係同屋室友?定係同居密友?: 48. 鎖匙

星期日早上，小祺攬住鯊田友打開眼，同佢講左聲早晨後，就將佢放返係埋鯊鯊嘅專用位置
 
學翹今日準備左早餐俾佢地，今日又係食粥，而且仲係好多料嘅艇仔粥
 
佢整嘅艇仔粥，D料仲多過粥
 
「聽日妳係咪帶飯?」
 
「係呀，你都帶?」
 




「我日日都帶架啦，咁我今晚煮多D啦」
 
其實小祺諗過，正如學翹話齋，一日未還哂學債，佢都會一直留係呢到同佢做室友，不過自己點都要出返D錢同埋幫手打理呢間屋，所以小祺就提出要幫手
 
「妳幫手呀?」
 
「係呀，係到，我都要幫返你手啦，我唔會當呢到係酒店架」
 
「咁呀…一係妳負責晾衫囉」
 




「只係晾衫一樣野就夠?」
 
「係呀，其他野我搞得啦」
 
「但係…」
 
「另外買日用品果時，妳跟埋我去咪得囉，妳負責計下有咩需要買」
 
學翹咁安排，係因為小祺係管理呢方面好有心得，佢而家可以將個倉管理得井然有序
 




「仲有，妳都應該買返D護膚品啦」
 
「護膚品?我?」
 
「妳都係女仔黎架，妳都要敷下mask架，妳睇妳d頭髮，有冇用護髮素架?」
 
「咩喎，咁人地要慳錢丫嘛…」
 
「都唔洗慳到咁嘅」
 
「咁我地一陣洗唔洗去買野?」
 
「今日留係屋企得啦，上星期我買齊哂所有野」
 
小祺聽到唔洗出街，自己非常開心，佢同學翹一樣，可以全日足不出戶咁係屋企睇書，兩個人真係襯到絕，兩個人都可以一齊係屋企頹廢一日




 
小祺係書房執好自己個位時，見到學翹果邊有枝天文望遠鏡。佢有d好奇，所以埋去睇一睇枝鏡
 
「做咩呀?妳有興趣睇星?」
 
「咁我而家同你一齊住，我都要瞭解下你有咩嗜好掛」
 
「妳而家見到啦，我有天文望遠鏡，有時我會夜晚出去觀星，或者係露台睇星星」
 
「仲有呢?」
 
學翹指住個防潮櫃「仲有影相同行山之類，我唔係完全摺埋係屋企架」
 
「咁平時邊個陪你去呀?你前女友?」
 




「傻啦，要佢跟我去觀星行山，即係叫佢去死
 
「估唔到你同佢興趣相差十萬八千里，都可以拍到拖喎」
 
「係囉，我自己都唔明」
 
晚上，學翹係廚房煮飯，而小祺就準備飯檯，餸拎到出黎時候，小祺頓時覺得自己搬黎同學翹做室友係正確嘅選擇
 
佢地將兩個飯盒準備好，放入雪櫃就開始食晚飯。小祺暗嘆學翹真係識好多野，佢除左識煮飯之外，今晚仲煲左湯，心諗係到住，想唔肥都幾難，佢覺得學翹前女友真係唔太識珍惜佢眼前呢個咁好嘅男仔
 
收拾好飯檯，又係沖涼洗衫時間。小祺之前係到暫住過一星期左右，佢對於學翹嘅習慣都已經摸清楚
 
學翹佢每日都係食完晚飯後就沖涼開機洗衫，所以小祺亦都配合佢，反正大家嘅習慣都差唔多
 
至於衣著，反正大家都係室友，小祺d胸圍底褲，學翹都會幫佢晾，相反學翹d底褲小祺都會接觸，所以小祺索性係屋企著T shirt真理褲同埋真空唔戴胸圍算數，反正自己都冇咩睇頭




 
星期一，早上，佢地兩個準備起身，一齊刷牙梳洗，然後一齊出門返學
 
「拿，妳條鎖匙」學翹將鎖匙交俾小祺
 
「唔該哂你」
 
「以後我地就係室友啦」
 
「返去食早餐啦」
 
然後佢地就上車，好開心咁返去食早餐
 
呢日，係佢地正式成為室友嘅第一日