係同屋室友?定係同居密友?: 57. 遇上同事

小祺放低電話去叉電，然後伸一伸個懶腰再離開張按摩椅。自從佢同學翹「同居」之後，佢自己少左煩惱，唔洗計住幾時要交租，幾時要還學債等等。佢自己打開電腦，睇多一次自己寫俾學生資助處嘅信，解釋點解可以一次過還哂所有學債，而小祺嘅原因，係自己未婚夫幫佢清還。係Macbook中print出黎然後自己再簽名
 
「妳搞掂封信啦?」
 
「係呀，所有野一次過寄去就得」
 
「清哂學債，妳可以輕鬆d囉」
 
小祺望實學翹嘟長個咀「不過你而家係我債主呢」
 




「起碼我唔洗催妳還先」
 
小祺講笑咁講「不如我嫁俾你當無數囉，好唔好?」
 
「妳呀?」學翹背住小祺係到串佢
 
「你唔係當真呀?」
 
「唔係」
 




小祺再睇睇電話，佢見到提示，佢張約就快到期，而佢冇得再用學生plan
 
「呀….又到煩電話績續問題啦」
 
學翹聽到小祺咁講，當佢晾好哂衫，係佢個袋到拎出左電話家庭plan出黎，佢遞俾小祺
 
「做咩呀?你又要續約?」
 
「差唔多啦，我見有家庭Plan，又可以出新機，睇下妳有冇興趣夾埋一齊」
 




「家庭plan?你同妳家姐夾開?」
 
「唔係呀，打算同妳夾，再一齊出部新機」
 
「同我?」小祺一聽到後又立即不知所措，話明係家庭Plan，搞到佢又諗三諗四
 
學翹望住小祺部電話「妳部機都好多年啦，應該妳由UG開始用到而家，係唔係呀?」
 
小祺點點頭，然後學翹拎起佢果部電話「我同妳差唔多啦，所以一齊換機好唔好?」
 
「嗯…冇問題呀」
 
第二日放工後，學翹同小祺去到學校附近嘅商場join plan買電話同埋撐檯腳
 
佢地去到電訊供應商，問左家庭Plan之後，好快佢地就一齊join左，然後再一齊出埋最新嘅I Phone pro max第X代




 
佢地兩個坐係間西餐廳到，小祺望住張單「好啦，我同你嘅債務又加左啦」
 
「都話唔洗妳急住還囉」
 
小祺部電話響起wts聲音，佢睇一睇，係佢中學同學提大家，黎緊星期六晚有聚會
 
「中學同學?」學翹問一問
 
「係呀」小祺個心立即諗一諗，佢夢中情人會唔會出席呢?不過呢個問題佢自己一早就有答案，因為每一次佢都會出席
 
學翹睇出左小祺心意「果晚妳地係邊到聚會?」
 
小祺睇一睇「係旺角d日式放題」
 




「妳食放題呀?」
 
「咩喎，唔好睇少我先得架」
 
「咁我果晚係邊度等妳呀?定係妳夢中情人會送妳返黎?」
 
「你接我呀….唔…」
 
「到時先算啦」X2佢地兩個不約而同地講，不知不覺，佢地有好多野都好夾
 
係餐廳食埋甜品後，佢地就準備去停車場
 
不過因為佢地係學校附近嘅商場食飯，難免會撞到同事，特別學翹係學校都有一段日子，識落嘅人唔少
 
今晚佢地撞到嘅，係佢地部門嘅未婚同事




 
「咦!?Suki?」
 
小祺轉身一望，係佢地總部同事
 
「Connie，妳仲未返屋企嘅?」
 
「放工後出黎買d野者，順便同朋友食埋飯，而家返去啦，妳呢?」
 
「我呀?」小祺諗一諗，唔通光明正大咁話俾人知，佢同學翹係同居室友，今日係出黎一齊join電話家庭plan同出新電話
 
咁樣講，跳落阿瑪遜河都洗唔清
 
「佢出黎睇電話，遇上我，所以一齊食左個飯」學翹吸完車飛後上返黎商場
 




Connie望一望小祺同學翹「咦…你地兩個…係唔係…」
 
「唔係!絕對唔係」小祺好快咁回答，不過Connie表面上話人知冇事，實際上佢心中已經開始估計，呢一對同事幾時會戀情曝光
 
「Connie妳住邊呀?我車埋妳返去啦」
 
「呀，我住沙田，我搭地鐵返去得啦，唔該哂你」
 
「聽日見啦，拜拜」小祺同學翹一齊行去停車場
 
身為未結婚，又年輕嘅Connie，佢嘅觸鬚已經探測到少少野，未來一段日子，小祺同學翹將會係佢嘅調查對象