[末日][極限生存][獵奇]　致人類的輓歌－首部－墮落: 11.8

噗！

空心氣袋掉到地上的聲音。

馬松山幾乎紀錄下所有聽到聲音的改變。

他對平日十多隻感染者襲擊都不以為然，深信將會有下一次大型攻擊，像上次酒店被攻擊一樣。

馬松山成功游說科斯達，把會所的大門用雜物封起，只留一塊玻璃門作出入用。





他吩咐游手好閒的居民用木枝製作大量的尖刺武器，拆門作盾；同時派人到不同單位收集牛仔布料，再縫製成簡單護具。

物資再次儲存在會所的房間內，最少確保二十人五天的用量，以防陷入包圍。

小隊走到牆外少許的地方收集木材和少量偵測附近的地方。

沒有看到感染者的蹤影，似乎都離開了。

 





Ceci坐在牆邊看著其他人忙碌，自己卻坐在樹底下乘涼。

「怕曬呀？」Jason滿頭大汗走向她。

「我怕熱同攰姐。最近一滴風都冇，好焗。」Ceci平淡說。

「係囉。好似就打風咁。」Jason毫不忌諱坐到Ceci身旁。

Ceci警覺讓開身位，向Jason保持距離。





「做咩？怕～醜～呀～」Jason笑說，伸出手指想篤她的雪臉。

Ceci輕笑躲開。

「你女朋友好得人驚，你小心啲好。」Ceci說。

「吓？難道你指住我屋企果個？」Jason苦惱反問。

Ceci點頭。

「我講左佢只係朋友～冇嘢架。」Jason說。

Ceci哼笑一聲，遞出一條手帕。

「咦，我都唔記得左。」Jason道謝，接過手帕。





「放心，我洗乾淨左。留比你女朋友用啦下次。」Ceci笑說。

「我咪話唔係囉～」Jason矢口否認。

「前晚我去你屋企想還比你，點知你冇閂門，我幫你閂左。」Ceci冷靜看著Jason，喜怒不形於色。

Jason聞言後整個人僵硬，手帕還拿在手中忘了收起。

「下次小心啲喇～。」Ceci淡然一笑，拍一拍Jason大脾，站起離開。

「聽我解釋！」Jason急忙拉緊Ceci的手說。

Ceci回頭，臉上不是Jason想像中的哭相，也不是憤怒。





她嘴掛微笑，表情平淡得像靜止的湖水一樣。

Jason大為緊張，彷彿她完全不在意。

不在意Jason和其他女孩親熱嗎？不。

她似乎毫不在意Jason這個人。

「佢果日好唔開心，需要啲安慰。。。所以我先。。。」Jason語速驚人，把三個字拼成一個音噴出來。

Ceci悠然舉起食指。

殊～～～～～～～～

「聽我講。。。我地之間冇嘢需要解釋。。。你冇責任，我更冇資格。」Ceci淺淺一笑，金髮一揚，轉身慢步離去。





Jason拿著手帕站在原地，心如刀割。

 

明日復明日，明日何奇多。

老爺子一天一天期盼泥士裡會長出嫩芽，也許是一個薯仔，或是一棵菜花。

但農田依然一片泥濘。

天竹鼠圈只有四隻手掌大的小毛球，和兩隻灰兔。

繁殖是首要任務，所有它們得到十分細心的照顧。





小靜閒時便到老爺子的農埸打發時間，阿申則研究地圖和練習弩箭。

古瑪興奮得像小兔一樣彈跳過來。

「睇下我搵到咩！」古瑪顯示著一本書。

「講咩架？」小靜接過書後翻看著。

「講靈魂同靈性。。。我想搵本書好耐！但係要台灣先買到。。。估唔到係我上兩層一個單位搵到。」古瑪像發現寶藏一樣亢奮。

「咁你有咩發現呢？」小靜把書交還，不以為然。

「哇～你真係唔識野。」古瑪扁嘴搶回書本，坐在小靜身旁。

「靈咩性丫～～～依家食物都顧唔掂。」小靜唏噓說。

「只要你想有，就會有！只係你未夠虔誠。」古瑪反駁。

小靜苦笑搖頭。

「你又唔信我！」古瑪抱怨。

「我曾經好虔誠，想搵到嘢食，想大家都安全，想。。。想避免哂恐怖既嘢。。。咪一樣發生。」小靜說。

「你唔可以冇信心！一定要堅信自己既心聲。」古瑪說。

「唉。。。對錯概念已經好模糊。。。仲邊有嘢可以仰靠。」小靜說。

「只要你嘗試同自己心聲溝通，你就會連結到『高我』。」古瑪說，炯炯有神看著小靜。

「咁請問『高我』會同我講咩呢？『果啲人抵死。』『你冇罪。』『世界係咁架啦～』之類既說話？」小靜語氣誇張手舞足蹈說。

「你必須虛心面對自己，放低對錯概念先可以打開心扉接受『高我』。事出皆有因，也許我地參唔透因果，但係我地仍然可以忠於自己的心。」古瑪嚴肅說。

「忠於自己既心？我只記得佢地死左，死左呀！！！」小靜激動向古瑪咆哮，手指用力抓進泥土，挖起很多土塊。

古瑪知道自己踩進了小靜的心靈黑洞，立即懊惱不矣。

小靜長嘆一聲，躺在草地上呆望雲朵。

「係酒店有個女仔比感染者咬到重傷。。。。。明明唔係我傷害佢。。。我打算比佢一個痛快。。。佢臨死前同我講：『你害死我！我做鬼都唔會放過你！』。。。」小靜
平靜說著。

