OT臨收工先發現走唔出個office 仲要比野追殺點部署: #β423-0004【代號：實驗室】

我望住一望無際既開闊空間，我有啲恍然，又有啲激動。。

  開放式空間？咁咪即係-----我走左出黎？我逃脫左？離開左個迷宮？

  唔通好似電影咁，我已經被傳送左去另一個地方？另一片大陸？我已經唔喺原本個石屎森林？

  咁無問題啊！只要有手機啊！你比我傳送到瓦努亞圖啊，我都有辦法翻到去啦！或者？可能？總之會好過原本既狀況先啦！

  話唔定可以順便度個假添啊！





  我拎起手機睇，三格訊號！Nice！

  「咁就事不宜遲啦！」我立即起行，隨便搵左一個方向開始跑，一直線咁跑過去。地球係圓架嘛！

  我一路跑、一路跑，另轉頭，見到石柱離我身後愈來愈遠，心入面既雀躍感直線上升。嗰啲人點講啊：內心的小鳥都要跳出來了！

  唉屌，算啦文學呢啲野都係唔啱我。諗返都起雞皮。

  我一路諗啲無謂嘢，一路跑、一路跑，啲柱已經唔見曬，剩啲一片荒土，周圍咩都無，有個天，有笪地，除此之外真係字面意義上既咩都無，連個太陽喺邊都搵唔到，但係就陽光普照、烈日當空咁，都唔知啲光點黎。





  跑下跑下，我身上既雀躍感漸漸被疲憊感吞噬，被惶恐取而代之。其實我諗我應該無跑好耐，但係今晚一路落黎真係經歷太多野，我諗一早已經身心俱疲。

  跑多左我諗5分鐘左右，我終於停左落黎。周圍仍然係岩土，仍然睇唔到邊際。我再拎起部手機睇，痴撚線原來已經跑左成半個鐘。

  我個口好撚乾，乾到口水都吞唔落。眼皮好似灌左水泥咁重。我唔敢再跑落去，實在太危險。返返去門後面大樓入面起碼有辦法搵到唔同物資補給（要撞彩咁解），呢度，如果我行到最後係無結果，又喺無水無食物既情況下唔夠體力返去既話，後果不堪設想。

  更何況，依我對呢個空間目前規律既觀察，雖然距啲房係會隨機出現，但係起碼喺你觀測住既情況下，或者處於你可觀測既範圍內，距唔會變動。有啲似量子空間？（睇電影同youtube學）

