《完美犯罪手冊》 - 為了上進而失去一切的故事: 《因果》
唔經唔覺，話咁快又過左一年。
原來時間真係唔等人，尤其唔洗返工既時間過得特別快。
今年係2014年既六月，記得上年差唔多呢個時候，我仲係打緊份工，
辛辛苦苦服務左間公司咁多年，到最後比人調左去發配邊彊。
不過，以我既小聰明都賺返唔少幫補下。
至於「果種事」當然唔可以長久做啦，而家先發覺，以為當初自己好醒，好有雄心壯志都好，
犯法既事，即使係完美犯罪都好，當你重複咁做，每一次既風險就會不斷上升。
呢個係定律黎。
所以，我係２月拎埋花紅雙糧後，就已經辭職唔做。
由２月到而家，我已經hea左幾個月。
日日係屋企漫無目的，有時就去蒲下，有時又去旅行咁…終於幾個月之後，
我賺果十幾萬，連同雙糧花紅，真係轉眼間就洗哂。
我先發覺…洗錢原來真係好快。
屌，我係咪講緊廢話？
「搵錢難，洗錢快」呢個道理我諗好多人都明白。
但對於我黎講，洗錢快，但搵錢…更快。
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
「唔…唔該啊小姐…」
我打扮成一個中年老人，戴住一副老花眼鏡，假髮，頭頂一頂扁帽，身穿老人棉襖，坐住輪椅去到一間珠寶金行內。
『係，先生請問有咩幫到你…？』
「啊…小姐…我想知今日金價幾錢啊…？」
『今日一兩13,880，一克371蚊。』
「哦…咁咁算低定高呀…？」我把聲壓到低沈且沙啞。
『算一般啦，今年內算低架喇，不過遲ｄ一定升返既。』
「點解啊…？」
『黃金保值嘛，經濟如果差既話，黃金好快就升值，先生有冇興趣入黎揀下？』
「哦…好…」
然後，有個年紀同我相若既男Sales推我入店鋪內，果然細心。
我去到一個放金飾既櫃位，而果個男仔就繼續幫我。
『先生，請問有冇揀岩邊款呢？或者係咩場合用既？』
「哦…其實係我老婆想賣ｄ金架…因為就黎嫁女…想換幾對龍鳳鐲咁…」
我將我既重點講出黎。
『好既，咁請問你有冇帶黎？』
「有。」
語畢，我就將一袋裝滿金器既Armani紙袋放上台上。
『係…麻煩呢邊，幫你秤一秤重。』
「好…唔該你…」
佢幫我拎住袋金，我就推住輪椅過去，唔講唔覺，原來輪椅真係幾難控制。
『係，先生，睇返個磅呢，呢度加埋重量係八十兩九錢二分七既。』
八十兩九錢二分七？屌，即係幾錢？不過，我都做足功課。
但當我想開口之時。
『咁睇返先…』個男sales拎出一個十分精細既放大鏡：『呢ｄ金器係周ｘ福買既？』
「係啊……」
『咁我地會用九成去收返既。』
「哦…咁即係幾錢呀？」
『我計一次比先生你睇先：今日飾金出門就係13,880，即係我地賣金比客人既價錢，咁我地收金既話，今日我地係每一兩收：12,240既。』
「哦…」
『拿，咁先生你岩岩ｄ金既重量呢，就係80.927兩，咁乘返九成，即係72.835兩，有冇問題？』
「你不如…直接答我幾錢仲好啦…」
我表面好似好唔耐煩咁，但心底都非常清楚佢講緊乜。
然後，佢手指飛快咁係計數機上禁來禁去，最終得出一組數字。
佢將計算機轉過黎面向我。
［891,501］
我見到個數字托一托副眼鏡，靠近睇左一眼後，繼續保持冷靜。
「即係…89萬幾係咪？」
『冇錯。』
「係…港幣呀可？」
『係港幣呀先生。』
「哦…咁幫我賣左佢啦。」
『好，咁先生請你稍等，我地巡例都要燒驗一下既，因為可能用耐左會有ｄ雜質影響左個重量，不過多數都唔會既，麻煩先生你等等，同埋我地同事會係金庫拎錢出黎比先生你。』
「哦…咁等幾耐到…？」
『好快姐，大概十分鐘。』
咁快？！
可能大家唔知果度有幾多件金器，以每隻龍鳳鐲二兩黎計，果度足足有四十隻左右！
就算要夾硬戴哂上手都戴唔哂！你都咪話唔誇張。
正常黎講我賣咁多應該好可疑，但我專登揀左今日落手，除左係遇到果個師奶之外，
仲因為今日係金價比較高既日子。
金行為左應付一ｄ黎賣金器既客人，都會準備大量金錢係倉內。
所以，我既行為對佢地黎講已經係見怪不怪。
我只係比普通人多少少姐。
