係同屋室友?定係同居密友?: 17. 接收舊居

學翹企係已經裝修好嘅屋企，四周張望。佢對師傅嘅手工非常滿意，自己拎住鎖匙，正準備鎖門之際，又聽到肖氏一家嘅嘈吵聲音
 
唔單止呢一家人，陪同佢地黎嘅，仲有佢地嘅親友，十足十參觀示範單位一樣
 
「唏，呢到夠大，遲D入伙果時再黎打牌!」肖太太好興奮咁講
 
一D親友用鄙視嘅眼光望住肖太太一副高高在上嘅咀臉，佢地都低聲講道「間屋真係佢架?即係濫用公屋啦，早就睇佢唔順眼」
 
「呢到會擺按摩椅，呢到擺電視，呢到擺梳化。唏!全部訂好哂架啦，下星期就可以送黎」
 




當肖太太同一班人走左之後，只剩下肖翠君同學翹兩個人，而學翹瞼上仍然係一臉倦容，基本上每一次見完肖太，佢都係咁嘅樣
 
「你做咩唔出聲者」肖翠君好不滿咁講
 
「咁妳阿媽自己不停講不停講，講到間屋係佢嘅一樣，我仲可以出咩聲呢?」
 
「咁間屋佢都有份架嘛，佢想住出黎，咪讓佢囉。你有車可以住我地間屋丫嘛。好心你唔好咁小氣啦!仲有呀!下星期送傢私黎架啦!快D配鎖匙俾我阿媽啦」
 
「傢私都訂好添啦?真係唔洗問下我架喎」學翹開始有D不滿
 




「問咩者，間屋係我地架嘛」
 
「咁就唔洗問我意見?我想接我妹妹黎住喎」
 
一聽到苗學翹想叫個堂妹黎住，肖翠君毫不留情咁鬧
 
「好心你咪再同你D家姐阿妹聯絡啦!佢地想要左你間屋咋!所以我先要加名落黎。」
 
佢繼續連株炮發咁講，真係非常有佢阿媽嘅影子「而家我地保護緊你咋!仲有呀!成日信埋D外人!你上次同人打架單野呀!有賠償未呀?有就快D開個聯名戶口入錢落去啦!你阿爸阿媽D賠償金同人壽股票都俾埋我保管啦!你咁易信外人!」
 




肖翠君由學翹屋企，講到上佢部車，成程車都不繼咁講講講，講講講
 
而且佢地仲通知埋學翹，下星期有傢私送到，順便叫埋律師黎加名
 
講完又講佢部車「你快D換車啦，叫你買部7人車車埋我屋企又唔肯!渣住架日本車仔有咩好呀?我點帶你出黎見我D FD呀?人地個個男朋友渣Tesla，我就要坐你架Suzuki!你有冇搞錯呀!」
 
其實唔止部Jimny仔，之前學翹試過用部hiace黎車佢地一家人，激到佢地生蝦咁跳
 
「咁我鍾意渣越野車，Jimny仔啱哂我用，有咩唔好?」
 
「總之我就唔鍾意啦!」
 
成程車學翹好似耳仔受罪一般，係行車期間，仲見到肖翠君同其他人whatsapp得好開心，而學翹見到，對方係一個男性，仲sent左d佢同肖翠君去沙灘著泳裝嘅相俾佢
 
立時，學翹覺得自己頭上出現綠光




 
渣住部埋係大欖隧道之中，綠色嘅光芒由一部黑色嘅Jimny仔中照射出黎
 
如果話當時係農曆7月都可能有人信
 
所以，當肖翠君落車後，佢就打俾姐夫嘅事務律師拍檔
 
「喂?游律師?我係黎大狀嘅舅仔，呀，係係係，冇咩事啦，要你擔心埋一份真係唔好意思。」
 
「警方果邊落左口供架啦，係呀，應該唔洗勞煩你同姐夫，係呀，唔好煩佢啦，一陣家姐鬧死我呀。係呀，今次係想講返，下星期…」
 
苗學翹係到安排一切，要俾一個教訓肖氏一家
 
另一方面，房屋署都收到舉報，有人濫用公屋以及虛報財產