【愛情】如地下情一樣嘅癮，係我對你嘅定義: 64. 家人
宋楚妍去完廁所打開廁格嘅門，行到最近嘅洗手盆前洗手
「你同你個friend和好咗未？」宋楚妍好奇問道
「和好咗啦。」黎昕淇微微點頭
「和好咗就好啦～你用咗咩方法氹番佢？」宋楚妍笑問道
「冇特別氹佢，就係⋯大家都好好講清楚，咁樣。」黎昕淇解釋道，佢差啲都唔記得咗自己同宋楚妍提起過呢件事
「好呀～生把口就係要好好解釋嘛～收喺心入面嘅話好容易有誤會。」宋楚妍甩一甩手上嘅水
「都係嘅⋯」黎昕淇行喺前面開門
有時將說話講清楚的確會少好多誤會，不過黎昕淇同陸修然都係啲要面子而且說話直白嘅人，鬧起交上嚟真係互不相讓
「你今日放學唔洗開會？最近好似都好少見你地開會。」宋楚妍問
「最近冇咩新活動，所以冇咩會要開。」黎昕淇微微聳肩，「可以早番屋企實在太好。」
「我地又可以一齊搭車啦～」宋楚妍高興咁笑道
放學嘅時候，黎昕淇同宋楚妍一齊搭車，行喺路上嘅時候撞到江清懿同蘇序然
佢地之間都算熟絡，所以都唔會太尷尬，黎昕淇同江清懿又會一齊番工，所以更加唔會尷尬太多
「聽日有小測，完全冇溫書，唔知點搞。」蘇序然睇手機嘅時候突然提起然後搖頭，「我打算靠運氣。」
「兄弟咁啱呀？我都冇溫。」江清懿側身用膊頭撞一下蘇序然嘅膊頭道，「一齊一齊。」
「你兩個番去溫書啦好唔好？唔溫書仲理直氣壯咁講出嚟會唔會太厚面皮？」宋楚妍反咗個白眼，指住兩人講道
「番去買個老麥先再溫書啦～食飽先有精神。」江清懿打咗個喊露
「但你睇起嚟係食完老麥要瞓晏覺，最後冇溫書嘅人。」宋楚妍無奈到搖頭，佢都已經可以估到江清懿嘅行動走向
「你一番到屋企，個老麥就會比你個妹騎劫咗。」蘇序然順手撥冷水笑道，「你個妹真係好中意食嘢。」
「樂時幾可愛呀，又活潑。」黎昕淇笑道
「佢唔係你、你同埋你個妹，你地梗係笑得出。」江清懿將佢地三人逐個指一次，佢地笑得開心，但江清懿只係敷衍咁笑一笑，「喺屋企食嘢唔可以比佢發現，佢一定會過嚟同你講兩句然後就開始搶嘢食。」
「呢個係哥哥嘅福利嚟～」宋楚妍仲要笑住講風涼話，「你要學識同妹妹分享嘛～」
「陣間就買老麥，喺鍾樂時番嚟之前要食晒。」江清懿下定決心一樣用肯定嘅語氣講道，「然後休息一陣。」
聽到佢地講起食老麥，黎昕淇就諗起琴晚，陸修然喺佢爸爸行入廚房嘅時候即刻濕張紙巾抹嘴，因為唇上染到黎昕淇嘅唇膏顏色
諗到呢度，黎昕淇默默吞口水滋潤一下忽然間有種乾涸感嘅喉嚨，佢拎起手機長㩒住螢幕直至彈咗幾個wallpaper選項出嚟，黎昕淇默默咁㩒咗鎖屏
⋯
江清懿坐喺餐枱前邊睇手機邊食佢嘅下午茶，鍾樂時喺房行出嚟就見到江清懿食緊嘢
「自私食！」鍾樂時行到江清懿嘅隔離，睇起嚟好似係江清懿犯咗罪一樣，「好過份—」
「安靜！」江清懿喺紙盒中拎起一件麥樂雞直接放入去鍾樂時嘅口中，將鍾樂時要講嘅嘢推番入去，「你可以原路折返番房啦～」
「好啦～」鍾樂時將麥樂雞咬一半，伸手拎條薯條放入口，「我番房啦～」
江清懿望住鍾樂時得逞咁轉身番房，心入面默默嘆氣：「有妹妹真係好煩，唔啱我⋯鍾安而點樣頂得順佢個妹啲任性性格？」
「江清懿！」鍾樂時忽然間轉身，拎住手機大步行到江清懿身旁
「又點呢⋯？」江清懿托住頭望向鍾樂時
「你覺得呢件邊件好睇啲？呢件定呢件？」鍾樂時拎住手機，比咗兩條連身裙江清懿睇，「鍾安而話前面呢件純色好睇啲，你話呢？」
「唔⋯」江清懿望住兩張圖，諗咗一陣之後指住第二張圖入面嘅格仔裙，「我覺得呢件靚啲。」
「我都覺⋯」鍾樂時微微點頭，然後拎住手機行番房嘅同時將格仔裙加入購物車
江清懿坐喺餐枱前繼續食佢嘅麥樂雞，佢望住鍾樂時好似已經即刻訂咗嗰條裙
夜晚食飯嘅時候，鍾安而同江清懿喺各嘅睡房行出嚟，鍾安而先一步行到圓形嘅玻璃枱前拉開櫈坐低
「細妹呢？」鍾爸爸拎住一碟蒸魚喺廚房行出嚟放喺枱上，「係咪未瞓醒？」
「可能啦，清懿，去敲門啦。」江阿姨抬一抬下巴示意江清懿去開門，因為只有江清懿一人未行到餐枱前面坐低
江清懿原路折返行去走廊，行到離主卧最近嘅睡房門前敲門
「叩叩，鍾樂時，食飯啦！」江清懿喺門上敲咗兩下同時嗌道，喺等咗兩秒冇回應後又敲門：「叩叩，鍾樂時！我開門㗎啦！」
江清懿扭動門柄開門，一秒都冇猶疑就直接開燈，鍾樂時比突如其來嘅燈一照即刻一臉痛苦咁皺起眉頭，側身瞓嘅佢踢開咗被，上身衫微微向上拉起，露出咗小腹
江清懿立刻撇開臉移開視線、向後退到房門口將房門虛掩住：「醒啦，食飯啦！」
「嗯⋯」鍾樂時拉番好件衫就坐先身，用手隨意咁梳一梳頭髮就打開房門
江清懿行喺前面，鍾樂時跟喺佢身後，喺江清懿要拉開鍾安而隔離嘅櫈坐低嘅時候，鍾樂時拍一拍江清懿
「我要同哥哥坐。」鍾樂時講道，然後江清懿就拉開隔離嘅櫈坐低，將佢同鍾安而之間嘅座位留比鍾樂時
「唔舒服？」或者係兄妹間獨有嘅心靈感應，鍾安而嘅直覺覺得鍾樂時同平時有啲唔一樣
「有啲頭痛。」鍾樂時低聲講道，「瞓咗陣好啲。」
「食飯啦食飯啦～」江阿姨講道
江清懿伸手去夾雞翼，鍾樂時嘅筷子亦落喺雞翼上面，兩人嘅筷子落喺同一隻雞翼上，兩人互不相讓，對望嘅時候用眼神示意對方縮手
IG Link: https://www.instagram.com/nd_cotttoncandy/?hl=zh-tw