『係，先生，久等喇。』
「得啦？」
『嗯，麻煩呢邊。』男sales示意我去一個較偏僻既角落。
「好…唔該…」
然後，男sales從收銀處拎出一張單，以及一大疊銀紙。
至於八百九十一張一千蚊紙有幾多呢？大家可以幻想一下「巨無霸漢堡包既厚度」。
p.s：係海報入面果個size，唔係壓到扁哂果個大細。
『先生我用數鈔機同你再confirm一下。』
「好。」
由於個位置較角落，數錢既過程都唔係咁多人留意到。
不過身邊有ｄ強國師奶，都係度竊竊私語。
唔知係咪已經習慣左，加上完全唔覺得有咩好驚，我個心真係當左自己係一個客人咁。
比著以前？我一定又驚人望又驚人懷疑…話唔定我係呢方面真係幾有天份。
我呢邊就大概九十萬，我諗阿Dee果邊應該只有幾萬至十萬蚊到…
黎緊我仲有一個問題：我應該點處理ｄ錢。
如果你立即存入銀行，就等如將你既犯罪證據放係銀行等人去查一樣。
如果你放係屋企，都係一樣。
所以，我需要一個將呢ｄ錢洗乾淨既方法。
冇錯，又係去澳門。
只要袋住ｄ錢，以九萬一次咁去換籌碼，一間賭場換三次，然後將二十七萬籌碼一次過換做支票。
如是者分開四間賭場做，咁樣，果百幾萬就可以變返乾淨！
點解係九萬？因為賭場會將十萬以上既兌換做紀錄，以便將來查證。
所以，九萬以下既一律唔會紀錄。
當然係賭場緊係要扮下賭錢架啦，坐低係賭台放ｄ籌碼出黎扮賭錢，再食下賭場ｄ小食，hea一陣就起身是常識吧？
到時我拎住兩張支票返香港，再等一個月，甚至更耐既時間先再入，就算查到我有大額現金存入都吹我唔脹。
我同阿Dee呢次既合作，最大機會出事既，就係我碌信用卡果時。
以我易左容黎計算既話…加上輪椅，仲有裝束黎講，可以話100%捉唔到我。
就算比閉路電視影到又點？
樣貌？身高？打扮？
通緝我？就憑果班垃圾警察？佢地得閒去打示威者都唔得閒去查呢ｄ事喇。
加上所有道具我都會銷毀哂佢，犯案時穿著既衣物都一定會銷毀。
就算係名牌西裝都係咁話。
我就扮老人，阿Dee就外國返黎既ABC。
因為阿Dee有本錢，佢英文好到同鬼佬一樣，加埋係蘭桂芳訓練出黎既美國accent，
我諗佢自己都估唔到，明明用黎扮abc溝女既招數，竟然會有用得到既一日。
加上一身armani西裝既光鮮打扮，棱角分明既輪廓…真係聞者出汁聽者流水。
我拎住袋錢，行出商場打電話。
嘟…嘟……嘟……
冇人聽既？
咁即係話佢仲做緊野，唯有wtsapp佢。
「阿Dee，一陣先係街鋪買過套casual ｄ既衫，然後搭巴士離開你個地點，最好遠少少啦。再係巴士上換左佢，最好gel埋頭，小心閉路影到，然後分開幾個位置掉左套armani，之後搭公共交通工具返屋企，今晚九點老地方見。」
『OK。』
咁樣做應該冇問題…首先我以警察角度去調查的話，
第一，個師奶大概已經打左比佢老公，話比佢老公知唔見電話。然後個師奶仍未知情，佢老公就會打電話去CUT信用卡，到時就會發現比人碌左一百幾萬，跟住個師奶就會去報警。
第二，警察受理後，會同個師奶落口供，再講述事發既經過，再講返晏晝被偷銀包一事。再查來查去，check超市閉路，但畫面被死角擋住左，之後會Check返下午個紀錄，但因為個師奶當時唔追究，而且證明唔到係阿Dee偷野，加上表面上阿Dee係冤枉，所以充其量只會搵阿Dee協助調查。
第三，然後警察就會將檔案排期，呢類盜竊最快都要一至兩星期，甚至去到半年都有機會，不過因為牽涉既金額唔細，應該會加快調查，然後再請阿Dee去。不過要搵到阿Dee應該都要一段時間。當搵到阿dee就會查佢銀行戶口，可惜唔會有發現，問返佢果幾日做過ｄ咩等等。而阿dee只需要求其話係屋企就搞掂。因為佢果日咩認識佢既人都唔會見，除左我。
第四，警察已經陷入去阿Dee呢個死胡同，然後就會從碌卡地點開始著手。地點係周ｘ福，而碌卡果個人係一個年過七十既老人家（即係我），坐輪椅，講廣東話，無法判斷身高等等，不過查到去呢一步至少都過左一個月，就算搵返cctv都要果個sales「記得」先可以。
