一個人,追一個女神: 第六章 信任
「你準備好你既第一步未?」悲鳴一路行返學校,個腦一邊思考。「唔通佢幫我溝女?」呢個係悲鳴最終肯定既諗法!但係,佢點幫呢?佢地兩個先識得半個學期,唔好話傾計,打個招呼都唔會。雖然其他人話佢有公主病,但係同佢坐左半年既悲鳴就唔多覺。人地問佢野都會有禮貌咁答返人地,又唔似其他患者咁無禮貌。悲鳴好肯定,如果佢有公主病既話,佢一定有雙重人格!
返到學校,悲鳴好意外。意外既係,佢唔係第二個返到課室,而係第三個,除左食緊野既言已,仲有吹緊風扇既霜心!言已突然起身,行左出課室,課室得返悲鳴同霜心兩個人。「你條廢柴終於返黎啦?要我等咁耐,要加學費喎!」霜心打破眼前既疆區,主動同悲鳴講野。「加咩學費?你教到我咩?」悲鳴相信霜心幫唔到自己,因為霜心同女神一D都唔熟。「你理得我!仲之我一定幫到你!」霜心好肯定咁講:「如果唔係我去做公廁!」,悲鳴心諗「我點知你而家係唔係一個公廁?」,但佢用苦笑黎表示"相信",之後就打開locker,搵上堂既野出黎。
食飯時間,女神去左悲鳴課室搵佢既朋友,文。但悲鳴根本唔夠膽行過去搭嗲,佢突然諗起霜心話會幫自己,佢就行左過去搵霜心,想做主動既一方。「喂你做咩仲喺度?過去啦!」點知都係由霜心開口先,「你唔係幫我咩?點幫?」悲鳴細細聲咁問,「頂你自己過去傾下先啦!你唔係淆呀?」霜心講完,悲鳴塊面即刻紅左,因為佢真係淆低!霜心突然企起身,同悲鳴打眼色,就好似話「睇我表現啦!」,之後行左過女神嗰邊傾計。仲好似傾得好開心咁,令悲鳴不禁自卑「點解人地一行過去就好似好多野傾咁,但係我同女神識左咁多年就咁少野講?」
自修時間,悲鳴想伏低訓覺,但係比霜心制止左!「嗱,我收左好多料,你想唔想知先?」霜心自信滿滿咁同悲鳴講,「有野就講啦!」悲鳴已經對霜心亳無耐性,因為霜心成日吊佢癮,好辛苦!「嗱,一排朱古力!而家要!」霜心細聲咁講。悲鳴心諗「第二人格出左黎?仲要即刻要咁惡?」,但係佢咁有自信,姐係好多野益自己啦!「放學先得唔得?」悲鳴回答佢,「得,放學比就多多都唔講!而家比就多多都講比你知!你自己諗!」霜心講完就攞功課做,唔理悲鳴。悲鳴察覺到佢既第二人格出左黎,根據病患者既行為,唔順佢意就會有好大既惡果,輕則皮肉之苦,重則家破人亡,萬萬不可呀!
「阿sir,我想去廁所!」悲鳴起身問,班上面有唔少人都喺度偷笑,悲鳴亦好無奈。「去啦!」睇堂阿sir同佢講。之後悲鳴就行出課室,行落小食部。「阿姨!一排朱古力!」悲鳴未行度櫃枱就講,「同學,上堂時間可以買野食咩?」個阿姨好似係新黎既,唔識規矩咁。「阿姨,一百蚊唔洗找!」悲鳴豪氣盡顯,為左唔比老師見到同埋太遲返課室,佢出絕招!「吓,同學,一排朱古力5蚊咋,你咁樣我好難交代架!」阿姨好無辜咁講。「一係咁,我要十排朱古力,你照收一百蚊,五十蚊入落機,五十蚊自己袋,好無?阿姨,有錢派你去唔去汁先?」悲鳴利用人貪心既一面說服阿姨:「最緊要快!」,阿姨聽到有錢收緊係要啦!悲鳴攞住十排朱古力上課室,每個袋放兩排,左手攞兩排,用右手開門,避免被阿sir見到,但係個阿sir完全無望過佢一眼。搞到佢做咁多野都好無謂咁。
「朱古力呀!」悲鳴將一排朱古力放係霜心枱上,霜心先至見到佢返左課室,「嘩,你真係去買架?仲有咁多排。不如我講一樣比你知,你比一排我啦!」霜心似乎好識打如意算盤。悲鳴邊有得say no吖,佢只可以答應霜心咁霸道既要求。
「嗱,佢鍾意寶藍色!」霜心同好專心既悲鳴講,悲鳴聽完用紙記低,「之後呢?」「朱古力先!唔係唔講!」霜心好高傲咁講,悲鳴比左一排朱古力佢,「佢好鍾意小動物!」霜心一邊食朱古力一邊講,悲鳴又記喺張紙度,「之後呢?」「朱!古!力!」霜心將三隻字拉長黎講,悲鳴索性比哂剩低既九排霜心,等佢一次過講哂。「佢鍾意去旅行!」「佢好朋友係小文!」「佢鐘意食糖!」「佢下個星期二M到!」「佢好憎頭盔佬!」「佢唔鐘意比人整個頭!」「佢有做義工!」「最後佢....」霜心突然唔再講落去,好似有野唔想比悲鳴知咁。悲鳴寫完頭九個之後望住霜心「第十呢?」,「唔講得唔得?」霜心真係隱瞞緊D野,「唔重要可以唔講,比返排朱古力我!但係重要既就一定要講!」悲鳴講完先發現霜心已經食哂十排朱古力,「你講咩話?」霜心好似太專心食朱古力無聽悲鳴講野。「講埋落去啦!」悲鳴開始唔耐煩,「你真係想知?」「係!」「聽完...唔好咁激動!」「講啦!」「佢.......已經有鐘意既人!」。
悲鳴聽完之後,雙眼不禁落下男兒淚!「唔好咁啦,可能係你呢?佢上次有送野比你食喎!」「如果唔係我呢?」呢一刻悲鳴真係好想喊。「唔係你既話,你都可以去爭呀,你表現得好就可以得到佢歡心架啦!唔好咁快放棄住!」霜心講完呢一句,悲鳴望住佢講:「我要點做呀?」,「我幫你啦!」霜心胸有成竹咁講。悲鳴望一望銀包:「我無錢嗱...」,「唔緊要,照幫!」霜心拍一拍佢膊頭:「如果我既資料加上你既努力,一定媾到佢既!」悲鳴只可以苦笑住咁寫埋第十項「佢無鐘意既人」落去!佢只可以信任霜心,同自己!