誰能逼我將就: Ch.89

「我講咗啲咩去傷害佢呀？」

「你做咩同佢講，你知佢問我借錢呀？」

「咁係妳同我架嘛！」

「我冇叫你同佢講返丫嘛！」

幾句言語上的互搏，墨的情緒又去到一個沸點。





「呢度球會嚟，妳可唔可以唔好咁？」

墨沒有再逆下去，轉身拂袖而去。我無奈的在後面跟著，她走得愈急，我便跟得愈快。

「喂！」我在後面一直呼喚，但她沒有停下。

我跟著她走了幾條馬路，最後墨開始放慢腳步。我走上前，稍稍的拉住她。我很輕很輕的，不敢讓她再發怒。

這感覺真的很沉重，到底在我們之間，溝通是不是這麼難，情緒又是不是那麼重要？





「喺街度唔好拉嚟拉去好冇？」墨回頭跟我說。

「我唔拉住妳，係咪要跟住妳由銅鑼灣行返去荃灣？」

「冇人叫你要理我。」

「妳唔好咁煩啦好冇呀？我屋企已經幾百樣嘢要理，妳有咩唔高興咪講囉，點解仲係要人估？」

「冇事呀，得未呀？」





可能跟英琦相處得實在太久，過於平淡的我們，很多時間連吵架都沒有太大耐性，每次都是幾句上落便草草了事。

跟墨的相處令我開始有點壓力，我不想每件事都要猜心，直來直去的表達不是最好嗎？

「冇事妳就唔會嚟搵我啦，既然妳都可以嚟到搵我，點解唔講俾我知，到底妳想點？」

「就係既然我已經嚟到搵你，點解你唔可以行多步去關心我，問下我到底咩事，又或者係話俾我知，你點解要呃住我去搵英琦？」

墨終於亮出了我們要解決的事，她沒有等我解釋什麼，接著說：

「其實我只係想要你一個解釋，我就可以。」

「咁點解唔係妳同我解釋，妳會同向松朗一齊呀？」

這是我唯一的答案，也是我唯一可以說出口的答案。





我不能跟墨說，因為我父親不喜歡妳；也不可能跟她說，我的事妳只會愈幫愈忙。不是因為她的能力，而是因為我們的位置，還有Timing。

「我同阿朗嘅事你又話明白？」

「我明白唔等如妳可以呃我，大家都有私心，點解成日要我同妳解釋？」

它：純，私心呢兩個字太敏感。控制好自己情緒，特別係你知道阿墨嘅情緒一向都管理得好差。

我：我都可以管理得好差。

它：你咁樣諗冇意思。

我：有冇意思唔係我一個人講，點解呢個世界上總係有人，覺得自己可以攞正牌發脾氣同情緒差？





它：冇得問點解，唔好逼自己走入死胡同。墨已經唔識諗，你要保持冷靜。

我：我唔想講。

關上跟「它」的對話，我再看著眼前的墨。經過幾個月的蜜月期，大家都已經沒有掩飾什麼，墨就怒氣沖沖的，一直用雙眼盯著我。

「你根本覺得我唔重要。」女人的絕活很多，這句說話是其中一招。

「我講咗我屋企好多事發生，唔係妳重唔重要，妳唔好再喺呢個位鑽嚟鑽去好冇？」

「係我鑽嚟鑽去，我唔出聲好未？」

墨的說話模式根本是「單人版」，我沒有辦法再跟她爭論什麼。

「我阿爸冇返屋企幾日，我已經好煩喇，唔好再嘈好唔好？」





「係呀，你阿爸就最重要，你都就三十歲喇，你阿爸咁大個人唔返屋企有咩咁大件事呀？」

「你講乜嘢呀？」我咆哮，因為墨已經越過了一條不應該越過的線。