【我在IG Shop買了一個流星少女】: 第七章(上)
第七章
星瑤帶左我上去佢間房，我照舊拉左佢張電腦椅去床邊坐係到，而星瑤就坐左係床上面。
「好啦！」星瑤裝正經道。「你好乖乖地同我講，點解你會黎左呢到！」
「點解？」我思考了一會。「因為我想見你囉！」
「講好左我地唔準再見架喎！」星瑤流過一絲苦澀。「唔守諾言！」
「呢d會令自己後悔既諾言，bull shit啦！」我堅定道。「我淨係知道，如果我再唔黎呢到見你既話，我會痛苦一世！」
星瑤感到呢番說話有點熟悉，於是乎一臉懷疑咁望住我。
「點解你講d野咁似……」星瑤說。
「似紫鈴講既野？」我笑了一笑。「係呀，全靠佢我先識得企番起身。」
於是乎我就將昨晚的事告訴了星瑤。
「原來係咁……」星瑤感嘆地笑了一下。「紫鈴佢真係好好啊可？」
「嗯啊。」我潛意識點了一下頭。
「咁如果我唔係到，你咪可以去搵番佢囉？」
弊，講錯野！！！
「 大吉你個利是！」我驚慌道。「我岩先口快快姐……哈哈......」
「哦，即係你岩先講真架啦！」星瑤拍打著我的肩。
「呢層呢……」我慚愧道。「哈哈。」
「衰人衰人衰人！」星瑤繼續打我的肩。
胡鬧過後，星瑤與我對望著。
「哼！」星瑤奸笑了一下。「不過我都唔會介意你娶紫鈴既，反正我都一定唔會同阿彥離婚！」
星瑤講起我先記得自己仲未聽晒成個版本。
「係喎星瑤，」我問道。「你地琴日之後係點？」
「嗯？」星瑤諗左一諗。「哈，好戲劇。」
「即係點？」我不解道。
「你有無覺得成個人好似唔同左？」星瑤微笑道。「我覺得我成個人輕左。」
「即係你瘦左？！」我驚慌道。「唔係掛，你無食野咩？！」
「唔係呀死蠢！」星瑤作勢打了我一巴。
哎……好溫暖。
「我意思係話，我膊頭上的重擔好似無左。」星瑤重申道。
「我都係呀！」我笑說。「即係證明你諗通左！」
「可能係啦。」星瑤望向外面的白晝。「但我覺得更多的，係阿彥諗通左。」
「嗯？」我不解道。「即係點？」
「你咪問我琴日之後點既，」星瑤望番住我。「講你都唔信。」
「原來阿彥一直企左係出面。」
*****************************************************************
星瑤視角篇
「唔好俾其他人左右你既思想，跟隨自己最真誠的想法去做啦！」紫鈴說著。
「自己最真誠既諗法……」我深思著。
我最真誠既諗法？
我……我好掛住家樹。
我好想……我好想家樹留係我身邊。
我……
「我好愛，好愛佢……」我痛哭著。「馬家樹，我好愛你呀！……嗚……」
「嗯，我明白架。」紫鈴抱著我拍拍我的背。「喊晒出黎啦，喊晒出黎會舒服d架。」
不知過了多久，我終於收到聲。
「好對唔住啊紫鈴，係你面前講呢d野……」我慚愧道。
「洗咩同我講對唔住！」紫鈴微笑說。「係人都有感情架啦，將自己所想講出黎有咩唔岩！」
「但係……」我不知所措道。
唔通真係要家樹陪住我咩？
我可能好快就死架喇……
家樹佢萬一受唔住點算？
而且仲有阿彥個邊……
「唔好但係喇！」紫鈴一句喝過來使我抖震了一下。「記唔記得我講過d咩？凡事謹記依照自己的心意黎行！講完出黎就付諸行動，千祈唔好俾自己後悔！」
無錯……如果我唔能夠同家樹係埋一齊既話，我一定會好後悔、好後悔……
「嗯！」我拭去淚痕。
於是乎我就送番紫鈴出去。
點知當我一打開門既時候，就見到阿彥企左係到！
「啪勒------」阿彥嚇得手上的紙張都跌晒落地。
「阿彥？！」我說。「你幾時係到架？！」
「我……」阿彥裝忙執拾地上的東西。「我都係岩岩上黎姐！」
