《一位明星，在自己的「生前喪禮」上死了》: Chapter 17
Chapter 17
「咪住先。咁 Vincy ...... 點呀？」Rosemary 問。
「無錯，咁樣露天放一晚都唔係辦法。」Amanda 想了一會，「我提議降低個升降台，將個水晶棺降番落後台先。」
「嗯...... 葉醫生，你有無專業意見？」警察先生問。
「Amanda 講得啱，屍體就咁露天放一晚，唔係太好，特別我地喺海上面，啲海風會好潮濕。我同意先將水晶棺降落後台，然後開大冷氣，減慢屍體腐化速度。只要無人行近水晶棺，上面可能有嘅證據，例如手指模，照計唔會受到破壞嘅。」
「好，就照 Amanda 小姐嘅建議去做啦。咁等影多幾張相紀錄案發現場環境，然後就將水晶棺降番落後台。」
＊＊＊＊＊＊
水晶棺連同 Vincy 的遺體被降回後台之後，眾人都各自回房間。
沒有後台通行證的三位，歐陽牧師、葉醫生、警察先生，則在其他有證的人的陪同下進入後台，找了三間空房暫住一晚。
＊＊＊
記者 Erica 和 Nicole 回到房間。
Erica 這刻的思緒十分混亂。
大明星 Vincy 在自己的生前喪禮上死了！！！
還是在眾目睽睽之下，無聲無息地死了！
昨晚才剛剛跟 Vincy 做了一個深情的訪問，Vincy 對自己好像好朋友一樣，在訪問中真誠地說了很多真心話，她現在竟然死了？
究竟發生了什麼？
發生了這麼一件驚天大事，當然要第一時間打電話給電視台老總匯報。
老總說，警方已經向公眾公開了「Vincy 死了」這個事實，但詳細情況一概沒有公佈。
市民對這則突如其來的死訊都半信半疑，尤其是今天是四月一日愚人節，也尤其是 Vincy 性格一向都貪玩，愛作弄人。
所以，老總第一句就問 Erica ：「Vincy 係唔係真係死左？」
「個葉醫生話係死左囉，佢係 Vincy 嘅私人醫生，應該唔會講大話掛。」
「死因係咩？」老總問。
「醫生話可能係窒息而死，但佢話要去醫院進一步檢查先確定到。
仲有件事好怪架，頭先 Rosemary 話要報警啦，Vincy 舊經理人 Amanda 竟然話唔好報警，要低調處理喎，話驚 fans 傷心。我覺得唔係咁簡單。」Erica 說。
「嗯...... 聽落件事可能有內情，背後可能有好多秘密。你地兩個咁難得身處喺船上面，記得揾多啲料，你地有偷拍眼鏡架嘛，好好地用呀。我要獨家料，獨家片段呀！俾心機喇！」
＊＊＊＊＊
「會唔會...... 真係只係自然病死咁簡單呢？」Erica 越想越疑惑。
「葉醫生話有可能係窒息而死嘛。」
「就係囉！咁點會無啦啦點會窒息呢？
全世界都睇住佢，水晶棺四面都透明嘅，無咩特別事發生過喎，佢只係好平靜咁瞓响水晶棺入面咋喎！咁點解會窒息呢？
個水晶棺又唔係密封嘅，Vincy 上面係無玻璃覆蓋，個開口有成個人咁大，係打開架喎，空氣流通架喎。點會窒息呢？
頭先 Amanda 話可能係被口水『濁』親，我覺得係有可能嘅，但葉醫生嘅反駁都好合理喎，正常人被口水『濁』親，身體自然反射動作係會咳架喎！
所以我覺得唔會係自然病死咁簡單嘅......」
二人沉默，對於「Vincy 為何會窒息而死」這個問題，毫無半點頭緒。
「呀！你唔係全程影住個喪禮情況架咩？播黎睇下有無咩特別！！！」
Nicole 把偷拍眼鏡除下來，把眼鏡的左臂折上，從折口取出一張晶片，放進電腦播放。
Nicole 果然不負重托，把全場生前喪禮的過程都以錄像記錄在晶片入面。
二人找出最後環節「瞻仰遺容」的片段，由頭至尾看了一次。
「無咩特別喎，完全睇唔出有咩不尋常嘅地方......」Nicole 皺眉說。
「睇多次囉，留意下有無咩人做過啲奇怪動作，例如喺水晶棺前停留好耐之類。」
二人又再重先看一次，都是沒有發現任何異樣。
「再睇多一次試下。」Nicole 把滑鼠指到「瞻仰遺容」環節開始前的畫面。
「咦！咪住！你有無發覺！個厚度唔同左！？」
Erica 很激動的指著電腦熒幕中，水晶棺入面的白色絲絨軟墊。
「 Vincy 瞓住嘅軟墊，個厚度好似唔同左！你返番去開頭，然後飛去最尾比較下！」
Nicole 照 Erica 指示，把「瞻仰遺容」環節開始前和完結後的畫面作比較。
Erica 所觀察到的，的確是事實。
水晶棺內， Vincy 下面的軟墊的厚度，的確是變了。
「瞻仰遺容」完結時軟墊的厚度，比開始時明顯薄了。
「係喎！但咁又同嘅死有咩關係？軟墊壓得耐扁左，都好正常啫......」Nicole 不明白 Erica 為何好像發現驚天大秘密般激動。
「你睇下！照比例推算，個軟墊嘅厚度係跌左差唔多 20 cm！你諗下自己夜晚瞓覺，第二朝起身，張床褥會唔會扁左足足 20 cm咁誇張？但成個『瞻仰遺容』儀式，只不過係大約半個鐘嘅事。
半個鐘扁左 20 cm？
咁大個分別，我諗...... 個軟墊可能有古怪。」