[末日][極限生存][獵奇]　致人類的輓歌－首部－墮落: 4.17

「你點知？」小靜認真地問。

「我信。所以依樣就係事實。結果你都係有黎搵我。」古瑪側著頭說。

小靜對古瑪的說話不以為然，她在滑梯旁坐了下來。

「做咩？」古瑪一腔期待的口吻問。

「冇。。。想搵人傾下計，靜下姐。」小靜低下頭，像小孩一下玩弄自己的手指。





「咁我走喇～」古瑪站起來，拍一拍屁股便離開滑梯。

小靜心頭一震，看到古瑪如此灑脫的反應更難以啟齒。

「吓，咁快呀。。。嗯。」小靜把自己的頭壓得更低。

古瑪停下來，轉身看著小靜。

「你唔會行咁遠搵一個有人既地方，同人打完招呼之後想自己一個靜下。」古瑪側著頭說。





小靜扁扁嘴。

「你自己打招呼先既。」小靜反駁。

古瑪回想了一秒，臉上一紅。

「如果你唔想講就由佢。」古瑪轉身便走。

「等陣！」小靜急忙站起來說。





古瑪再次回頭，臉上掛著熱情的笑容。

她們坐在滑梯旁開始聊起來。

「我想問下。。。你有冇試過發夢，好真，真到好似係一段回憶咁？」小靜急不及待地發問。

古瑪撫著嘴唇，一邊皺眉深思。

「冇。」古瑪簡潔地回答。

小靜大感失望，她本以為古瑪會分享更多資訊給她知道。

「。。。。。。」小靜一臉失落，沉默起來，一副茫然的樣子。

「你個夢講咩架？」古瑪問。





小靜打量了一下古瑪，考慮要不要和她坦白。她嘆了一口氣，心想：難道問其他人會更好？小靜決定把這回事當成心事分享給古瑪知道。

「其實我都唔係記得好多。好似，有人一直同我講野。同我講好多。。。好多我唔係好明既野我知。」小靜努力地把自己的夢境回憶出來。

古瑪雙眼閃爍，瞪著小靜專心地傾聽。

「佢好似一直都指導緊我一啲野。好似好重要。。。唉，我唔記得喇。」小靜皺緊眉說。

「你認為你係咩？」古瑪問。

「咩我係咩？」小靜大惑不解。

「你認為點先係你自己？」古瑪嘗試更具體地問。





「我？吓。。。我。。。我咪就係你見到既我囉，我性格係點同我做咩決定都係我囉。。。」小靜騷著後腦，不明白古瑪的問題和自己的夢有甚

麼關係。

古瑪舔著唇，瞇起雙眼，細味小靜的答案。

「如果我見到既你，就係你。咁剪左頭髮既你。仲係唔係你？」古瑪問。

小靜被古瑪推進了一個黑色的深井裡，完全迷失了方向。

「我。。。我唔係想討論哲學。」小靜不煩耐。

古瑪對小靜冷淡的反應大感失望，甩下一個鄙視的目光。

「你信唔信有人有靈魂？」古瑪問。





「靈魂？」小靜對古瑪如此具體的問題卻手足無措。

「我。。。信既。我唔覺得人死左之後就乜都冇。」小靜慢慢地吐出自己的想法。

「塔羅牌，就係同靈魂溝通。佢明白你唔明白既事，佢知道你唔知既野。所以玩塔羅牌，要自信，深信自己既直覺同感受。」古瑪說。

小靜呆了半響，生硬地點點頭。

「有冇聽過碟仙，筆仙，通靈板之類既野？」古瑪問。

小靜點點頭。

「佢地都係同靈魂溝通既工具。同塔羅一樣。」古瑪說。





「但係。。。同我個夢有咩關係？」小靜忍不住問。

「方法。。。同靈魂溝通可以有唔同既方法。」古瑪說。

小靜被一道靈光劈在天靈蓋上，身體一陣酥麻。

「你指。。。我係個夢到係同自己既靈魂溝通緊？」小靜說。

「我唔知，靈魂可以有好多類形。唔單止人有靈魂，所有野都有靈魂，只要你靜落黎慢慢感受就會明白。」古瑪眨了一下她那雙水汪汪的大眼。

「但係點解佢會困擾到你？」古瑪追問。

「我記得好零碎既句子。。。好似預言咁樣。。。好似你果晚同我講既野咁。」小靜說。

「你對上一次發夢係幾時？」古瑪問。

「唔記得喇。已經有一段時間。」小靜感慨地說。

「我已經講左，一切都係信念。」古瑪說。

「有冇。。。有冇可能我主動去發番果個夢？」小靜突然坐正身體，認真地問。

「嗯，你更加可以說服自己蘋果係藍色。」古瑪冷靜地說。

小靜對古瑪的嘲諷感到莫明奇妙。

「如果你一心想果樣野發生，佢就會發生。依個叫吸引力法則。我相信你經歷過。只要你有問題，就會遇上唔同既人或者事去解決你既難關。不

過。。。你要分清楚，佢地係你想知道既野，抑或係你想見到既野。」古瑪說，側著頭木無表情地打量著小靜。

「唔好比自己幻覺所蒙蔽，你要識分幻像同真正的指示。」古瑪幽幽地說。

小靜心生寒意，好像古瑪已經知道她的過去。

古瑪深呼吸一下，嘆了一口長氣，拍一拍小靜大脾站起來。

「你會明白既，放心。天黑，我走喇。」古瑪說。

「嗯。。。我坐多陣。」小靜疲倦地低下頭。

古瑪淺淺一笑，轉身便離開了。