古瑪十分震驚，小靜回來後從來沒有說起她和小隊分散後的事。

「我仲記得果個好純粹怨毒既眼神，好似一把冰錐一樣插入你個心到。。。我問自己點解。點解要咁做，點解係佢死唔係我死？最後我發現。。。根本冇答案。活著根本就
是一場災難。。。。。」小靜滴出無名的淚水。

古瑪聽到小靜最後一句時心頭一震，大為緊張。

「喂！你唔好諗埋一邊。」古瑪認真說。


小靜苦笑，感慨搖頭。

「好好活著吧，只能這樣了～」小靜深呼吸，閉起眼一臉享受說。

古瑪拿著書本呆坐原地。

 

 

一大班人圍在醫療座的底層，人心惶惶。

小偷的屍體在草叢被發現。

他整條右臂被啃至見骨，臉上血肉模糊，眼球的位置只剩下兩個肉洞。

「有怪物入左嚟呀！」一人驚說。

其他人紛紛陷入恐慌，草木皆兵。

Lincoln和小靜互視一眼，蹲下來研究屍體。

「傷口冇血紋。。。可能係其他嘢做成。。。」Lincoln說。

「唔通係熊人呀？唔好呃我地啦！」有人反對。

Lincoln感到眾怒難犯，沒有回應。

「屍體送去曹醫生到。今日開始派兩個人巡邏。」科斯達向Jason說。

Jason心事重重，只懂點頭敷衍。

 

小隊的人再次聚集在Lincoln的房間。

「我地冇時間喇。。。」阿申說。

「我已經知道佢係邊到出沒！好快就會搵到佢！」Lincoln激動說。

「佢開始食人喇。。。我地要付出幾多條命換時間比你？」阿申不滿說。

「試諗下。。。佢可能認得我，絕對係一個罕見例子，可能有解藥！你親眼見到佢救左我，你知道架！」Lincoln嘗試從理性角度出發。

「佢依家食人呀。。。醒下啦。。。唔食你會食我丫嘛。。。」阿申嘲諷說。

「你點諗？呀靜！你同我一齊搵佢咁耐。」Lincoln說。

「。。。。。其實保護現有既嘢已經唔容易，我地唔好太貪心。」小靜難過說。

Lincoln大受打擊，最後的盟友也反對繼續捕捉晞敏。

「我地一定要咁做，你心入面明白的。。。」阿申搭著Lincoln的肩說。

Lincoln無從反駁。

「出去。」Lincoln垂下頭說。

小隊乖乖離開實驗室。

「依家開始，盡量武器跟身。。。」阿申說。

「見到果時就要郁手？冇情講？」古瑪問。

「唉。。。見到先算。。。」阿申有意留白。

 

「hey！Ceci！聽我解釋！我同佢真係冇嘢。」Jason急忙說。

「知唔知點解我每日如常都出嚟睇風景？」Ceci反問。

Jason語塞，搖頭。

「因為我同你都真係冇嘢。」Ceci輕鬆拍一拍Jason胸口，微笑道。然後去到牆邊注視風景。

Jason氣急敗壞坐到她身邊。

「你一定都鐘意我。。。如果唔係，你都唔會幫我。。。」Jason語帶興奮說。

Ceci立即皺眉，似聽到爛笑話一樣不耐煩。

「我點講？玩。真係玩下。我覺得悶同無聊，想有人陪下我就係咁簡單。」Ceci暗暗生氣說。

「咁你一定係鐘意我先會搵我陪你。」Jason立即腦補。

Ceci恥笑一聲，臉帶微笑卻冷漠看著Jason。

「Sorry.隨便一個人都得。」Ceci淡然道。

Jason的玻璃心碎得滿地都是，忍不住嗚咽起來。

「唉，要喊就過主。唔好比我見到。最撚憎男人喊。」Ceci見到後立即白眼一翻，轉身離去。

Jason看著她慢慢離開的背影，心有不甘。

他深信Ceci是愛著自己，他決心要向Ceci解釋，再向她表白。

 

翌日中午，Jason便在Ceci住宅大堂附近等待她。

Ceci今天穿了一件白色吊帶背心，配以粉紅色的短裙，神彩飛揚。

Jason在遠方等待她走向圍牆，但她卻走向另一方向，進入了停車場。

Jason好生奇怪，尾隨她進去。