由細到大親身經歷過既靈異事件: 《問路》第四章
劉家大宅真是他媽的有氣派，一磚一瓦一草一木都像是藝術品一樣，到底要多有錢才能住進這樣的房子呢？
我和陸進光跟著老伯伯走過別致的花園進入大宅，再經過迂迴的走廊，終於被帶到一間寬敞的客廳。
「你地坐係度等等先，我去叫老爺過黎。」老伯伯恭敬地請我們坐在舒適的沙發上，然後轉過身離開客廳。
客廳沒有太多華麗的裝飾，但每一件家具都明顯是挑選過，與整體裝潢極為配合，由此可見屋主品味之高。
不一會，劉建名便推門進來，邊走邊道：「唔好意思要你地等，岩岩係書房睇緊書。」說著便找了個位子坐了下來，正對著我們。
我認得他正是當日在殯儀館捧著遺照的中年男人，不過那天只是匆匆一瞥，今日仔細一看，才發覺他長得英氣迫人，不怒自威。他長得其實不比我高，但甫一進來，腰板挺直，步履平穩，一笑一坐毫不造作卻又令人覺得氣盛勢強，簡直就是霸氣的化身。
我心中暗自叫糟，這種人對我來說是最難對付的。不論哪種催眠也好，暗示也好，基本施展方針一定是要施術者的意志力比受術者高出很多，才能把意念強行輸入對方腦中，否則相反的話施術者便會被反催眠，上次替我施行催眠療法的心理醫生便是一個好例子。
這位劉建名，眼神銳利，剛毅的臉上刻著各種滄桑的痕跡，一看就知是我那低微的暗示法起不了作用的人。
此外，能帶著這種氣勢的人，也只有做一種職業了。剛好這個職業是我最厭惡的。
我和陸進光連忙站地來致意，我先道：「係我地要道歉先岩，果晚係大酒店咁失態，打搞曬你地，真係唔好意思。」
「其實唔怪得你地既，」劉建名揮手致意：「如果係我，係你地既處境都可能會亂諗野既。」
「咁我果晚遇到既究竟係...」陸進光急問，整件事中就他所受驚嚇最重了。
「有啲野要你地自己雙眼睇到比較易相信既，」劉建名笑著道，並把老伯伯招了過來，對他說：「老蔡，去叫大小姐過黎。」
「係既老爺。」那位叫老蔡的老管家聽罷便又轉身出去了。
「承華中學，成績好似好勁架喎。」劉建名望著我們身上的校服道：「兩位一定係尖子啦。」
「邊度係，我呢啲成日掹車邊，」我謙稱，然後指著身邊的陸進光道：「佢就勁啦，年年考得一。」
「咁勁？」劉建名笑道：「咁我有親戚第日要搵補習就搵定你架啦。係呢你叫咩名？」
「我叫陸進光，叔叔你即管搵我幫手啦，我咩科都教到。」一說到讀書，陸進光的自信瞬間再現。
「好，一定一定，」劉建名又指著我問：「咁呢位靚仔呢？」
「下？」我傻笑道：「我叫黃子軒。」
說話氣氛很溶洽，這時客廳的門打開了，一位身穿校服的少女跑了進來，叫道：「Daddy？叫我做咩丫？」
我和陸進光看清楚少女的臉，不禁大吃一驚，她正是那天晚上的林湘怡！
少女也注意到自家的客廳多出兩位男生了，待她看清楚我們，先是疑惑，然後卻驚喜地道：「大哥哥？咦？大哥哥！真係你呀？」說著便跑到陸進光身前，高興地拉著他的雙手。
然而此舉卻嚇得陸進光面無血色，叫也叫不出聲來。我看在眼裡也知道眼前的少女不可能是什麼鬼怪了，就算這世上有鬼也不可能有如此結實的鬼吧？光天化日跑來跑去還拉著一個大活人的手？我便對著劉建名問：「呢個...究竟係咩一回事？」
「湘淋，無得咁無禮貌！」劉建名喝道：「睇下你嚇親人啦，快啲番過黎。」
「哦...」少女不情願地放開了陸進光，扁著嘴回到劉建名身邊。
「等我正式介紹，」劉建名指著少女道：「呢位係我既養女，劉湘淋。」
「咁果日係殯儀館出殯既係...」我大惑不解。
聽到我的問題，劉氏父女二人都有些黯然，還是劉建名解答我道：「過世果位，係佢既孖生妹妹，林湘怡。」
哦！聽到這裡，我和陸進光頓時晃然大吾。果然，一切都只是陸進光自己嚇自己。
「湘淋，你番房先啦。」劉建名見女兒面色不好便叫他先離開。
「唔。」劉湘淋低頭應了句便要離開，只是臨走時幽幽地看了陸進光一眼才動身。
「我諗你地一定有好多疑問架啦，」劉建名待女兒離開之後才開始說話，先是遞給我倆各一張卡片，道：「我首先再自我介紹一下啦，我叫劉建名，西九龍警區總警司。」
我們接過卡片，我倒是沒有意外，劉建名能擁有如此強的霸氣，不是當差就是窮兇極惡的黑社會老大；但混黑社會的哪能這麼有錢？那唯一的可能性就是當警隊高層這「油水」十分豐厚的職業了。
不過，這也是我非常厭惡的原因。雖說我老爸是自己做錯，但畢竟是警察令我這幾年都失去父親，得自己照顧自己，我是怎樣都不會對他們生出好感。
當然，現在不是發作的好時機，我便忍著沒有說話，只是這時候，陸進光卻表現得像條狗一樣，高叫：「原來係劉Sir！失敬曬失敬曬。」
「都係工一份姐，」劉建名笑言，開始追憶道：「其實都已經成十年前既事，果時，我仲係總督察...」
