讓我當你的籃板球女友好嗎？: 第十九章

「喂……？」電話的對面只傳來空洞的聲音，這讓我感到有點毛骨悚然。
 
 
「喂？係咪阿曦？」
 
 
對面還是一片沉默，好像封閉在密室中，連一絲空氣也沒有流動般的寂靜。
 
 
「阿曦？」




 
 
「阿曦？妳係咪有事啊？」我開始擔心起來，她是不是發生什麼事，該不會被人綁架了吧？
 
 
「曦？」
 
「卓樹……」
 
來到奧海城附近的海旁時，離和她的通話已經是一小時後。




 
 
她獨個坐在海邊，雙眼無神的望著海面。
 
 
「曦？」
 
她微微一笑，可是這一笑感覺沉重。
 
 




我沒有說話，走到她的身邊就坐下來。
 
 
「呢到景色唔錯啊。」我隨便找了一些話題打破沉默。
 
 
環顧海面，這裡因為是避風塘的關係，碼頭泊滿了輪船或船隻，偶有一、兩隻帆船經過，
 
 
在波平如境的水面劃破一條長長的浪花痕跡，久未平復。
 
 
風嗖嗖的迎面吹過，阿曦的長髮輕輕的飄逸起來，
 
 




其中數條髮絲被風吹得在其失落的臉孔上輕撫。　
 
 
我們就這樣靜止不動不說，望著船緩緩的前進和浪花淺起。
 
 
時間好像流動很像一個年紀老邁的老人一樣緩慢，步伐遲緩的，存在的一切都調較了慢鏡。
 
「唔開心？」
 
我實在想不到該說什麼，唯有從無意義的說話入手。
 
本來我沒有預想她會回應我的，她卻緩緩的開聲說：「我係咪真係好衰？」
 
「下？」




 
 
「點解好似每一個人都係咁。」
 
 
「……妳同阿峰嗌架？」
 
 
她深深的吸了一口氣，像是要穩定什麼後，才開口說：「其實我地一早已經性格唔夾。
 
 
一開始時候，他都仍然勉強遷就到我，未至於嗌交。
 
 
只不過日子耐左，佢慢慢忍受唔住，開始發脾氣同唔滿意我同其他男仔玩得咁埋，成日同朋友出街忽略佢。




 
 
我都有試過改，但他嫌我改得唔夠多、唔夠快。」
 
 
「所以就嗌交？」
 
「三日一小吵，五日一大吵。」她苦笑一下
 
 
「我自問有盡力改，好努力咁記住唔可以咁唔可以咁，但一有朋友有事搵我，我就好自然咁唔記得左出左去幫，令到佢又好嬲。
 
 
 
唔同男仔玩得咁埋，但男性既好朋友問多兩問，我又會唔忍心同佢地講返野……」




 
 
我心想，這果然是阿曦的性格，跟我在一起時，她也是這樣的。
 
 
聽起來的時候，有點難過的感覺，因為相對下去，阿曦好像未曾為我去改變什麼。不過我馬上為這個想法感到抱歉。
 
 
「卓樹，我係咪一個好唔合格既女朋友？係咪無男朋友會忍受到我既性格？」
 
 
「我覺得……」我停了一停然後說：「有時做妳男朋友真係會好唔開心，好易呷醋。我嗰時都係咁諗。但事後又發覺……我錯左。我當初中意既妳，其實就係原原本本既阿曦，就係有呢啲特質既阿曦，就係重情義、不拘小節既阿曦。
 
 
只不過慢慢自卑同妒忌加上佔有慾作崇，唔想比其他人搶走妳，令我開始變質，變左好似已經唔係欣賞本來既妳，單係想獨佔妳一個，拎安全感。
 
或者兩個人相處一齊，有時好多衝突，好似好唔夾咁，
 
但木下成日都會講：『呢個世界無性格不合既分開，只有愛得唔夠而分開』，
 
我相信而家可能未融合到，但佢中意妳既，一定捱得過既。比啲信心啦。」
 
 
阿曦眼神充滿不可思議的望著我說：「你……好似唔同左好多。」
 
 
「可能同得木下多……哈哈。」
 
 
「喔……」她轉過頭去幽幽說：「但佢呢排好似同第二個女仔好近。」
 
「可能佢只係想激妳，吸引妳注意返去啫，妳都要行動啊。加油啊，我支持你地。」
 
 
「多謝你……卓樹。你仍然都係包容。」
 
 
「唔洗客氣。」我微笑說。
 
 
可是我又不覺得自己是包容，當初正是接受不了才分手的。
 
應該是吧……
 
 
「如果我地無分手，你覺得你會唔會忍受到我繼續咁……因為你話你都有變質……。」
 
 
「我都唔知。」我聳一聳背說。
 
 
氣氛有點尷尬，她便問：
 
 
「我話你地聖誕節諗住去邊？」
 
 
「我諗住去海洋公園哈哈，會唔會好無驚喜同心思？」
 
 
「唔會啊，幾好啊，我都想去啊！」
 
 
我們一談一笑，時間不知不覺溜走。
 
 
很快便要渡過一個難忘的聖誕節。
 
 
曾有人問過，人生中最難忘的回憶是哪一件，我回答說：「除了那一夜，就是聖誕節那一晚。」