【真人真事】當年中七AL，我打左成年天堂二，但我無悔！: 44-怒而撓之

未幾，靜心就黎左奇岩，見到我隻"葉"係奇岩廣場，就密葉：

「係唔係到？」

「咩事？」

靜心冇答。

我立即問開緊"樹"既阿紅：「靜心有冇搵樹？」





紅：「有呀佢問我係唔係到，我答佢乜料呀，根住佢就冇理我。」

我：「樹平時邊到係咁講野架，你咁講咪即係惹人懷疑。」

紅：「一句咋喎有冇咁勁呀？」

我發覺自己就好似岩岩犯完案，坐緊的士走佬點知見到差佬road block，係到心虛既賊仔一樣。

但係靜心冇理我地，佢已經係全頻搵緊"風之谷"既人講數。





我問大綠拎左果隻入左風之谷既分身account，然後直接登入說辯。

風之谷盟主"美國風"係盟頻責難我，問我係咪係聖者墓殺人，我答佢：

「佢地拖晒我間房d怪走，幾次都係咁，講佢又唔應，大盟大晒咩，我朋友見佢講唔聽咪扑暈佢火車頭囉，跟住佢地就打我，我還手咋！」

練功爭執係無可避免既事，以往紅樹葉既方針係大事化小，而靜心肯定係小事化大，就睇下呢個風之谷盟主點處理。

「理想世界話係你主攻先喎。」





「雖然我入盟冇耐，但係盟主你信外人都唔信自己人？佢地衰先又仆街，就等係咁講啦！」呢句說話係純粹為左唱衰理想世界，並唔係為左自辯。

結果，應靜心要求，"美國風"將「我」踢左，之後兩盟當冇事發生。

靜心真係好鐘意踢人。

過左大約半小時，我再次登入teleport大隊。用分佈各地既召喚師，穿入牆中間再用"無限遠視野"程式睇場，理想世界既練功點無所遁形，不過今次佢地佈左有保鏢。

艾爾：「保鏢又點？照殺！」

我答：「唔得，等佢地走左先。」

等多三個字，聖者墓既保鏢終於走左。

我地立即開左五個新練既分身，四隻弓手一隻巫師。五人入面又有兩個有盟，一個又係風之谷，一個係理想世界，冇錯，係佢地自己盟。





我：「ready……bu－－－」

葉一聲(扮)吹雞，五人就瞬間轉移到聖者公墓，直衝，殺！

四下扣弦既聲音，緊接就係發發發發，連續四箭射落掃緊怪既傭兵身上，秒殺，剩低一堆怪物立時暴走。理想世界既人手忙腳亂，唔知係補血好定走佬好定反抗好，亂成一團。然後艾爾一個火球，一個爆炸，"火山爆發"將眾人連同怪物一齊焚燒，再一輪發發發發，死剩種一個不留。

眾人不停地掃理想世界場。每次都掛住唔同盟徽，什至包括理想世界、紅樹葉、壬生一族既盟徽。而且每次出發既人數、職業、名、時間都唔同，根本冇任何証據可以指向我地。

但係靜心依舊，每次都走黎奇岩睇下我地係唔係到，佢係想試探下，到底我地係咪正身放係到掛網，背後就用分身殺人。而佢每次黎，我地一班人都係坐係奇岩教堂入面。

靜心忍唔住，直接問：「你地坐係到咁耐做乜？」

眾人已經夾晒口供，一係答：「關你鬼事？」





一係答佢：「討論緊聽日點打你個奇岩囉。」

每次靜心黎試探，我地總有人出聲，証明唔係掛緊網。縱使靜心依然懷疑，但佢亦只能懷疑，根本冇籍口開我地波。

翌日，星期六，理想世界已經開始派保鏢係練功點長駐。

艾爾一如既往，都係話：「有保鏢又點姐？照殺，驚佢咩。」

我：「唔得，咁樣唔夠亂唔夠仆街。我地去一齊練功。」

一到步，三個弓手保鏢黎左一件，望一望我地乜料，個保鏢正正係蒼日。

用緊分身既我問：「有冇空房剩低？」

蒼日：「有。」





於是我地八人就入左間空房扮練功。由soso負責做火車頭，拖三個空房既怪俾我地掃。蒼日就企係旁邊睇，睇我地掃左幾輪之後，好似確定左只係普通玩家，就走左。

「action。」

做火車頭既soso係走廊停一停，確保後方車卡緊貼住自己，然後火車就係走廊中間轉軌，90度直衝入理想世界既房，再立即除衫等死！一死，怪物除即暴走，三間房近三十隻怪見人就打，場面極度混亂。保鏢即刻開弓，發出"爆射箭"、"箭雨"等技能清場，但同時間我地打手們都衝左入去，第一件事就係圍攻三隻保鏢先！三隻弓手保鏢掛住清怪，邊見到我地？我地既巫師就趁亂，換上高級武器偷襲弓手，蒼日連死左都唔知咩事。保鏢們死亡同時，霸主一下"約束封印"將所有怪物定身，我地再將屠刀申向無辜既理想世界新手……

如是這，我地不停掃場，由下午三點掃到夜晚九點半。有時直接殺，有時扮係新手練功練練下走去殺，有保鏢都吹奈我地唔何。我地愈殺佢地就愈少人出黎練功，愈少人練功靜心就愈火滾，開始係論壇出文，又擇晒名勒令各盟踢人，又不停係公開頻道屌班唔合群既小盟。我地紅樹葉順佢意，踢左掛住紅樹葉盟徽用黎殺人既分身。

第二、三步已經成功左。之後，就係第四步－－半個鐘後既奇岩攻城戰。