（接下來的事乃劉建名自述，所有「我」都指劉）
我同我老婆結左婚成十年都無生過仔，睇過醫生話佢子宮天生好難著床，簡單黎講就係不育。
我其實無咩所謂，但係我老婆就非常想養大一個小朋友，最後，我地就決定領養一個孤兒。
我地決定係大陸既山區附近既孤兒院領養，因為果時電視岩岩播個節目，講大陸既孤兒如果無人領養，人口販子會去買佢地斬手斬腳然後踢佢地去做乞兒賺錢。
果年我攞左成個月大假，一方面同老婆遊山玩水，一方面去搵下啲孤兒院。
終於我地係廣西省既林氏孤兒院，遇到湘怡湘淋呢對孖女。（劉建名說到這裡，我暗暗記住了孤兒院的名字）
我老婆一見到佢兩個就好鍾意，一定要領養佢地番黎香港。但係，當年我只係一個總督察，財力未足以同時供養兩個細佬讀最好既學校，而且當時孤兒院規定一對夫婦一次只可以領養一個小朋友，一黎大陸一直奉行一孩政策，二黎怕佢地養多過一個照顧唔到，咁無辦法之下我地只可以簡一個去領養。
雖然佢地係孖女，但係性格就相差好遠；家姐湘淋就好乖巧好聽話，同其他小朋友相處得好好。但係阿妹湘怡就非常惡作，除左唔聽舍監話，仲成日打其他小朋友，所以，我地最後決定領養湘淋。
佢地個姓其實只係跟孤兒院個創辦人姓，湘淋跟左我地番黎之後，叫「林湘淋」都唔係太順口，就索性跟左我姓劉。
我地番左黎之後成間屋完整左好多，我同我老婆亦都越黎越恩愛。只可惜好景不常，佢係六年前就因為隱性心臟病發過左身。
之後我就當左湘淋做我唯一既精神寄託，因為我覺得，個女係老婆留底落黎，佢繼承左老婆既意志
直到兩個月之前聖誕假咁上下，湘淋話想番去孤兒院睇下，我咪帶佢去廣西行下。
番到去我發現佢個妹湘怡竟然仲係孤兒院，原來佢咁多年黎一直都無人領養，不過大左之後就越黎越生性，所以一直留係果度，幫手照顧其他孤兒。
兩姐妹成十年無見，我本來都擔心佢地會唔會有隔閡；不過可能因為孖生啦，佢地一見到就好開心，一直傾唔停。佢地直情唔想分開，湘淋就求我帶埋佢個妹番香港。
呢個時候其實我錢已經唔成問題，但係湘怡都夠十六歲，已經唔可以用領養條例帶佢番黎。而且佢一直都係無乜回讀書，大定左先黎，唔係咁易適應呢度既生活。
我唯有幫佢先申請雙程証黎玩下先，睇下佢鍾唔鍾意香港生活先再決定。
因為我既影響力，入境處果邊一個月都唔洗就批左張雙程証。所以湘怡都係度住左兩個星期。
個幾禮拜前，我帶左佢兩個去出海釣墨魚。點知湘怡竟然跌左落水，你都知而家水溫幾低，加上湘怡係山區大，點會識游水？我當時已經即刻跳落水，但到我拉佢上水，佢已經無曬呼吸...
湘淋可能因為親眼睇住細妹過身，一直大受打擊，又唔講野，又唔番學，我唯有當湘怡係親生女咁出殯，等佢無咁傷心。我雖然唔會權力大到可以隨時批個大陸人落黎住，但係批張雙程証，或者批准湘怡係香港火化，我都有能力既。
上完山之後，湘淋情況果然好左好多，講番野，又番學，之後既野，就好似你地所知咁啦。
（劉建名自述至此完結）
聽罷劉建名的話，即使我平時對警察沒多好感，也對眼前的人另眼相看；我並不是視他為一位警官，而是一位好丈夫、一位好父親。
「原來劉先生係個咁好既人...」我說話時已感到雙眼酸酸的：「聽完你既故事，我真係深受感動。」
「算得係咩...」劉建名苦笑道：「我都係想紀念一下我老婆姐。不過我真係有事想請呢位高材生幫手。」
高材生當然不是指我了。陸進光被恭維了一下，受籠若驚，連忙道：「好呀，我一定盡力。」
劉建名想了想，吸了一口氣才下定決心道：「其實我想搵你幫湘淋補習！」
「下？」陸進光這下真的被嚇倒了：「雖...雖然我係考第一，但我都係得中五咋喎。」
「無問題架，」劉建名笑道：「自從湘淋妹妹過左身，佢一直都唔多理人，尤其學校同我講，佢完全唔同其他同學有交流，quiz成績仲差左好多；你誤打誤撞令到佢相信你，咁由你同佢慢慢相處帶番佢出黎就最好啦。」
「咁...咁樣...」陸進光仍然支支吾吾，這家伙除了做試卷真的什麼也辦不到了。
「錢方面我會pay足，」劉建名以為陸進光是想錢的問題：「總之唔會比出面果啲補習天王少。」
「去馬啦仲諗！」我拍了拍陸進光的背，然後替他答應劉建名道：「我呢個同學就係成日都反應遲鈍，總之佢而家廿四小時stand by架啦。」
「哈哈咁就最好。」
就這樣，靈異事件最後演變成找兼職活動，自此之後，陸進光逢星期一、三、五放學都會到劉宅給湘淋上補習班。
兩星期過去，不知是否和女孩子相處多了，平日陸進光心裡的高牆放下了不少，尤其對我更是友善了許多。只是Tommy整天在埋怨我有好康的事都不留給他，把這樣一個女孩子送給那書蟲。
事情就這樣完美地解決了，至少我當時是這樣想著。