鏡像密語: 第十二章、未踏前,先退後
自從某一日開始,洛妍有段時間心事重重,因為佢搞唔清楚自己對呢個知音有咩既情感,又或者係佢開始想問到底呢個知音仲算唔算係知音?
(做咩成日都咁在意人地有冇上線,在意電話有冇收到人地既message?)
(我點知姐?啱傾姐⋯⋯)
(咪繼續自己呃自己囉)
(邊有呃姐,咁真係唔係又點認喎⋯⋯喂我同唯楓正式分手唔係好耐姐,我邊有會咁快中意其他人?)
(定係你有冇諗過你一早已經唔愛唯楓?)
(⋯⋯)
(但我個日明明飲酒為左佢喊嫁喎)
(過左去啦⋯⋯)
(你呃到人都呃唔到自己我話你聽!)
(我又真係聽唔落去啦)
就係咁洛妍個心一日比一日亂,但就算係咁佢依然係忍唔到想接近亦言。
直至有一日,洛妍係公司既茶水間角落坐暱埋準備食早餐,咁啱洛妍比檯上既隔板遮住左,所以驟眼睇個茶水間冇人。
呢個時候煇爺佢地入左茶水間斟水,咁啱比洛妍偷聽到一段對話:
「喂,你同佢最近行到好埋咁喎,單拖食lunch 、一齊返工,咁你地幾時一齊?」
「我都唔知你講咩?邊個佢?」
「咪繼續扮唔知言嫂係邊個囉!」
「⋯⋯」
(聽到呢到洛妍屏住呼吸,只係覺得個心好似跳左出黎咁)
「你知唔知佢依家咩狀態?有冇拍拖?」kai主動問亦言。
「喂,聽講佢一入職有男朋友嫁喎,咁依家⋯⋯?」連洋洋忍唔住插嘴。
「佢依家應該⋯⋯冇拍拖,應該係單身掛」亦言半沉思緊。
(洛妍都唔知佢個刻諗咩)
「喂,咁你仲係到做咩丫?仲唔去馬?」煇爺差啲扯火鬧亦言。
(洛妍差啲忍唔住笑左出聲:哈哈,煇爺好波到)
「⋯⋯唔知你講咩丫,返出去做嘢啦⋯⋯師兄!」
如是者,當佢地離開左茶水間之後,洛妍輕輕伸個頭出個隔板再確認多次佢地係咪真係離開左。
「呼⋯⋯好彩佢地唔知我係到」洛妍又嘆氣。
(我有冇聽錯佢地好似稱呼我做言嫂?)
(啊,呢個稱呼都幾⋯⋯幾⋯⋯親切喎,咪咁激動住先啦!)
(想做咪認囉,收收埋埋做咩)
(你係咪傻?人地有女朋友嫁啦,煇爺佢地講下笑你就當真?)
(如果係真既話就⋯⋯)
(喂,你同我停!)
(咁比人講下笑,可唔可以靜係係公司先做言嫂)
(唔好意思,唔可以!因為現實你唔係、你都唔可以)
(咁到底佢係點諗)
(人地咪答左你囉,人地咪話左唔知佢地講咩丫嘛)
(人地個心得女朋友,唔好一廂情願啦梁洛妍)
(係咁既話佢點解成日夜晚都會打電話比我?點解會成日對住我笑?對我又咁好奇?一時會問我做緊咩,一時見我耐冇覆問我去左邊。)
(人地可能同女朋友嘈完搵你攝時間咋傻妹⋯⋯由頭到尾都係得你一個認真!)
(所以你咪輸了囉)
(冇錯!佢一定係挽緊我)
就係咁洛妍一整日都心事重重、悶悶不樂咁款做野,可能因為心煩緊到底亦言對自己係點,自己對亦言係點。
(咩點姐,咪人地有女朋友囉,要我提幾多次?)
(我知丫)
(知仲諗?知仲望?今日好醒啦)
直到下晝,洛妍一直心不在焉咁行返去茶水間坐低打算透下氣個時,咁啱撞到煇爺,洛妍自然而然咁坐低都係煇爺隔離傾計。
「妍姐,你好似好唔開心喎今日?」煇爺一路路扭開樽蓋一路問。
「我?冇野喎⋯⋯」
「唔似冇野,你平時返工笑口常開,今日冇見過你笑既。」
「有啲心煩姐⋯⋯所以唔開心掛?」
「咁吖言知唔知你唔開心丫?」
洛妍屏住左呼吸三秒,因為聽到一個人名所以佢條件反射左,不自覺勾起左兩邊嘴角,半秒之內洛妍發覺唔對路,改為轉移話題策略。
(希望煇爺睇唔到我既唔自然啦⋯⋯)
「做⋯⋯做咩成日係我面前都會提住徐亦言喎,我地都冇野!」
「嘩!喂洛妍丫,呢到唔係盲人輔導會丫!你係咪當我地盲嫁?你地兩個既幸福樣呢就連飯堂丫姑都知嫁啦!」
「咩喎⋯⋯都唔知你講咩。」洛妍心虛max。
「喂其實呢,我識左佢咁耐啦,我未見過佢對一個女同事係咁嫁。」
「咁係點丫?」
(我想知我有幾與別不同)
「未見過佢會咁樣成日摵一個女同事既面珠,成日返返下工對住個電話傻笑,搞到我地成班男同事都好想知佢同邊個whatsapp得咁開心。仲有丫,佢以前好少笑嫁,但自從識左你之後我哋都覺得佢開朗左唔少,一見到你就笑左先,呢啲你感覺唔到咩?」
「邊係你講既咁姐?人地都唔係中意我!」
「嘩!咁都唔叫中意丫?你知唔知前兩日佢走黎同我講,話見到我同你單獨食lunch覺得好介意好唔開心⋯⋯」
「下?佢⋯⋯親口講既?」
(言下之意姐係徐亦言呷醋啦)
「係!」
「呢個唔會係佢黎既,佢平時有咩都會收收埋埋⋯⋯攤得出黎講一定係好大件事!」洛妍偵探拎起左個隱形放大鏡。
「你都知呢?」
「不過⋯⋯」
「如果⋯⋯姐係我話如果姐,吖言有日肯同佢女朋友分手,咁對你黎講算唔算為左你邁出左一大步?」
洛妍同煇爺下一秒對望笑左。
(我點解會反應唔到嫁?)
