《青梅竹馬的婚禮》: 第七節

事隔多年，我對阿欣嘅印象亦漸漸變得模糊，只不過有時都會諗吓到底佢依家仲有冇讀書、有冇拍拖、個樣變成點、仲記唔記得我……
 
終於，我喺上年年初得到咗一切問題嘅答案。
 
話說賢叔嚟咗香港做嘢都一排，喺年假果陣賢姨帶咗阿欣兩姐弟嚟香港玩。
 
果日一返到屋企，已經見到賢叔一家人坐咗喺客廳梳化。
 
阿欣肥咗少少，染咗一頭啡髮，衣著成熟咗，我一眼就認得出係佢，但我依然問：「你係咪阿欣？」
 




「唔係我仲有邊個？」阿欣反問。無論佢把聲點成點，我都依然可以認得出。
 
賢叔聽到之後不斷笑我：「克仔，你連阿欣都唔認得呀？」
 
我摸一摸後腦，答：「哈哈，佢變咗咁多真係唔係好認得。」
 
「你先變得多呀！啲頭髮攣晒！」阿欣笑住咁指住我個頭。
 
咁多年冇見，大家都唔同晒，變得成熟咗，我同阿欣以大人嘅身份再遇，我唔可以再好似以前咁拖住佢出街、攬住佢瞓、唔著底褲通屋走……
 




然而變化得最多嘅，可能係大家嘅內心。佢唔知我喺呢幾年入面經歷過乜嘢、遇過咩人；反之亦然。呢一次再遇，感覺上總係有點陌生，可能呢啲就係所謂嘅「成長」。
 
去咗酒樓食團年飯之後，我帶阿欣周圍去，希望可以好似以前咁，大家無所不談。唔知阿欣喺咁多年之後嘅今日，心入面仲有冇存放住我哋以往嘅承諾同埋一切經歷過嘅回憶。
 
「阿欣你仲有冇讀書？」我問。
 
「冇啦，出咗嚟做嘢兩年。」阿欣問：「你呢？」
 
「有呀，仲讀緊書，準備考大學。」
 




阿欣突然轉換話題，問我：「香港呢邊有冇得放煙花？」
 
「冇啦，香港唔俾，我都冇玩好多年。」
 
「我都好耐冇同你玩過煙花，記唔記得以前你爸爸俾煙花辣穿咗件衫？」
 
「哈，估唔到你仲記得。」
 
之後，我哋都冇提及大家嘅近況，只係不斷談及細個發生過嘅趣事。有一刻我覺得，我同阿欣又變到好似之前咁。