係同屋室友?定係同居密友?: (S2)02. 吸引目光

星期六下晝，小祺係宿舍到對住塊鏡搽bb cream之類，梳好個頭，再搽上少少唇彩。佢一出去廳果時，學翹望到佢後呆左，因為小祺一打扮左之後真係好靚
 
「我個妝ok嘛?」
 
學翹回一回神「ok呀」
 
「咁我出發啦」小祺著起平底涼鞋後，準備出發
 
「小祺呀」
 




「係!」學翹第一次咁樣叫佢，平時都係叫佢Suki就算，佢覺得叫自己中文名，會更加有親切感
 
「我車妳出去啦」
 
「你車我去旺角?」
 
學翹點一點頭「係呀，反正我冇野做，我可以係外邊等妳」
 
「係旺角等我?你唔怕俾人抄牌咩?」
 




「咁…我冇野做嘛，咁我又唔知妳返黎果時會唔會太夜，係外邊等妳會好d」
 
小祺心中一甜，原來佢係咁著緊自己
 
「咁好啦，不過你都要自己食野架喎」
 
「一定會」
 
學翹車住小祺出去旺角，佢忽然間覺得，佢連俾人送小祺搭地鐵嘅機會都要減埋。可能呢d就係男人嘅直覺、主權同領土觀念
 




係車上，小祺用鏡照一照自己
 
「妳好緊張呀?」
 
「唔…又唔可以話係嘅，但係第一次化妝，我怕俾人笑」
 
「妳放鬆少少就得，唔洗緊張」
 
「丫，你講到參加同學會好輕鬆咁嘅，你地唔會同人比架咩?」
 
「我地成班男人，有咩好比較?不如留返d時間玩仲好」
 
「全部男人?」
 
「我讀男校架嘛」




 
「男校，會唔會好悶架?」
 
「悶?一d都唔悶，我地玩嘅野肯定癲過男女校，毫無保留咁玩，玩到底褲冇埋都得」
 
「真係咁好架?」
 
「妳講到一陣聚會妳地會比較呢樣比較果樣咁嘅?成班都係排比人黎架?」
 
小祺笑一笑「咩排比人呀?」
 
「排住隊黎比較的人」
 
「有d咁嘅野架咩!?」
 




「新品種生物」
 
準時5點45分，學翹車小祺去到餐廳所在嘅酒店商場門口
 
「妳一陣走果時通知我喎」
 
「知啦長氣」小祺聽到學翹咁樣提自己，一d覺得煩嘅感覺都冇，相反個心係甜甜地
 
上到去餐廳果層，睇一睇counter果到，杏壇中學同學會，小祺行到去間房一入到去
 
「Suki?妳係Suki?」
 
小祺點一點頭
 
「好靚女呀!!!!!」




 
就咁簡簡單單嘅一句好靚女，小祺就成功吸引左大量雄性生物嘅目光，同一時間，所有人向小祺行注目禮，搞到佢有d尷尬
 
小祺坐返係自己相熟嘅同學當中，屁股一坐低，佢就俾同學潤一潤
 
「嘩Suki，一黎就吸引哂男仔目光喎」
 
「下….邊度會呀?」
 
「妳睇下，班男仔係到望過黎，應該講緊妳啦」
 
「係囉，幾年冇見，妳學識左打扮啦喎，份工作需要呀?」
 
「一d都唔需要，我係返大學入邊做，邊洗化妝」
 




「妳讀完碩士仲留係大學到呀?妳真係咁鍾意讀書咩?」
 
「好彩搵到呢份工咋」
 
「人工呢?」
 
「我入職一年都冇，大約…$24k左右」
 
「$24k都唔少啦喎」
 
「妳而家…住邊呀?都成左年」
 
「我之前咪住hall囉，之前係屋企附近租左套房，但係…而家我搬左去同個同事一齊住學校宿舍」
 
「男同事?」
 
「女呀!!!」小祺都知冇可能講俾人聽自己同個男同事做同居室友
 
「妳屋企，仲係咁呀?」
 
「就係咁我先要搬去學校職員宿舍，妳地估真係貪得意咩?」
 
「有時我仲見到妳細佬拖住女仔行街，好大洗咁」一個住小祺附近嘅同學講俾小祺知
 
「咁佢要大洗我都冇辦法」
 
有其他同學黎到，搭一搭小祺膊頭「喂，萬年阿二」
 
「咩事幹呀，科長?」
 
「妳望望門口」小祺望一望
 
「佢黎左啦」
 
房門口有一個男仔著住smart casual行入黎，小祺見到佢時，都不免心跳加速，果個人，正是小祺一直暗戀嘅校草男同學