《相交的平行線》: 第十一話
「對大多數的女人，『愛』的意思就是『被愛』。」──談女人
聽完我的獨白，妳沒有再掙扎，漸漸平復下來。
「所以你今朝已經知啦？」妳用略帶浮腫的雙眼，著視著我問。
「係呀，我今朝咪話妳知我已經係出街囉，其實係高佬同呀喬約左我，然後呀喬將妳嘅事講俾我知。」
「睇黎你嘅朋友真係好關心你呀。」妳輕輕靠在我身上道。
「係掛。」我不置可否的道。
「但係你知道左之後，你唔嬲我咩？我呃緊你喎，你仲肯同我出街？」
「可能妳尋晚同我講完之後，我已經有心理準備，準備好接受妳係外星人嘅事實。而且我想有人講我知，我唔想自己推論出黎。所以佢地今朝講完之後，我確實如釋重負，因為至少唔係妳有問題。至於我有冇嬲妳，當時我並冇諗太多，我只係知道，我想見妳。」
「你就外星人，多謝你呀，白痴傻瓜文青。」
「所以你係宿營第二晚好嬲咁傾電話，對面個個就係佢啦喎？」我問道。
「嗯，因為我當時同佢講分手，佢即刻打黎鬧我，同我講『你冇病呀』同埋要脅我，話我會俾人唱係靠佢上位。而我就係好怕人地嘅閒言閒語，所以冇同佢分手。但短短識左你兩日，我已經感覺到愛。所以我決定要面對佢！」
「諗清楚未呀？」我的嘴角輕輕上揚道。
「嗯。」妳眼中的堅定，仿如磐石般不可動搖。
「我今朝已經同佢講清講楚，因為我想係同你約會之前，釐清我同佢之間嘅關係。」
我看著妳，竟能夠為我做到如斯地步，我很高興有妳這個女朋友。我把頭慢慢靠近，妳閉上了眼，我合上雙目，然後吻了下去。
我決定保護妳，為妳去反擊。
所謂工欲善其事，必先利其器，所以……
「我又肚餓啦。」
「嘻嘻，我都有啲。」
「我約左高佬佢地呀，佢地想知我地會唔會有事。」
「其實佢地都幾八卦喎。」妳笑說。
「哈哈，佢地都係關心我地姐。」
「咁問埋佢地一唔一齊食飯啦。」
「好。」
如是者，我們便相約食晚飯。眼見時候不早，我們便去找他們了。正當我牽著淇淇向他們走去時，他們卻情深款款的對望著，然後上演了一齣街頭激吻戲。他們親了接近整分鐘，最後高佬更抱著呀喬壓下去，此刻，呀喬便輕輕勾起腿。整個畫面，就像多年前的一張相－V-J Day in Time Square。
看見他們如此敬業，我們停著了腳步，在旁邊偷偷的看著，還拿出了手機拍了幾張，當是我們勝利的紀念。
「女仔係咪都好鍾意係街邊做啲咁尷尬嘅嘢嫁？」我不解道。
「係又唔係啦，因為女仔都會覺得好幸福，但係佢地個情況就有啲過唔左火位。」
眼見他們還不消停，我們便走了上去。
「小喬！」妳喊道。
「咦？淇淇，你地冇事啦？」呀喬看著我倆相牽的手問道。
「嗯。」
「呢位先生同小姐，可唔可以唔好當街當巷咁激戰呢？」我半瞇著眼道。
「情趣呢啲野你識條鐵咩。」高佬自豪的答道。
「係囉，學多啲氹下淇淇開心啦。」
「唔駛啦，佢已經對我好好啦。」 妳勉著我的手臂靠著我。
「細佬，你真係有啲計，咁快已經馴服左淇淇啦喎。」
我們進入了餐廳後，兩個女生就拿著餐牌點餐。而高佬則跟我低聲交談。
「喂，兄弟，真咪真係冇事啦？」
「可以咁講啦。」
「咁willy個邊你諗住點？佢實會周圍唱淇淇嫁喎。」
「咁就要你幫手啦。」
「係？」
「嗯，我雖要知道所有關於佢嘅野，愈詳細愈好。」
「你真係當場仗咁打喎。」
「冇錯呀，女神防衛大作戰。仲有，盡量傳個消息出去，關於……。」
「明白。得啦，你要人有人呀。一定唔會少得過童子軍。」
「哈，果然係籃球隊隊長。」
愉快的吃完這頓飯，我便送淇淇回去她家樓下了。
「聽日我地去邊呀。」 妳問。
「冇所謂呀，但我想做下past paper，我地都就考試嫁啦。」
「咁我地一齊做啦。」
「好，聽日叫妳起身啦。」
「你記住呀，如果唔係我打俾auntie 嫁。」妳嗔笑著。
「係係。」
翌曰，妳便一大早叫醒我。
「喂。」 我含糊的喊道。
「起身呀懶瞓豬。」
「好攰呀，5分鐘，俾我瞓多5分鐘。」
「你一個鍾頭前已經話5分鐘啦喎。」
「而家放假呀，晏少少唔緊要啦。」
「唔得呀，再唔起身我自己去溫嫁啦。」
「係係，我出嚟啦。」
「咁café 等啦。」
我隨手拿起昨晚執拾好的背包，便出門了。
