，眼見宜家鞋帶又鬆開咗，心入面嘅煩躁都已經按捺不住

喺黎昕淇彎低腰，伸手要拎起鞋帶重綁之際，陸修然連人帶櫈退後，然後彎腰拎起鞋帶，幫黎昕淇將鬆開嘅鞋帶綁番好

黎昕淇彎到一半嘅腰又慢慢挺直，望住陸修然幫自己綁鞋帶，心入面嘅奇怪感覺又冒出嚟

「小辣椒，下次鞋帶打雙結，鞋帶甩你發脾氣有咩用？」陸修然將本來綁好嘅鞋帶再繞一個圈拉實，無奈咁對黎昕淇講道

「我冇發脾氣。」黎昕淇望住綁好嘅鞋帶道，「你快啲去洗手，摸過鞋污糟⋯」

「嗯。」陸修然起身行出會室

會室內得番黎昕淇一個人，黎昕淇靠住轉轉櫈嘅櫈背左轉右轉，思緒有啲混亂

「咔—」陸修然洗完手番到會室，會室內空無一人，黎昕淇番咗課室





陸修然行到啱啱坐嘅位置，枱上放咗一粒朱古力，陸修然拎起朱古力，一望就知道係黎昕淇放低比佢，呢個牌子嘅朱古力係黎昕淇嘅最愛

「係琴晚嘅謝禮定係點樣⋯？」陸修然望住手中嘅朱古力自言自語道，「算啦⋯」

陸修然將朱古力放入褲袋，行到門邊閂燈之後行出會室

⋯

「大家執嘢走啦。」阿sir企喺老師枱前將收番嚟嘅統測卷疊好，坐喺位嘅同學都已經精神出走，個個都面露疲倦咁執嘢準備走

「會長，你有冇溫書？」莫淮禮問陸修然，「我死硬啦⋯最後嗰頁完全搞唔掂⋯」

「我有溫呀⋯」陸修然都已經好攰，今日要特登留低補課測驗已經耗盡佢嘅精神力，「我番屋企要瞓覺⋯」





「我都好攰，個腦完全唔想諗嘢⋯」莫淮禮拍一拍自己嘅額頭，想將所有喺腦海中嘅殘餘物拍走，令大腦空白起嚟

「行啦。」陸修然拎起書包孭到背上，同莫淮禮一齊去搭車番屋企

陸修然將放咗喺褲袋嘅朱古力拎出嚟，拆開包裝紙放入口；企喺隔離嘅莫淮禮望住陸修然食朱古力，露出明顯嘅愕然表情

「你有朱古力嘅？你食㗎咩？」莫淮禮笑問道，「平時啲師妹請你食，你都話唔食朱古力㗎。」

「喺屋企拎出嚟，唔想又拎番屋企。」陸修然隨便講咗一個冇咩特別嘅原因解釋

「黎昕屋企隻貓好可愛。」莫淮禮拎住手機，IG嘅story啱啱好跳到黎昕淇喺半個鐘前po嘅story

「幾啦。」陸修然呢句係真心話，不過比起黎昕淇po出嚟嘅芝麻，陸修然更中意黑貓牛奶

陸修然瞄到喺右上角嘅綠底白色星星嘅小方框，原來莫淮禮喺黎昕淇嘅close friend list入面





「原來你都喺佢嘅close friend list？」陸修然自然咁提道

「哦，之前同佢同班嗰陣都熟，所以有佢嘅close friend。」莫淮禮冇諗太多就解釋忽陸修然聽，「你唔係都喺佢嘅close friend list入面咩？」

「喺呀。」陸修然頷首，若有所思咁撇一眼莫淮禮睇緊嘅story

「你有冇諗過如果你地呢屆學生會卸任之後點算？」莫淮禮忽然問出一個陸修然冇諗過嘅問題目

「冇呀，同以前一樣係個普通嘅學生。」陸修然冇諗太多以後嘅事，反正應該都唔會差好還

「你卸任之後，就冇咁多師妹圍住你啦。」莫淮禮講笑道，「冇咁多師妹仰慕你，冇人仰慕咁望住你啦。」

「唔好意思，我唔太在意呢件事⋯」陸修然無言一笑，「做個普通人都幾好。」





陸修然一向都唔太在意自己受唔受人仰慕、有幾多女仔仰慕佢、有冇人暗戀佢之類嘅問題，佢一直都唔太在意；在意自己所在意嘅就足夠，其他嘅事冇必要在意太多

陸修然行到大堂門口，伸手拉開大堂嘅玻璃門，轉彎行到等𨋢大堂

陸修然同平時一樣貼住牆企，喺𨋢向上升緊嘅時候，陸修然合埋眼、仰起頭靠住牆，爭取時間閉目養神

「叮—」𨋢門打開，陸修然行出𨋢

「叫我出嚟門口等你但自己又未到。」黎昕淇拎住手機企喺屋企門口對陸修然道

呢一層唔係陸修然住嘅嗰層，而係黎昕淇住嘅嗰一層




IG Link: https://www.instagram.com/nd_cotttoncandy/?hl=zh-tw