「但人地真係冇話中意我嫁!」洛妍回過神來。
(做咩急住否認喎,明明聽到呢到好開心)
(但洛妍你只可以開心一秒,就一秒咁多,聽到未,你知自己唔配、唔應該覺得開心)
諗到呢到洛妍個笑容僵硬左,冇諗過下一句直接令洛妍崩潰。
「其實有女朋友又點喎?係咪先洛妍?」
(靈魂拷問⋯⋯我招架不了)
(我分唔出煇爺係講笑定認真)
但呢一刻洛妍個心沉左,好似跌左落一個無底洞,升都升唔返上黎。
(我都唔知覆咩好)
(佢係咪睇穿左我既心事就係呢樣所以先咁講?)
(我應該點做佢先會唔知我既心意)
洛妍忍住心痛,強顏歡笑咁講:「咪挽啦,我唔係呢種會搶人男朋友既人!」
講完洛妍借意離開,返返埋位工作。
(梁洛妍,你醒下啦!)
叮———
「好忙丫?」
洛妍已讀不想回,最後隔左大半日先回。
「嗯嗯。」
(喂,仲覆黎做咩?)
但之後洛妍都冇再點覆亦言既message,因為出自良心對自己既責備⋯⋯佢知道自己唔應該再咁傾落去。
可惜亦言傻傻不知情,唔知洛妍個心已經為佢煩左幾多次,洛妍索性唔覆,想扮唔知。
好唔容易捱到收工,煇爺同亦言咁啱同洛妍同時放工,為左唔比亦言發覺自己既心事,洛妍扮冇事咁同佢地作伴離開公司。
行行下洛妍發覺亦言突然愈行愈快。
「我⋯⋯有野做!」
「誒?哦,有咩做?」洛妍好輕聲咁問。
「⋯⋯約左人」亦言支支吾吾。
「哦」洛妍不以為然,對腳上跟上亦言既時候突然個有身影閃過。
洛妍見到既係一個身高大約一米五七既女仔,帶住一副金絲圓形眼鏡,水汪汪既杏眼眼皮上面係橙粉色眼影,穿着一身黑色連身牛仔褲,比人感覺精靈可愛。
「我唔係叫你去商場等我嫁咩?」亦言眼中好似只有佢。
「唔係約左6點半咩⋯⋯」個個女仔指住自己既手機。
洛妍彷彿已經知眼前呢個女仔既身份,到佢回過頭來既時候,洛妍見到佢地兩個向自己揮手道別遠去。
(死火,電燈膽都冇我咁光冇我咁着丫仆街)
(嗯⋯⋯其實佢可以同我講聲先嫁姐,依家兜口兜面撞到,好尷尬⋯⋯)
(但人地見邊個又真係唔洗同我講聲先既)
(係你對人地男朋友有啲感覺先覺得尷尬咋,你睇人地都冇野)
(頭先同佢對望左一眼,佢果然幾可愛,似亦言中意個種女仔,我諗我一世都做唔到佢呢種)
(喂,正宮都比你見埋,你仲諗?放唔放手丫?)
(呼⋯⋯好彩⋯⋯)
(好彩我依家喊唔出,如果喊得出姐係中意亦言啦,咁依家喊唔出喎,姐係唔中意啦⋯⋯)
(咁抽身都好易姐⋯⋯係唔係?)
洛妍放左隻係自己心口,好神奇,佢感覺到個心臟係跳動緊,但唔知點解覺得個心好翳,翳到心跳都變得微弱。
(嘶———)
(聽唔聽到有啲聲?)
(係咪心碎聲?)
唔知有冇人知心碎既感覺係點,洛妍覺得呢一刻同自己想像中既心碎好大出入,佢曾經以為心碎係好似一個玻璃杯從檯面被推倒繼而摔破落地,落地一刻先是伴隨一聲巨響,其後只得七零八落既碎片散落一地,拼都拼唔返⋯⋯
但係,呢一刻佢覺得全世界都好似靜止左,唯一聽到既係個心有一下好微弱既崩裂聲,突然個心好似出現左一條裂縫,裂縫跟隨住外圍無聲無息咁擴大,但依然係裂得安靜,直至裂縫愈裂愈深,佢先開始覺得有啲痛感。不過洛妍見到佢個心冇散成碎片,個心反而外型完好無缺⋯⋯因為佢知道散成碎片既心係無辦法令自己堅持生活、無辦法堅持到聽日返工、無辦法返工對住佢。
(暗戀最痛莫過於此)
(知痛未洛妍?痛就放手、痛就走啦)
(我知痛啦⋯⋯比我走啦⋯⋯)
(續)