豬籠車內的呂布: 《十三》

我抹一抹面上啲水，慢慢咁張開雙眼一睇，望到嘅係一對腳企咗喺我左邊，再望清楚啲，係一對粉紅色嘅水鞋，一對我好熟識嘅水鞋。


見到對水鞋，我即時撐番起身，左手掃一掃身上面啲菜渣，右手抹一抹頭髮上啲水，不發一言，耷低頭轉身就走，淨係想盡快離開呢度，一秒都嫌多。


「嘭 ～」


一個紅B牌膠水桶跣咗落地不停咁旋轉，當中仲夾雜咗一個女仔嘅飮泣聲，兩行眼淚不斷由佢面上滴落地，而呢個女仔就係我喺街市入面唯一嘅紅顏知己，賣菜嘅阿蟬 —「貂蟬」。






「嗚嗚 ～ 呂布，你去邊啊？」


即使阿蟬點樣大嗌，我都扮成聾耳陳，不聞不問繼續跑，一直跑，除咗跑，都係跑，我唔可以畀自己停落嚟，因為我再冇面目見阿蟬，亦唔想畀阿蟬見到我咁撚醜嘅樣，不折不扣嘅撚樣。


「啊 ～ 啊 ～ 啊啊啊 ..... 屌你，屌你老味，你班仆街冇好死㗎，我要報仇，呢個仇我一定要報。」






我一邊跑一邊嗌，將心入面所有屈辱嗌撚晒出嚟，發洩晒出嚟，漫無目的咁跑，跑啊跑，不斷喺天水圍嘅範圍跑，都唔知自己跑咗幾耐、幾遠，我淨係知道當我停落嚟一刻，我又番咗嚟天睡邨，雙腳唔知咩原因，好似裝咗自動導航咁，始終都要番嚟。


依家嘅我成隻喪家之犬咁，除咗用個屎字嚟形容，我都諗唔到第二個更貼切嘅字。忽然間，聽到個街市入面大鑼大鼓、嘈喧巴閉，我望兩望見冇熟人，就偷偷地䁓吓究竟發生咩事，一睇，見到喺我舖頭前面圍滿晒人，仲有隻舞獅喺度跳嚟跳去，好很熱鬧。


陳登、曹阿瞞等人個個著到新光頸靚，一齊掂住把刀準備切燒豬，隔離仲掛住條Banner，上面寫住






「祝賀呂布返歸大酬賓，買一送一大優惠！」


望見條Banner，百般滋味，一連串問題一下子浮現出嚟。


「乜我真係咁仆街咩？真係咁乞人憎？個個都想我離開個街市？可能 ..... 我之前真係好仆街都未定，既然係咁，離開應該係我唯一嘅選擇。」


輕輕的我走了，正如我輕輕的來，我搲一搲屎忽，不帶走一片雲彩。