第五，警方然後會問商場拎cctv，甚至拎附近大廈既天眼去搜集罪證，不過可惜，仍然係一無所獲。原因係我離開店後上左巴士，當然，我架輪椅冇帶上車當場掉左。上車後，警方會不斷追蹤天眼，去留意果架巴士車牌，睇下去到邊個站會有個阿伯打扮既人會落車。而我，當然係車上就換左套衫。
第六，去到呢一步警方要蒐集超過幾十條街道既天眼影帶，再加無數個商場既閉路電視，仲要有Ｄ巴士站落客地點係天眼影唔到既位置，警察搵來搵去都唔會搵到果個上左巴士既七十歲阿伯係邊度落車。由於巴士上係冇閉路電視，因為咁，巴士就形成左個無人知道既密閉空間。加上我係坐上層，而且人咁多，落車時司機都唔會見到。
第七，往下都調查失敗，去到呢度相信已經查左近半年，就會往前推敲，當然，唔排除警方會一開始就查超市前既事。我同阿Dee一如以往都係分開入超市，而我就推住手推車購物，阿Dee就只係閒逛。我同阿Dee基本上係冇接觸，只係大家都係死角位停過一下（飲品區）。不過閉路電視係絕對拍唔到，就算拍到都只會係果個七十歲老翁。
而貫穿整件事既老翁，就會係巴士上無聲無色咁消失。
以上既猜測，係基於警察成立左專案小組極力去查證先會有可能發生既結果。
但呢類野多數都係去到第三、第四步就Close File。
所以，香港有九成人都對警察冇咩期望。
亦係造就左咁多強國人黎香港「搵食」既主要原因。
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
尖沙咀一茶餐廳內。
『喂！死仔。』
「Yo…咁準時呀？」
『屌，冇野做丫嘛。』
「ｄ糧呢？」
『係度。』阿dee拎出一個信封：『你果ｄ呢？』
「廢話，梗係收埋左喇。」
『咁…照舊去澳門搞？』
「嗯…不過過幾個月，等風聲冇咁緊先。」
『得啦，信得過你。』
「喂…講呢ｄ…咁耐冇見，估唔到我地仲夾到。」
『都唔係好耐之嘛？自從上次澳門果單…都係半年左右。』
「係…我都冇做啦。」
『咁你而家做咩？』
「我呀？冇啊…咪係屋企hea下，享受下生活，多左返屋企照顧下老母咁。」
『哦……』
「咁你呢？阿dee，你唔可以好似我咁架。」
『超…唔洗你講我都知啦…』
「咁你而家有冇返工？」
『有啊……果排冇野做…咪聽老豆講去考左個牌囉。』
「考咩牌？」
『妖，之前咪話保安牌囉…多一樣野裝備自己又冇壞既…』
「但…保安搵咁少…」
『唉，我老豆叫我入去做…佢話介紹新人有５千蚊喎…叫我做三個月就走都冇問題咁話。』
「呢ｄ小便宜都好貪…」
『點似得沁哥你丫…？』
「喂，哥前哥後三分險。」
『不過我入左職差唔多半年…發覺都幾好做既…』
「有咩要做架？同埋你返咩公司？做咩位？」
『我老豆介紹我返解款…係就係辛苦，而且仲係比返sales辛苦好多。』
「解款員？」
『嗯，你唔見我大隻左架咩？』
「頂，你不嬲都大隻架啦！」
『不過人工就少左ｄ…我諗我都好快唔做做返sales仲好。』
「幾錢一個月？」
『新入職12,000囉…而家就13,400左右，一星期返六日，每日九個鐘，成日都有OT，不過我做得快手就少Ｄ。』
「嘩？！咁一個月咪得四日假？！」
『係啊……』
「仆你個街，我地之前一個月九日，每日都係八個鐘咋喎。」
『所以阿沁你一定做唔到。』
「我都唔會做啦…不過有咩要做？係咪拎住支槍果Ｄ？」
『都會既…我地一轉車就有四個人，一個司機，一個拎槍，兩個拎錢箱。』
「哦，我記得以前公司都會有呢Ｄ人黎…成日去帳房拎Ｄ現金架嘛？」
『係呀，不過我地以前公司得雞碎咁多。』
忽然，我靈機一觸。
「咁…你地會唔會去幫銀行拎錢？」
『會呀，經常添啦。』阿Dee猶豫地望左我一眼：『你…想點…？』
「一次大概會押運幾多錢到…？」
『唔定架喎…平時都係幾千萬到，如果有ｄ特別事，好似分行開張，或者係過年，印新銀紙等等，呢類日子會運多ｄ囉…』
「有幾多？！」我不斷追問。
『幾億到幾十億不等……』
「幾十億……」
『喂…阿沁…你唔係想………』
「係。」
『……………』
真正既機會終於來到。