我參加了籃毛毛演奏會: 希望與絕望
轉眼間，我就好似被撞飛，雙腳已經離地...
夠竟我會飛去邊呢？唔通係天堂？
我而家係天堂既入境大堂到？
成為天堂既居民係唔係可以日日咬綜援？
仲有仲有天堂啲屋點分配，會唔會太多人上去而變成超級劏房？
大叔係唔係已經一早黎到享受緊？
我慢慢打開雙眼，確認我身處既位置，
原來我並無去到天堂，而係去到黃毛毛既懷中！
佢抱住我賞試突出重圍，同時都飽受毛毛佢地既攻擊，導致黃毛毛身上血跡斑斑。
佢成功抱住我跑到台下，與大嬸擦身而過，再走上觀眾席，從高處俯視毛毛佢地。
毛毛佢地都對黃毛毛突如其來既叛變黎唔切反應，所以並無追上黎。
黃毛毛既喘氣聲傳到我耳邊，同時大嬸就忿然大怒地對黃毛毛講
”黃毛毛，你係唔係想連條命都唔要！？
只要你帶佢走出哩一道，你既下場就會同黑毛毛一樣！”
我望住黃毛毛問
”邊個黑毛毛？”
黃毛毛聽到之後面色一沉，但都冇理會大嬸既警告，朝住出口奔跑。
望住黃毛毛，我記起黃毛毛要依賴一種藥先可以活下去，但係佢而家咁樣做，
豈不是同大嬸對抗？到時佢冇藥食咪即係會死？我點會咁忍心只顧自己既性命！
我賞試推開黃毛毛，但佢好似知道我既用意，死都唔放手。
我同佢講，
”黃毛毛，你放返我落黎先啦，我唔想對唔住大叔呀！”
我地已經跑到去門前，黃毛毛用佢既不正常開門法，一下踢開道門，我地成功逃脫出哩一個地方。
唔係！意想不到既事又發生啦，門後有一班飛虎隊係到埋伏，但係被黃毛毛不正常開門法攪到傷左幾件。
佢地見到黃毛毛既出現，本能反應叫佢地舉槍指住黃毛毛。
我心中此刻只有一個念頭，就係要幫大叔拯救黃毛毛。
我從黃毛毛手中掙脫，撲向黃毛毛到。
”澎”。
飛虎隊開左第一槍，究竟佢擊中既邊一個？
我望一望黃毛毛，佢身上並無任何子彈窿，咁即係話中槍既係我？
右臂肩膊位傳黎一陣劇痛，我摸一摸右臂，望住沾滿血既左手對住飛虎隊講
”係...係血呀！”
黃毛毛佢企起身想睇一睇我既情況，
而飛虎隊見到黃毛毛有所動作，又舉起衝鋒槍描準黃毛毛，佢講
”細路，離開怪物既身邊！”
我立即跑到去黃毛毛面前，想同飛虎隊講明一切狀況，但係又遲左啦...
佢地又開槍，又係打中我，今次又打中我邊一個部位？
左肩膊位噴出血霧，臉上沾上少少血液，黃毛毛見狀又想行過黎。
我今次極快咁講，以防我又中槍，
”唔好開槍住！佢係好人黎！佢唔會傷害我地！”
飛虎隊佢地聽完我一番話後，就冇再舉槍指向毛毛，而係朝住會場進發。
其中一位飛虎隊隊員走埋黎打算扶我走出體育館，但係我冇諗過要走，
因為我仲要從大嬸口中知道幫黃毛毛既方法，而且我點可以棄呀怡於不顧？
仆街啦，班飛虎隊行緊入去啦！會唔會當呀怡係怪物而殺掉呢？
我從佢地身後跪係地上，大聲講，
”我求下你地絕對唔好傷害白毛毛！佢係我朋友黎。”
企係隊尾既隊員走埋黎，搭住我膊頭，好有信心咁講
”我地並唔係黎殺毛毛，而係要制服佢地。”
”制服？你地認為做到？”
”就好似扣五十分咁容易。”
”你講乜扣五十分？仲有可唔可以放開手？”
佢一鬆開手，就前往場內，同毛毛佢地博鬥一番。
我賞試企起身再走去門外望場內既戰況，但奈何雙手就因為失去知覺用唔到力...
我諗住叫黃毛毛過黎扶我一把，但係見佢面色有少少難看，就唔再打攪佢啦。
突然會場熄哂燈，傳黎藍毛毛演奏曲，間唔中仲有幾吓槍聲。
唔得啦，我實在係太過好奇入面發生咩事，所以我沿地上爬到門口。
我反轉自己，臉部向天，賞試用腰部既肌肉坐返好個人，正當我企起身時，有個隊員撞門飛入黎。
我慘叫一聲，道門打開時擊中我頭部，我又多個地方流血啦...
點解會被毛毛打到飛起？唔通連飛虎隊都要輸比藍毛毛佢地？
趁道門打門，我又入番去從遠處觀察場內既情況，黃毛毛當然都跟我入埋黎。
場內環境黑暗，毛毛又演奏緊，到底佢地係邊我都唔知，
或者哩一個就係毛毛佢地既用意。
毛毛佢地可以透過極強既感官，知道敵方位置，
而且透個聲音擾亂對手既聽覺，做到神不知鬼不覺擊敗敵人，
所以係哩一個環境，藍毛毛佢地應該係佔上風。
”澎、澎、澎”三下槍擊所產生既火光照耀全場，數秒之間，我見到既係一群動彈不得既毛毛！？
究竟班飛虎用咩奇招令到一群戰鬥力咁高既毛毛束手無策？
又一下槍聲，我見到飛虎佢地分為好幾批，應該就係從其他入口黎到。
佢地用一個圓形陣組成一隊，但佢地並唔雖要走動，當然有部分隊伍被攻破而被毛毛打到飛上半空。
再幾下槍聲，演奏曲愈黎愈細聲，飛虎隊啲人數都大不如前，兩者都係不相伯仲。
從火光中見到，大嬸就好似面對哩一種場面都淡定過人，唔通佢都有奇招？
等等！藍毛毛由始自終都未同飛虎佢地打過都已經打成平手，如果藍毛毛都出場既話咪會...
演奏曲停下黎，唔通係毛毛成功被制服？
”媽～咪～”哩一把低沉而雄亮既聲音我認得係藍毛毛！
突然之間，飛虎好似變哂做病貓，不斷係到發出哀嚎。
”啪、啪、啪”會場既燈開番。
如我所料，毛毛大致上都被制服，只剩低藍毛毛同大嬸一行人，但係飛虎佢地都全滅了...
我仍然爬係地上，我咬一咬黃毛毛啲腳毛，叫佢哄過黎我身邊，
”哎，仆街啦，連飛虎都輸！
仲諗住佢地會成功，之後我就可以問大嬸幫你同呀怡既方法，
之後我再報仇，逼佢食哂啲調味粉，等佢都變毛毛！”
奇怪啦，點解我背後有少少呼吸聲？
當我一擰轉面，同我面對面既係藍毛毛。