深缺: 深缺-序

  "不如我地分手啦，我覺得你照顧唔到我"我終於同佢講左，佢係一個我好鐘意嘅女仔，但到在今日，我終於要開口同佢講......用左一個唔係理由嘅理由........  


傷心,大家都有,而我地四周亦都開始充斥住一陣傷感嘅氣氛。  


而呢陣氣氛亦使到我唔夠膽直視佢,雙眼只好不其然望住佢手上嘅戲飛,係"吸血新世紀4", 一套如果無Amy我依世人都唔會睇嘅戲；一套我無睇過之前幾集嘅戲；一套我淨係知有個小白臉做嘅戲........就因為同Amy一齊依一年,令到我三十三歲人做過一D我從來無做過、體驗過, 亦都因為Amy,令我感受到一D我從來無感受過嘅野。


＂點解要咁？之前都好地地＂Amy眼中隱約帶有淚光咁講出"唔好咁樣，我好好架，不如一齊努力?"佢抱住我"唔好放棄啦好無？" 面對一個咁可愛嘅女仔(至少我覺得佢係，遲D形容比大家聽)所講呢一番話，我都有心軟左一下。但係好快,我就講出令佢傷心不已嘅三個字"對唔住", 再次，我的目光由佢雙眼轉到兩張因為激動而揸巢左嘅戲飛上....... 





講明先，我拒絶嘅原因並唔係扮有型，清高，瀟灑。相反我係一個衰人....... 


十五分鐘，十分鐘，五分鐘，終於到左要入場嘅時候。 


"不如入場睇戲先"我開口講

 "我唔想睇,我唔想同一個唔鐘意我嘅人一齊睇戲"Amy語氣中帶D傷感,四周嘅氣氛變得沉重起來..... 





大家又再因為呢句話而又靜在落黎.... 


良久，平靜因佢的一句説而打破"不如你走先啦，我想靜下"

 "我陪下你啦"我始終唔忍心留低佢一個

 "你走啦"佢靠係The One 個玻璃欄度再講多次，同時轉身背向我。街上嘅開心繁華跟當時我倆形成非常強烈嘅對比..... 





我選擇係呢個時間離開，"好啦，你自己小心啦"同預期一樣，Amy無比任何反應我, 我亦唔敢再刺激佢, 轉身向扶手電梯走去. 

我腳踏上扶手電梯, 就係電梯載住我往下嘅時候，我回頭望左一眼就快從我眼中消失嘅Amy， 佢保持住同一個姿勢，無變過.....係果一刻，其實我好想好想同佢講"親愛的，其實我都無變過"

 一切一切，都係由我果日遇到Amy開始.....