《完美犯罪手冊》 - 為了上進而失去一切的故事: 《同情》
老實講，
我唔係情聖，亦都唔係Ｄ咩夜場溝女既高手。
僅有既愛情經歷，就只係Hyuna一段咁大把…所以要我即時將眼前呢個女仔把到手，
絕對唔係一件容易既事；至少，我根本冇咁大把握先。
『Sorry啊…阿沁…我去一去洗手間先…』
「嗯，好，我等你。」
Athena尷尬地一邊掃走條裙上d水跡，另一邊往廁所既方向步去。
咁都好，係佢去洗手間整理既呢段期間，我有足夠時間可以諗下有咩對策。
Athena雖然係一個事業型女性，但以佢既年齡，接觸社會經驗都一定唔會多。
見佢返工時刻意隱藏真實既自己，就知道佢根本唔係ｄ咩女強人。
佢，只係扮出黎。
老實講，我係社會打滾左都有六、七年，轉工，調鋪等等都經歷過唔少次。
就以我岩岩調果間新鋪既女經理Zoe為例；
佢同athena都係擁有高學歷，但處事既方式完全唔一樣。
Zoe經理只係會對直屬既主管嚴厲，而對普通既員工反而係非常親切，亦受到大家既專重。
相反athena，岩岩讀完書就出黎做野，經驗尚淺，一心只係知道自己同其他人唔同，佢怕被其他員工睇唔起，所以就強迫自己擺起個款，令到大部份既員工都唔臣服於佢。
呢ｄ，就係果幾年社會經驗既分別。
照咁睇，athena仍然有一顆小女孩既心，單憑上一次佢對住我哭訴，我就知道佢一個女仔撐得好辛苦，除左冇應該有既少女生活之外，佢仲肩負起佢家人，佢職位等等既責任。
佢需要既，係一個可以令佢做返自己既男朋友。
『阿沁…唔好意思呀…要你等。』athena撥一撥秀髮。
「唔緊要…」我打了一下響指：「唔該可以serve喇。」
『嗯…？』athena好奇問。
「冇，頭先我見你去左洗手間，我叫waiter遲少少先上菜之嘛。」
『哈哈…你真係細心…同你個名一樣。』
「哈！我記得我返工有個客都講過話我細心架，不過其實我都只係對重視既人比較著緊姐。」我想起曾經幫我買過野既水貨客黃先生。
『哦…？』athena突地一問：『阿沁…你唔係水貨客黎架咩…？』
大獲…！一時忘形唔記得左自己身份！
「哦，」我故作自然：「係啊，水貨客都有自己既客人架嘛？」
『喔……我仲以為你都做過sales添…因為你知道做你呢行…應該都好少同客人接觸架嘛？』
「嗯，係啊，我搞網上商店既，不過有時ｄ客想急要ｄ貨，我都會親自出黎交收，所以佢地咪會讚我細心囉。」
『嘻…人地話細心既男仔會加分架～』
「哦？係咩？」
呼…總算過到骨。
『嗯嗯～』athena稚氣地點點頭：『其實…我覺得阿沁你比我叻好多…』
「我比你叻？」
『係啊…唔知點解呢…我覺得阿沁你有一種親和力咁……』
「親和力？」
『嗯～』athena凝視著我：『就好似第一次見你咁…會覺得你好親切…就好似親人一樣。』
「………」我有點尷尬。
『係同你傾計既過程中…會感受到你係一種好可靠、好值得信任既人…不知不覺會放低對你既戒心……』
「哈…乜…乜係咩…」
『上次唔知點解…我會同你講出自己心底既說話…』
「上次唔好意思呀…我唔係有心鬧你……對唔住…」
『唔唔…』athena搖搖頭：『都係因為你，我先知道自己有ｄ咩不足，仲有好多待人接物既事我要去學，係你教識我讀得書多唔代表出黎社會做得野架…』
「邊係…你言重喇。」
『係真架，我未遇到你之前，我淨係一心知道自己要堅強起黎，對住所有人都要擺出一個高高在上既態度，令到人屈服於我…係我公司既老臣子教我架…』
「點同啊？果ｄ老屎忽做事方式點同你一樣呢？」
『有咩唔同…？』
「果ｄ老屎忽，做既職位經常要對住ｄ員工，佢地梗係要擺起個款啦，但你唔同呀！你係總經理，有咩必要同普通員工既關係搞到咁差？」
『因為…我怕…佢地會唔尊重我……』
「你覺得擺起個款尊重人咩？人地真係會從心底咁尊重於你？」
『……』athena彷彿被我驚醒，無言以對。
「傻女，你只係需要做返自己就可以，唔係話你唔需要擺出一副經理既架子，而係要睇人去擺，你只需要管住ｄ高層，普通既員工一樣可以同佢地做朋友呀～」
『阿沁……』athena雙眼泛紅：『多謝你…』
「唔洗客氣。」
打開左話題之後，我同athena係呢一餐飯都不斷有講有笑。
氣氛好融洽，就同身邊既情侶比人既感覺一樣，驟眼睇我地就好似一對戀人一樣。
但可惜，我同佢係處於一個對立既位置。
佢係公司總經理，繼承家族生意，飽讀詩書，前途無可限量；
而可笑地，我只係一個偷呃拐騙既騙子，永遠唔知聽日事，可能橫屍街頭，可能身敗名裂。
不過，命運就係咁鍾意作弄人。
