OT臨收工先發現走唔出個office 仲要比野追殺點部署: #β423-0011【代號：僵持】
失策啊失策。
咁大個仔，連比人老笠都未試過，第一次比人拎槍指住個頭。
金屬既觸感愈來愈真實，喺我天靈蓋一路發寒，寒到入我個心。
比人喺個腦度開一個窿會係咩感覺？
會係一下子就失去曬所有知覺？
定係會好痛好痛，感受住自己個頭已經被炸開左，嗰種常人難以想像既撕裂既痛。
Feel住d腦漿慢慢慢慢喺額頭個窿好似鼻涕咁爬出來，大小便失禁，疼痛嘔心難當，卻係連用抽搐黎宣洩都做唔到。
有啲人可能會問：咁你入黎到依家都經歷唔少啦？
朋友喺你面前死左，自己又比人捅個透心涼變donut，仲差d變成怪物，仲會驚呢啲野？
首先，槍就係槍，唔會因為有其他野比距更恐怖而令距變得唔恐怖。
其次，正因為嗰啲恐怖經歷係幾咁真實，先至令依家懟住我罩門既呢碌金屬棍變得實在，令我清晰認知到比呢支野打到係真係會即場暴斃。
冷靜，冷靜。
如果依家亂左方寸既話，咁就真係萬事大吉：所有野都得個吉。
Sor 我知唔好笑。
距地啱啱既埋伏已經創造左刺殺既良機。
如果距地抱住剔除威脅既心態既話，一早已經可以落手，唔需要搞呢場挾持既大龍鳳。
唔理距地係真係想老笠搶裝備定係咩都好，只要距唔係一槍擊殺我，就有一線生機。
「冷靜d，傾傾距？想要咩都可以比你地wor？」
我一邊講一邊慢慢舉起對手。
「喂咩料啊！」旁邊個男人即刻叫囂，非常激動。
我眼角稍稍瞄過去，房間既環境過於昏暗睇唔清距個樣，只係睇到距已經用一把軍刀架住左𡃁妹條頸，刀刃緊緊咁樣貼左喺皮膚上面。
「喂死佬，救我啊......」𡃁妹把聲有d慌，已經無曬啱啱窒我既神采。
「收聲啦！」我有d煩躁，唔想理距。
反正距有辦法自保㗎啦。
正當我咁諗既時候，唔知點解心口好似有d野躍動緊，令我有種奇怪既躁動。
「喂咩態度啊你，信唔信我依家就一刀鋸左距！」距睇落更加躁動。
距既身體隨住距既說話好出力咁擺動，用力到個𡃁妹都搖左幾下。
又作勢將個𡃁妹推前，同時手上既軍刀更加緊貼𡃁妹條頸，一個咄咄逼人既態勢，好似好怕我做啲咩出格行動、又或者急於證明自己真係做得出自己講既野咁。
𡃁妹憤怨又可憐咁望著我，對眼look到好大，有d 紅，我有意無意咁避開左距既視線，但係個心又係隨之揪左一野。
做咩嘢呢？
Anyway，條友個感覺比我似係......虛張聲勢，唔係好堅定。
而且今次認真聽係𡃁仔聲，年紀應該唔大，最多可能同我差唔多。
「喂，聽唔聽到啊，叫你唔好搞小動作啊，醒定d啦。」
呢個時候身後面用槍指住我既人都再次出聲。
「野就無野想要，知道d咩就全部講出黎啦！」
原來係想要情報。
呢個人把聲都係一個𡃁仔，但係好明顯老定穩重好多，至少無任何明顯既急躁感。
但係.....雖然好微小，但係距把聲......係度震緊。
距手上把槍都係。
我嘴角揚起一抹不明顯既微笑。
我手上的確有唔少有價值既情報，但係.....你地能唔能夠得到就取決於你地有幾多料。
「枱上面好多血wor，你地殺左人啊？」
「痴線。」
「......」
「仲夠膽扯東扯西？真係唔怕我地殺左你個女啊？」
果然動搖左，身後男人嗰一下停頓，同埋之後語速都放緩左。
「我地真係夠膽架！係咪唔信啊！係咪唔信啊！」而隔離個男人開始講野既時候繼續猛烈咁郁動，睇得出愈黎愈慌。
「入左黎之後開左齋未啊？」
「你講咩啊？」
「我問你開始左殺人未啊！」
「......」
「我就開始左啦，啱啱間房有一個。」
「呼！」唔知係咪我錯覺，我聽到一聲好微弱既驚嘆聲。
「智哥！係咪要殺左距啊！果然要殺左距啦！條友咁危險！」
「無辦法啦，成王敗寇，唯有比你開槍啦！」
「......」身後既人無出聲，而我慢慢轉過身，將自己既額頭緊緊咁貼喺槍管上面。
終於同身後既人對到眼，同時現場氣氛都慢慢到達緊臨界點。
唔知點解喺呢d生死關頭，我永遠都可以癲得咁勻循。
但係果然，距係個學生哥，生得青靚白淨，睇落係生活既優渥嗰d，我估最多中六。
「開槍啦！我揀左啦！」我加大口氣，攤開雙手，肆無忌憚咁往槍口靠。
「.....」個𡃁仔都係無出聲，但係感覺到槍管既震動愈來愈明顯。
「好顯然我完全唔care個𡃁妹！開槍，如果一個唔好彩射唔死我，呢度一旦發生混戰，無人知會發生咩事！」
「又或者......放低槍，我地合作，你地咁多人又咁多武器，我唔會亂黎既。更何況，你要既情報，我有，而且唔少。我諗你地都搵情報搵到焦頭爛額啦？唔係就唔使走投無路到拎支槍指住個陌生人拎情報啦？錯過今次你地唔知仲有無機會啊？你地肯定呢棟建築入面仲有活人？」
「......」
「智哥唔好聽距講啊！條友痴線架！殺左距啦！都係殺左距啦！我依家先殺個𡃁妹！等我開齋！」
其實我只係喺度9 up，嘗試動搖呢個so-called智哥既心理防線。
距睇落係個識衡量既人，應該唔使點擔心。
反而我擔心既係隔離嗰個。
距睇落愈來愈歇斯底里，有d怕距會令事態失控......
「好。」果然。
「識揀啊！」我表面淡定，心底已經講緊一萬句粗口。
「我同你地合作，但你慢慢放低支鐵通，同埋除個背囊比我先。」
「明白嘅，冇問題！」我即刻按佢講嘅去做。
正當我以為一切都塵埃落定既時候......
「智哥唔可以心軟架！你落唔到手我落手！」隔離嗰個人突然發癲，舉起軍刀就要一野拮落𡃁妹個心口度.....
「唔好啊！」我同嗰個智哥同時出聲，同一時間我竟然不由自主咁樣撲過去個𡃁妹度！
呢一刻時間好似靜止左咁，下一秒，𡃁妹突然大聲尖叫。
「啊......！」刺耳既尖叫聲接近海豚音既高度，好似喺度直接咁一下一下刮落我地既耳膜咁，連房間有d震動。
我一下跌落地下，同時兩個𡃁仔手上既武器滑落，兩個人呆滯咁樣跌坐左喺地下。
呢個時候我終於搵到啱啱驚呼聲既來源：就係不遠既角落，有個著住校服，同兩個𡃁仔年紀差唔多既學生妹喺度埋頭啜泣。
局勢終於平定。
我率先爬起身。
「我好高興局勢穩定左落黎，睇黎我地可以好好傾下。首先......就講下你地既火力點黎啦！」