*****************************************************************
「下……」我難以置信到。「有無咁tvb......」
「所以我咪話好戲劇。」星瑤伸一伸懶腰。「但有時世事就係咁架喇。」
「現實，永遠比劇本黎得精彩。」
「嗯……」我思考著。「咁之後呢，阿彥佢點？」
星瑤沒有確切回應我，只是說了一句 :
「我諗我呢一生最感激既，就係有阿彥呢個如此深愛著我的好哥哥。」
後來我才知道，原來那一晚阿彥痛哭地跪倒在星瑤面前，希望星瑤能夠原諒佢自私既行為。
星瑤吻了阿彥一下，然後佢地就沒事了。
表面上依然係對方既老婆老公，但事實上卻是彼此的知己。
即係點？自己參詳一下啦。
傾左一陣之後，我開始問到星瑤的病情。
「你1月2號晚機？」
「嗯啊。」
「即係我地只得番一個星期……又係一個星期……」我苦惱道。「咁你去到之後會做咩？」
「其實依家都無咩可以做架喇，咪就係去個到休養直到期滿做手術，然後就……博一博單車變費托囉！」星瑤開玩笑說。「講起上黎個到間屋真係好大，所以排期個陣你可以過黎陪下我同阿彥玩捉e因哈哈哈！」
「星瑤，點解你可以咁樂觀既……」說到生死我實在無法笑出來。
誰知星瑤的答案，卻令我會心笑了出來。
「嘩，我由小四開始就知道自己有呢個病喇喎，如果日日都喊住叫生叫死既話我咪好唔得閑？！」星瑤道。「萬一喊到出晒皺紋既話，我咪朱茵變魯芬！」
「哈哈，你好白痴！」我笑說。
不過星瑤其實又講得好岩。
如果係平日好人好姐點知突然間患病既人，或者佢地就會要生要死灰到貼地 ;
但星瑤佢早就已經渡過左呢段時間，所以佢能夠開朗地面對「疾病」呢兩個字。
「其實當初我得知自己有病既時候，我都試過好抗拒，覺得好難面對。」星瑤坦言道。「但好好彩，我有阿彥同埋兩家人既支持，終於令我慢慢接受左呢個事實。」
「但最重要既……」星瑤溫柔地看著我，使我不由得心跳加速。
「但最重要既，係因為我識到你。」
「自從結識左你，然後同你係埋一齊之後，我重新認識了呢個世界，重新認識了我自己。」
「原來劉星瑤存在係呢個世界上唔單單只為左報恩。」
「原來佢都可以試下溜冰，試下唱通宵k，試下做義工，試下見家長，試下去旅行，」
「試下拖手，試下擁抱，試下接吻……」星瑤哄到我臉前。「試下愛上……你。」
「馬家樹。」
我諗都無諗，直接咀左落去。
星瑤的嘴唇，依舊像軟糖一樣柔嫩而帶點甜味。
正當我們陶醉得入神既時候，一把男聲由門外傳來。
「星瑤？」阿彥叫道。
咩呀！你估阻人接吻唔洗燒春袋呀！？
好啦我講笑姐。
我拖住星瑤，直接打開了門。
「星……」阿彥見到我地個陣頓時瞪大了雙眼。
「hello。」我打招呼道。
「喂，」星瑤一野踩落我腳板。「你唔准蝦阿彥架，如果咪我同你分手！」
「下？！」我同阿彥一齊叫出黎。「分手？」
「係呀！」星瑤笑了一下。「阿彥係我老公，家樹係我男朋友，無衝突喎！」
雖然正確黎講，我同星瑤係無分過手 (你中意可以check番成篇文)，但我又已經同左紫鈴一齊，但我又未同紫鈴分手，而阿彥又係星瑤老公，但又係紫鈴曾經中意過既人……
好亂呀師父！
我跟隨住星瑤同阿彥落飯廳食早餐，終於第一次見到星瑤的父母。
佢地男既帥氣女既美麗，怪唔之得能夠有星瑤呢個完美結晶。
我與星瑤阿彥兩家人一齊食野，大家係到傾計閒談。
雖然星瑤父母一開頭都係審犯咁問我野，但最後都信任左我。
咁係咪代表過左第一關？Yes！
食完野之後，我係全場既批准之下帶了星瑤出去海旁散步。
「sorry啊岩先嗲吔媽咪咁樣對你……」星瑤撓著我的手。