到達相約的咖啡店，幸好人不多，我稍稍一看，就找到妳了。
「早晨呀。」
「懶瞓豬，又話叫我起身，點知調轉晒，哼。」
「嘻嘻，尋晚執 past paper 執夜左呀嘛。」
「真係呀，下次唔準呀。」
「嗯，好好。」
「咁你帶左咩科呀？」
「除左中英之外，我讀嘅純理科同妳讀嘅BAFS 同Econ都有。」
「幫我帶埋咁好？點解你會有嘅？」
「哈，我問人攞嘅。」
「其實我都有帶你讀個啲。」
「哈哈，都唔知話我地有默契好定話冇好。」我不禁道。
然後我們便開始各自的征戰，因為我是主要攻讀數學的關係，妳有時候會也問我一些與數學有關的經濟理論。
「喂，你睇下呢到，呢個elasticity，係咩意思呀？」
「噢，elasticity 係講緊隨著價錢變動，而貨物相對的數量變動的指數。也即是話我把呢杯咖啡減10%嘅價錢，我會賣多左10%嘅貨，所以指彈性指數係-1啦。而我地知道產品嘅彈性指數，就能夠推論出貨品嘅銷售量。」我解釋道。
「嘻，我問得你又真係識嫁喎，點解你一個純數人會識呢啲嘅？」
「之前睇書睇過嘛。」
「咁你唔揀Econ? 揀左咪會一齊讀囉。」
「當時冇諗咁多，只係揀左科數學同物理化學咋。」
「咁既然你識嘅話，我之後會問你問得更多嫁啦。」
「樂意之至。」
而我地離開嘅時候，又是那個人坐在角位看著我們。是我的錯覺，還是……只能在心中做好最壞打算了。
就係咁，我地就已經拍左接近一個月拖。呢一個月不斷咁一齊溫書，溫完書就行陣街，進而到海旁看日落。你說很喜歡海旁的日落，寧靜的襯托出晚霞的美麗，浪漫得很。之後就食飯，然後就便送妳翻屋企。我地就好似拍左好耐拖嘅情侶咁，冇所謂嘅激情，但係每天都過得幸福快樂。
開學的日子，天氣還是很熱。明明已經踏入秋季，但仍像夏天一樣，熱得過份。我踏出了屋苑，走到地鐵站，等著我的公主。
「等左好耐啦？」
「係呀，搞到南瓜車都走埋。」
「下，咁慘慘豬呀。」
「係呀，得番隻白馬，賞面嗎？」我拍一拍身上的校服。
「你唔係話自己係王子嘛。」妳哭笑不得的道。
「噢唔係，只係話接公主要莊重啲姐。」
「口花花。」妳把視線從我身上移開，不再看我。
我們牽著手走到學校門口，妳仍然擔心著這一刻的來臨，我緊緊握著妳的手告訴妳「沒事的，放心吧」。
妳問我怎麼知道，我說笑答妳「希望在今天呀嘛。」。
我們便齊齊踏進校門。我如常的回到我的班房，看到熟悉的面孔及身影，我便走向他們。
「yo，早晨。」 我向高佬及肥仔說。
「喂呀單，你要做嘅搞掂哂啦。但咁樣做真係好咩？」高佬跟我道。
「冇計啦，為免佢受輿論壓力，咁係最容易嫁啦。」
「愛情真係偉大。」高佬嘆息道。
「咩呀？你地講緊咩呀？」 肥仔問。
「冇，呀單玩野姐……」高佬將事情一五一十告訴了肥仔。
「下，你咁都得呀？」肥仔目瞪口呆的看著我。
「唔係可以點呀？打佢一獲？我又唔打得。」我聳了聳肩膀。
「咁又係。」肥仔答。
「喂，你要嘅野同埋佢嘅資訊。」
我拿著高佬遞給我的iPad，裡面有多張相片，還有一個word檔。
「掂啦，有呢啲真係唔駛驚佢，而家只要等就得啦。」我滿意的道。
「我send 晒俾你啦。」
「嘩，你地可以做到呢個地步，會唔會太強呢？」細仔看了看手中的資料，我不禁問道。
「傻啦呀單，呢啲只係小兒科。」
此時，妳卻跑到我的班房裡。
「呀單，點…點解……」妳上氣不接下氣的問。
「你抖順條氣先再講啦。」
「佢地好多人話緊你駛橫手，係willy身邊搶左我呀。」
此時很多人亦注視著我們四個，然後便輕聲細說，我相信他們正在談論我們。
「我知呀。」我說。
「點解會咁嘅？我好想知呀。」
等陣，乜劇情咁似千反田爱瑠問奉太朗嘅？但可惜呀，冰菓都爛左尾……
「咁你要問高佬做咩散播啲搖言啦。」
「因為你條仔唔想人地話你係公廁，所以我同呀喬就運用人追劇嘅心態，周圍同人講你條仔駛橫手，打抵左條友。」高佬沒好氣的解釋道。
「呀單你都幾好野嫁喎，連5A willy條女都搶到，我開始欣賞你。條友咁黑人憎，今次抵佢死。」班中一個路人的角色走過來說道。
果然，群眾是愚昧的。
「多謝你呀，呀單。」