[真人真事]那些年錯過的愛情: 中一０２

過左幾日之後，中學既補習班上完，跟住落黎既日子唔洗再返學校。換言之，依家就係暑假既開始。暑假無咩特別既計劃，只係留係屋企打下機，日日出去打下波又一日。有一日暑假既下午，啊君喊住咁打黎搵我。 

啊君：「傑...我老豆唔比我轉校呀...」 
我：「點解呀？」 
啊君：「佢話呢間中學校風好好，唔想轉黎轉去咁麻煩，又話你個間好差...」 
我：「咁算啦，唔好勉強啦。我地大家都習慣下新既學校生活啦...」 
啊君：「我地第日放學仲會唔會出黎見？」 
我：「緊係會啦，你唔好再諗負面野啦」 

　　講完呢句，再傾多一陣就同啊君收左線。係呢一日之後，暑假呢段日子我地大家都冇咩特別野發生。啊靜亦無上個MSN，時間耐左反而令我對佢更加牽掛，但係我都搵佢唔到... 





　　轉眼間，聽日就係開學日。我整理好校服，預備聽日既校園生活。

　　呢一日，我好早就返到呢間學校。集隊既時候，搵到自己班之後就求其搵個位企。上到班房之後，老師就例牌求其派啲野比我地，係呢段無聊既時間，就有兩個男仔主動撩我傾計，同我解下悶。 

　　呢兩個同學其中一個叫啊神，留住一把又長又厚既頭髮，樣貌好成熟，身高正正常常，後尾先知佢係出面有跟大佬。所以班上面既同學開頭都怕左佢。第二個叫啊樂，佢同啊神一樣留住一把又長又厚既頭髮，生得高高大大，黑黑實實，但係把聲幾似女人，同基佬宗差唔多。而且佢女人聲之外又比同年紀既人高大好多，大家見到佢，同見到啊神既感覺都係一樣咁怕佢。但對於內向既我黎講，只要有朋友就得，所以當時我就同啊神同啊樂做左朋友。 

　　小息個陣，啊神就提議不如落籃球場行下，解下悶。於是，我同啊樂就跟住啊神落去行陣。 

啊神：「覺唔覺班上面好多人怕我地？」 




啊樂：「係囉，好似生得長頭髮就係壞人咁！」 

　　聽下聽下啊樂講野真係愈黎愈似基佬宗，佢地兩個都係傾緊係班房入面既事。我就係到望下籃球場有咩人打籃球。點知一望過去，見到有幾條友，腳控住個波，係到對住我地三個笑。 

我：「啊神，好似有啲唔對路，睇下個面」 

　　啊神望過去之後，講左句　「屌，快啲走，有啲唔對路」　 

　　當我地諗住慢慢行返入操場個陣，就聽到係籃球場個幾個人講　「省尻佢，省尻佢」　 





　　我望過去，已經見到有條友準備起緊腳，踢個波埋黎。 

我：「走開呀，啊樂！」我推開佢。啊樂比我推左一推，向前行左幾步。 

　　「砰」一聲巨響，個足球已經飛到去岩岩啊樂企係到果個位，撞向牆到。我亦都睇到牆比個足球打中之後，有個又圓又大既黑印係到。 

　　「原來暑假見到呢啲一個個又圓又黑既印就係咁黎」 

　　個足球打唔中左我地之後，我地三個就以為佢地無意。果班貌似高年級既人叫我地踢返個波過去。　 

「對唔住呀細路，無心架，踢返個波過黎丫唔該！」

　　啊神踢返個波比佢之後，我地三個就坐係櫈到繼續傾計。傾傾下，又望到班人對住我地笑。再等多一陣，見到佢地又對住我地起腳，啊神就拉住我同啊樂跑走左。 

　返到課室之後，啊神就同我地兩個講呢間學校既野。原來呢間學校既高年級大部分人都係黑社會，係學校唔可以得罪。仲同我地講中一係比人恰既時候，只要捱得個呢年，就咩都唔洗怕。 





　　諗返岩岩個足球撞埋牆到「砰」左一聲，我係到諗，如果比個波省中咪唔洗生存？ 

　　係呢間黑暗既學校，究竟我仲有無命捱得過呢一年...