  所以依家石柱同道門已經離開左我視線範圍，會唔會陣間就唔見左，我真係唔敢肯定。所以你話我唔肯搏都好，即使我背囊入面仲有少量乾糧同食水，我都選擇掉頭。





  我一拐一拐咁，死死地氣咁行返轉頭。一邊行，我一邊又拎左部電話出黎。百無聊賴下，我打開電話，嘗試撥打呢個既「緊急求助熱線」，跟住你估下對面講咩？

  距竟然話呢個號碼唔存在啊！唔好玩啦！

  執法機構喎，你正常就算打唔通都好啦，都無可能話唔存在啦！

  唉其實講黎都嘥氣，本身執法機構既電話都無可能打唔通啦。

  我唔死心，又嘗試打比自己極少量既friend子（其實都係啲唔熟既打機fd），又上網search左另外幾個國家既救助熱線，結果依舊係空number。

  其實我本身都打定輸數，都只係行返去呢段路太無聊搵啲野搞下，只係無諗到可以咁荒謬。

  我打開whatsapp，嘗試whatsapp我阿妹，雙剔，灰色。有啲希望。但係以距覆message既頻率，認真唔使線上等。

  不過我諗大概都有結論，我仲喺異空間入面，室外空間並唔代表d咩。





  我部手機仲可以上網。信號無論走到邊間房都維持喺三至四格，就連呢度都係。

  但係咁樣一黎就好詭異，呢片荒野，唔好話人，連曱甴都難搵到一隻，邊度黎既訊號塔。

  不過深究黎做咩阿？咁既地方，我諗你諗多少少都會發癲。

  自欺欺人，我地d打工仔最擅長架啦。

  我打開ig，嗰兩三個po，嗰幾十個followers，無癮。

  當初貪得意開，諗住我呢啲科技老人可以同世界接軌，唔好下下都facebook。

  千算萬算算漏左自己無朋友，完全無使用體驗哈哈。





  不過我真係好想知我有無辦法同外界聯絡到。我出左個po，睇下有無人覆我。

  劃開通知頁，一則新聞吸引左我既注意：今早野外一個私立小型實驗室發生嚴重爆炸，直接導致該區道路崩塌，實驗室內發生嚴重傷亡，所幸無附近途人受傷。事發片段瘋傳，事件引發民眾譁然。

  我點開片段：成件事係真係好誇張，片入面聽到「轟」一聲，連啲樹都喺度震，然後附近山坡上既公路就冧咗，同嗰啲高級數既地震無分別。事發地係見到明顯既火光，定係應該叫火球，老實講有生還者既話就已經萬幸。

  我一邊睇，個頭一邊有啲唔對路。

  點解我好似去過呢個地方。無理由。片入面既環境地形我太陌生。

  除左返工之外我好日都唔出街一次，如果呢個地方我有去過我應該一下就記得。

  咩曼德拉效應嗰啲？但係......點解我覺得呢個地方......好似好重要。

  其實本身都覺得有啲竟滾，真係咁巧合？早上有間實驗室爆炸，今晚我就黎左呢度。你話咩關係都無真係好難令人唔懷疑。





  睇住眼前既畫面，我個頭莫名地痛。毫無預警下，腦竟然入面出現左一啲我根本唔記得出現過既片段。

  一個著住實驗袍既人遞左一份文件過黎：「簽左距阿。」

  「咩黎？」

  「保密協議阿。」

  我睇唔清嗰個實驗袍人員既樣，但係我立到牆上面既一個標誌：係一個三個唔同方向既箭嘴穿過一個圓指向中間既logo。呢個logo……我從來無見過。

  記憶戛然而止，個頭依然地痛。我一隻手捉住頭髮，滿頭冷汗。

  好顯然，啱啱嗰段記憶就極大可能係我依家經歷既關鍵。





  啱啦啱啦，電影都係咁演架啦。參加左某d奇怪計畫，然後比傳送左去某個奇怪既異空間。

  我係比流放左去呢度？定係點？

  我當初到底係點樣同嗰個實驗室扯上關係？

  點解我會無左記憶？又點解喺呢個時候諗番起？

  啲記憶真係屬於我既？

  太多疑問。但係點都好，間實驗室絕對唔係一間普通既實驗室咁簡單。

  亦都係我目前唯一既突破口！

  我馬上襟入新聞詳情，但係竟然新聞都無提到實驗室既任何資料，連負責機構既名都無。

  我又換左幾間新聞睇，照樣係一無所獲，更加顯得呢間機構唔簡單。

  我碌落去comment 個section，全部都係：「喂咩料啊機構個名都無，記者點做野嘎？」、「挖嗰個機構出黎問責啦！」//

  無線索。

  我去google，大概憑啱啱既記憶畫左嗰個logo出黎，以圖搜圖。

  結果又係啲無相關既野，咩遊戲網站阿、meme圖阿之類。

  實在無方向，我又開左個po。

  其實我啱啱到依家都有po下野，畢竟成件事太過離奇，但係始終無人回覆過。

  唔知係真係因為我無朋友，定係......其實無人睇到。儘管距寫住「發布成功」。

  我又襟左入阿妹個whatsapp，仍然係灰剔。

  不知不覺，我都已經邊行邊襟左好耐手機。我太入神一個唔為意，兜頭撞左落一舊硬物度。抬頭睇，係一開始既嗰條古文明石柱。

  原來已經返左黎，好彩翻到黎。

  稍微定返神，入黎道門仲喺度，距就咁樣棟左喺荒野既中間。

  正當我某程度上鬆左一口氣既時候，我既腦海入面浮現左一把奇怪既聲線：好雄偉既、壯闊既、但又柔美既，一把類似女人既聲？

  唉，怪事，又開始啦。