而我地偏偏係呢度相遇，相識，相知，甚至乎，我察覺到athena已經開始對我有好感。
望住眼前呢個善良既女仔…我既內心有一股不安既情緒。
明明我已經係做過唔少壞事，點解我仲會咁猶豫不定？
良心…唔係一早已經被我泯滅左架喇咩？
我仲未開始下一步既行動，內心已經不斷有一把聲音斥責緊我自己。
利用別人，從小到大每個人都試過。
但利用感情去得到另一樣野…唔知點解愧疚感不禁由然而生。
Athena既每一個笑容，每同我講既一件事，都係打開心扉，坦白咁同我傾訴心事。
而我，只係不斷去編大話去搏取佢既信任。
佢係我面前可以做返自己…
咁我呢？
真正既「自己」，早已係我讀完書之後已經切底消失，被呢個殘酷既社會吐食無骸。
為生存，要生活，博上位，我不斷去戴上面具，去迎合所有人，去做到面面俱圓。
直到最近我逃離左千篇一律既打工日子，我戴上既面具反而一日比一日多。
晚風颼颼，我同athena享用完晚餐之後，就出左去餐廳既露台，一邊摸住酒杯，一邊談笑風生。
回想起過去呢幾年，出黎做野既呢幾年，我到底…做過ｄ乜？
讀完書就投身社會，為家人，為享受，完全冇諗過日後既日子。
我同大多九十後既年青人一樣「餐搵餐食餐餐清」，就如一般既月光族。
辛苦搵返黎既錢，每日就係為左減壓而洗返出去。
點解人會咁戇鳩？
為左搵錢而辛苦，好喇，到你搵到錢喇，就為左冇咁辛苦而洗錢。
咁點解我地仲要努力返工搵錢？
唔搵錢，咪唔會辛苦囉？
直到我踏上左呢條路之後，我先知道以前做既野全部都係錯。
又唔可以話錯既，只係一般香港人唔願意面對現實，先會不斷返工，不斷做野，總會覺得自己打份工會有出頭天。
上世紀七、八十年代，可能打一份工仲會有出人頭地既一日。
因為物價唔高，地產商少，百業待興，只要平平實實穩穩定定，要置富絕非難事。
但奈何我地出生在一個飽和左既社會，前人既足印已經唔到我地去行。
所以，要出頭，一定要擁有一顆唔甘於平凡既心。
無論係咩發達橋，咩犯法事，咩偷呃拐騙都好，係現今既香港，只要你肯搏肯打破規條，
放棄一直有既良心、自我、尊嚴、朋友等等其中一樣，有朝一日平凡既年青人總會飛黃騰達。
除非你學富五車，或生於富裕家庭，又或者係好運到仆街，如果唔係，你要出人頭地都幾難。
平凡？只不過係廢物的代名詞罷了。
『阿沁？…諗咩諗到入哂神咁？』
「冇……」我望住澳門既夜景：「athena。」
『嗯…？』她撥一撥耳邊被吹散的頭髮。
「我有件事…想問下你。」
『咩…事…？』
「你覺得家人對你黎講，重唔重要？」
『點解咁問既…？』
「上次聽你講，你同你媽媽相依為命…可想而家你應該好錫你媽咪。」
『都算係既…雖然佢唔係一個好老婆，但…我相信佢都會係一個稱職既媽媽。』
「我同你一樣。」
『阿沁……』
「除左我自己之外，最重要就係我家人。」
『咁…你女朋友呢？』athena下意識問道。
「女朋友？」我苦笑搖頭：「我冇女朋友。」
『哦……』
「既然你媽咪對你重要，萬一佢有事，你會點？」
『我唔係好明你既意思……』athena面有難色。
「假如你知道，你媽咪聽日就要死，如果你有能力，你會唔會嘗試去救佢？」
『會…當然會！』
「假如連你自己都會死，你都會去救？」
『當然呀！我最重要就係我媽媽…比起咩人都重要！』
「咁就好。」
『下…』athena猶豫地問：『阿沁…你係咪發生左ｄ咩事…？』
「Athena，我求你一件事，你一定要答我。」
『咩…事…？』
「求你話比我知…趙政祺到底係咩人！」我捉住athena膊頭堅定地望住佢。
『我…我…』athena逃避我眼神：『我都話唔知……』
「點解你唔肯同我講真話！？」我開始激動。
『………』
「我同我屋企人，仲有我好朋友既前途，甚至係生命，都被呢個女人脅持住！」
『點解…？』
「我暫時唔可以同你講，只要我一唔順從果個女人既意思，我就會死！我死唔緊要，我條命根本唔值錢，但我最重要既家人，仲有朋友，我唔想連累埋佢地！」
『………』
「所以！」我深吸一口氣：「請你話比我知！趙政祺到底係邊個！」
我深切既剖白，堅定既眼神，加上激動既情緒，以至講既每一字每一句都好；
都包含住我內心既悲慟。冇錯，我頭先講既都係千真萬確，我既安危的確好危險。
相信Athena亦感受得到，因為我頭先既舉動絕對係「演」唔到出黎。
即使佢本身對我仍存有疑心，係我呢番話之後所有陰霾都會消失得無影無蹤。
『阿沁……』
我低下頭，基於頭先既情緒太激動，令到我不禁流下男兒淚。
不過聽到Athena溫柔婉弱既一句稱呼，我就知道佢既態度已經軟化落黎。
而下一步…就係知道趙政祺既真面目！