「傻妹黎既，佢地唔問清楚既話又點知我係真心對你！」我笑說。
「啊，講到好似要將我嫁俾你咁！」星瑤鼓起腮的樣子非常可愛。「我係人妻黎架喇！」
「但你係我女朋友喎！」我笑了一下。
我們再一次來到白色帳篷下。
每一次黎呢到，感覺都唔一樣。
「呢幾個月經歷左好多野啊可？」我慨嘆道。「多到我都未消化到。」
一切一切都好似黎得太快，使我的雙腳好像永遠也踏不到地面。
「嗯，我都係咁覺得。」星瑤依靠在我的肩膊上。「好似仲未欣賞夠眼前既風景，就已經要啟程去下個地點咁。」
「不過好好彩既就係，」我用手跨到星瑤膊上，一野扯佢去我面前。
「喂你岩先個動作好smooth！」星瑤笑說。「做多次呀不如！」
「唔準笑呀我認真緊！」我沒好說。「破壞晒d氣氛！」
「好啦好啦。」星瑤靜了下來任我魚肉，臉開始泛紅的與我對望著。
「不過好好彩既就係，」我輕拭著星瑤的臉蛋。「撓左咁大個圈，你始終都係屬於我既。」
「車……」星瑤害羞的望著我。「口花花啦你……」
我緩緩把頭哄近星瑤，近得能聽到她的呼吸聲。
「做咩啫你……」星瑤抿唇道。
「無……」我微笑了一下。「有d野想同你講姐。」
「嗯？」
「我愛你啊，劉星瑤。」
「嘻嘻。」
「笑咩啫。」
「無……因為我都有d野想同你講姐。」
「嗯？」
「我都愛你啊，馬家樹。」
我與星瑤擁吻著，用心欣賞眼前這個燦爛的風景------對方。
但願一切一切，都唔好流得太快。
然而，流星雖燦爛美麗，卻一閃即逝。
為左珍惜同星瑤僅餘一個星期既時光，我直程執左行李過去長洲同星瑤一齊住。
「哥，」我番黎執野既時候嘉琪說。「見到你同星瑤可以一齊番我真係好開心。」
「我都好開心。」我按著嘉琪的頭。「但之前就難為左我可愛既妹妹為我操心，真係好對佢唔住。」
「傻啦，佢先無咁小氣！」嘉琪甜甜的笑了一笑。「請佢食番餐飯就得架喇！」
「咁都係算啦，唔講對唔住喇。」
「車！」
我打電話將呢件事同左阿溢講，點知佢就一句車埋黎 :
「妖，食兩家茶飯！」
Er……okay fine。
「講笑咋。」阿溢笑了一笑。「呢兩個女仔都對你咁好，記得唔好再傷害佢地喇。」
「嗯，我知架喇。」我回應道。
於是乎我就回到長洲的白色大屋。
事關星瑤父母落左order，星瑤除左星期六覆診可以去市區之外，其餘時間都要留係長洲，頂盡就係有人陪同之下可以係島上面周圍行。
阿彥為左俾多d時間我同星瑤獨處，呢幾日就走左去約朋友出街餞行 (事關阿彥同星瑤一齊移民去英國) 。
嗯……唔知佢有無約紫鈴呢？
由於住係呢間屋既其他人都要去番工，所以換言之就剩係得番我可以陪星瑤。
「咁我走喇！」阿彥說罷就出了門。
「你去咁耐架！」星瑤發悶道。「我要出去行下！」
「okay！」我拖著星瑤廿四孝男友道。
如果唔係有星瑤呢個地膽帶路既話，我諗長洲有好多地方有我一輩子都未必會踏足一次。
我地沿住山徑來到了白鰽灣，一個位於張保仔洞以南，渺無人煙的沙灘。
「嘩……」我被眼前的景色吸引了。
「係咪好正先！」星瑤笑了一下。「我好中意呢到架！」
「真係好正！」我攜著星瑤走到沙上。
「呢到夜晚仲正呀！」星瑤期待說道。「個陣夜晚同父母經過呢到，發現呢到可以望到好多星星！」
「可惜之後我都無乜機會再黎lu……」
聽著星瑤如此遺憾的語氣，我不禁有點心痛。
「係呢星瑤，」我問道。「假設手術成功左而你都休養番好之後，你地成家人仲會唔會番黎香港？」
「嗯……」星瑤變得臉有難色。「我諗就唔會喇。」
「始終搞一次移民已經好麻煩，我實在唔想又麻煩多次阿彥屋企人……」
「明白既。」我淡淡然說。
「家樹……」星瑤捉實我的手。「你唔會因為我地long d而唔要我架可？」
「傻妹黎既！」我笑著說。「我話你聽，我已經諗到自己將來既目標。」
「係咩？」星瑤不解道。
「就係……」我賣關子道。「唔話你知！哈哈！」
「咦，衰人！」星瑤輕捏著我的臉。「講呀講呀！」
「唔講唔講！」
我既目標？
我既目標就係妳。
與星瑤相處既時光，就好像漏斗裡的細沙般一點一滴流走，當我回過神來的時候已經係12月31日晚上。
太快，太快了。
仲有兩日星瑤就要離開香港喇……
「唔好咁頹啦！」星瑤對著我說。「我仲係地球上面架，要搵我既話點都搵到！」
「之但係我地就唔可以再好似依家咁日見夜見……」我失落道。「我要繼續番學，最近都要農曆新年先黎到探你……」
「世上仲有skype同wtsapp架馬先生！」星瑤彈了我額頭一下。「想見既話，幾時都可以見到！」
哈哈……竟然係星瑤安慰番我轉頭……
「嗯！」我擁著星瑤。「一於唔好浪費最後呢幾日，我地好好享受佢！」
「好！」星瑤興奮道。「但係有d咩好做？係長洲好悶……」
「悶同唔悶，只係視乎你係到點樣玩架姐，嘻嘻！」我奸笑了一下。
由於今晚係除夕，所以我已經一早向星瑤父母申請左半夜行街紙，讓我同星瑤能夠第二朝先番歸。 (當然都係唔俾出市區……)
為左呢一晚，我之前趁星瑤訓左既時候就會立即溜出去買材料，希望將個樣野送俾星瑤。
咁即係整左d乜？
一陣你地咪知囉！
吃過晚飯之後我藉d二話出去買野，其實就係去佈置場景，搞到成11點幾終於搞完番到黎。
「你買咩買咁耐啊？」星瑤不解道。「今日公假喎，出面仲有舖頭開架咩？」
「er……」我靈機一觸。「無，我去7仔買redbull咋麻！」
「咁你罐野飲呢？」
「飲完好耐啦！」
「車，古古怪怪咁！」星瑤打量著我。
「出去吹下風？」我裝作平常道。
「又好！」星瑤立即活潑起來。「難得今日有得夜番，無理由唔用盡佢架麻！」
於是乎我地兩個就拖住手出了門。
「你做咩揹住個背囊既？」星瑤疑問道。
「怕你凍呀，咪帶多左件褸！」我笑說。
「都唔知係咪真既！」星瑤笑了一笑。「不過見在你咁體貼……信住你先啦！」
我望望錶，WTF？就黎十二點？
「預錯時間添！」我驚訝道。「跟我黎！」
說罷我就一野拖住星瑤奔跑。
「哎！？」星瑤被我拉著。「去邊呀？！」
「去到你就知！」
狗衝到就斷氣，終於趕得切係12點前黎到白鰽灣！！！
我正想同星瑤傾計，卻只見她早已忽視了我的存在，專心致志於眼前沙灘上的美景。
咩美景？不就是我用燭光於沙上砌成一粒星星的美景，哈哈哈！
「家樹……」星瑤轉過頭黎望住我。「你岩先出去咁耐就係去左整呢粒星星？」
「係啊。」我走上前擁著星瑤。「唔中意？」
「唔中意！」星瑤甜甜的笑容正出賣緊佢。「好老土啊你！」
「老土？」我奸笑了一下。「仲老土D都仲有！」
於是乎我一下子把星瑤「公主抱」起，然後跑到星星的中間不斷轉圈。
「投降未！」我裝惡道。
「哈哈哈~~~」星瑤在我懷中笑得不亦樂乎。「投降喇投降喇！」
「好！」我把放了星瑤在沙上，自己則大字形攤倒在星瑤旁邊。「唔得喇，好攰~~~」
誰知星瑤突然整個人翻過來，與我臉對臉的壓左係我上面！
除左身體的溫度同觸感之後，呢個動作更令星瑤的頭髮下垂在我臉上，使我眼前只剩下星瑤美麗的臉孔。
在燭光的投映下，星瑤的輪廓更顯迷人，加上我地急速的呼吸聲，使我不由得臉紅起來。
「做……做咩呀……」我難為情道。
「做咩？」星瑤把頭哄前，使她每講一隻字都會把氣噴在我臉上。「我想……望下你囉。」
我與星瑤對望著，嗅著她身上的白蘭花香。
「你好靚。」唔知點解我竟然直接講左呢句出黎。
「嘻嘻。」星瑤甜甜笑了一下。「多謝你為我準備呢粒星星，我好中意。」
星瑤稍為哄前，然後我們就親吻起來。
老實講，本來我就打算同星瑤倒數既，點知咀咀下我居然唔記得左。
但我相信呢個會係人之常情！試想想係呢一刻，有個天使般既美女正火熱地與你接吻，唔通你仲會留意依家幾點咩？！
當我地分番開之後我一睇，頂，已經十二點一。
「過晒鐘添，哈哈！」我遞隻錶俾星瑤睇。
「鬼叫你咀得咁入神！」星瑤害羞道。
我地兩個拖住手攤左係沙灘上粒燭光星星裡面，靜靜觀看著滿天星斗。
「估唔到係香港都可以睇到咁多星星……」我說。
「話你知啊家樹，英國個邊夜晚無咁多星睇架……」星瑤暗暗慨嘆道。「所以惟有係到睇飽佢啦。」
「星瑤，」我坐起來望著攤係到既星瑤。「不如……我摘D星星俾你帶去英國？」
「下？！」星瑤坐左起身取笑道。「你唔係諗住摺一兜紙星星俾我下話！」
「你又知既……」我裝作失望地拉開背囊拉鍊偷看裡面。「仲等我摺左一瓶俾你添……」
「真係架？！」星瑤的表情立即變得非常抱歉。「Sorry啊家樹，我唔係想笑你架岩先！我玩下架咋！你送咩俾我我都咁中意！」
哼，你中計喇劉星瑤！
「咁好啦，我送俾你啦……」我徐徐伸手進袋中，抽出一個頗大既透明瓶。
不過，呢個並唔係一般既透明瓶。
佢係……星空瓶。
當星瑤望到呢個如此美麗的瓶既時候，露出了一個非常非常喜愛的笑容。
「好靚呀！！！」星瑤眼甘甘咁望住個瓶。
「呢個，係我為你摘下的星空。」我把瓶遞給星瑤。「你去到英國個陣如果掛住我，就攞呢個瓶出黎啦。」
「多謝你，家樹……」星瑤接過瓶子，緊緊把它擁在懷中。「我一定會好好保管佢！」
「記唔記得我之前同你講過，我有一個目標？」我笑說。
「嗯嗯。」星瑤仔細聆聽著。
「其實我既目標好簡單------」我期待道。「我會努力儲好一筆錢，然後係台灣墾丁買一間大屋，等我同你能夠移民過去居住。」
「點解係台灣墾丁？」星瑤問道。
「因為我同你之間最深刻的兩人回憶，大概就留左係台灣。」我望向天上的夜空。「而墾丁比起台中台北就擁有更美麗的角度和能見度，使到晚上抬頭就能夠觀賞萬天星宿。」
「其實呢個瓶，就係我目標的第一步。」我低頭來望著星瑤懷中的瓶。「雖然呢個瓶的星係假既，但我相信------」
「終有一日，我一定會將真的星空送俾你。」
星瑤聽完之後望著我，水汪汪的雙眼早就湧出了晶瑩的淚水。
「嘩，你喊到成隻花面貓咁喇！」我一路取笑著星瑤，一路替她拭去淚痕。
「家樹…..嗚……」星瑤更加用力地擁著瓶子。
「傻妹黎既。」我坐前一步，將星瑤一擁入懷。
「為左可以睇到你送俾我既星空，」星瑤哽咽道。「我一定會努力生存落去！」
「嗯！」我微笑著。「加油啊，星瑤！」
我們彼此互相依靠著，直到燭光全部熄滅，太陽從我們後方升起。
「最衰呢到係西堤，無得睇日出！」星瑤失望道。「哧嗞~~~！」
「著埋我件衫都唔夠暖啊？」事關我琴晚將自己件褸俾左星瑤。
「有少少凍，個頭有少少重咁囉！」星瑤笑說。「可能懾親，嘻嘻！」
「咁我地番去啦！」
「嗯！」
我把蠟燭扔進垃圾桶之後就揹起背囊，與星瑤一起回家。
一路上星瑤都好開心咁攬實我送俾佢既瓶，完全唔肯放手。
走到海旁既時候我好奇問道。
「有無咁中意呀！」我裝作沒好氣，但內心早已變得非常溫暖。
「靚麻！」星瑤窩心道。「但個瓶咁大，都唔知上唔上到機……」
「噗------」
突然間，星瑤就在我面前倒下了。
「砰------」
星空瓶的碎片散滿一地。
「星……星……」我雙眼變得空洞。
「星瑤啊呀！！！！------」
流星，一閃……即逝。