我老母話我有未婚妻: 11
露露...我大慨明白你堅決要走的原因了.....
是我對不起你...
晚餐吃得不太快樂..
坐多陣,林姨姨己經主動話要走先
我同媽媽都起身話一齊走...
林姨姨同媽媽爭俾錢,我只係冷眼望左佢地一下
林姨姨就放左手,同我講...
[希望你唔好嬲我地一家啦....最多你放假或者露露放假果陣時見下面囉~~~呢餐姨姨請啦]
[哦...我無嬲你地...只係覺得好難接受露露要走既事實姐...無事,林姨姨放心啦....]
其實個心己經灰到仆街...
一出門口,道別後,我同阿媽行去坐車...
我阿媽口痕問我
[你同露露其實己經去到咩地步?]
[男女朋友]
[阿仔...你其實係玩玩下定係認真?]
我聽到...火都黎埋
[你嗡咩呀,你知唔知你自己嗡緊咩呀八太,你係覺得你個仔係會玩玩下既人定係你根本認為我唔會認真呀?]
[無,問下姐,你洗唔洗咁嬲呀....]
我無理我阿媽,自己行先...
[咁點解一開始,你地全世界要同我講,佢係我未婚妻...?]
果晚返到屋企..露露重未訓..係到睇電視,阿媽入左房之後
露露問我
[點呀,要應付d長輩係唔係好辛苦呢~~~等我幫你按摩下啦~哇哈哈]
[少少咁啦~~~不過有你幫我按摩就咩事都無啦~~]
見到佢咁...心裡面既不開心又突然唔見哂...
我真係唔敢諗第日無左佢係我身邊既日子有幾難捱...
沖完涼之後,露露捉左我入房,幫我按摩
我坐左係床到,佢跪係床上面,係我後面幫我按摩..
雖然己經唔係第一次俾佢按,但係真係覺得好舒服
[露露呀,其實你係唔係學過按摩?]
[無呀,細細個就幫阿媽按摩之麻....]
[哦,咁咪好囉,遲d可以幫你公公按]
[呵~~你妒忌呀?]
[係呀~~你知就好啦快d幫我按多幾下~~唔係就罰你~~~]
[嘻~~罰咩呀]
[罰....罰......]
此時佢見到我既眼神~露露即刻掩住心口講
[喂喂,你想點呀]
[呵呵~~你估錯啦~~~]
然後輕輕錫左佢一啖~~
露露面都紅哂
之後打左我一下叫我死佬
但係好痛
相信大家暑假大多數都會留係屋企多,小弟基本上都係咁
出面大熱天,太陽又曬
出到成身汗麻鬼煩
人又多車又多~
黎黎去去又係做果幾樣活動,你唔悶我都唔悶
所以班人攪活動,都唔係太想去
本想係咁諗既,但係今年多左左露露
自然想出街多過留係屋企啦~~
夏天有兩件活動係最熱門
第一.去CAMP
第二.游水
去camp我就廢時啦,成堆仔,得露露一個女仔,雖然我係到,但係我都唔放心
所以呢~~決定去游水
但係單單去游水又好似悶悶地
所以今年決定攪船河
攪船河基本上只要有船有人有食物就成團
船呢,因為有同學既朋友屋企係有船,做開呢d游船河團~
所以大家只要夾錢就ok了
人~?更加唔洗驚~~
約下約下,己經約齊哂,
有男有女咁就唔怕班人只係侯住露露啦
最後就係食物,班人提議,
一人整一盤野食帶上去
而我同露露呢,就俾班人分左去做一盤蘋果批
原本都無咩野
但係當去船河前一日去買材料果陣時
我先醒起原來批果批係用蘋果整
老老實實,我有陰影
姐係好似你上高登見到人地放youtubelink話係感人故事,
一入去killerjo咁
我肯定你以後開親youtubelink都會先睇回覆再諗勁耐先敢開
有時候見到露露拎住個蘋果我都驚呀...
不過老實講,佢應承左我唔扔我,我就信佢真係唔扔既...
的確...佢唔打算扔我了...
返到屋企...整完....材料多左...
[八輩子~~我地玩個遊戲呀~~]
[你有無睇過d古裝劇以前d古代人會放蘋果係頭之後....]
佢講都未講完我己經估到佢想玩咩,即刻斬釘截鐵同佢講
[唔玩呀,一陣你飛中我咪大獲,我重想去船河睇你著泳衣]
[你聽埋我講先啦~~唔係飛呀~~我打算用把刀....]
[okok,我知我知,斬呀麻斬呀麻,唔好浪費生果啦,你知唔知貧窮國家小朋友知道左會晚晚詛咒你嫁?]
[咁我聽日著t-shirt算啦~~唔玩咪算囉~~~]
[好啦好啦..玩啦玩啦...你小心d呀..]
佢入房,拎返把袖白雪..
.雖然只係木刀,但係我都相信打中面會紅哂同埋痛到仆街...
當我考慮緊要唔要好似成龍先生咁戴個卡巴斯基頭盔果陣時
露露己經開始set緊野
[你企直d~~~等個蘋果自己企到係你個頭到~~~]
[蘋果有腳企咩...]
[嘖,你再嘈我蒙眼呀啦明咪得囉~]
[ok,youwin你斬果陣時單聲先呀,我有咩事都黎得切反應用手檔呀]
[嗯嗯,我黎啦要~~~1!2!3!]
正常人呢,應該都會係左至右/右至左斬埋黎....
但係露露佢由上至下斬落黎....
就算佢打中蘋果我個頭都唔洗要...
我即刻黎招空手入白刃接實佢把刀
[你做咩接住呀,我都未斬]
[你斬左落黎我個頭重洗要既正常人邊到會上至下嫁...]
佢拓住腮,嘟起嘴諗兩諗
[咦,係啵,嘻嘻]
[你係唔係就想笑笑就了事呀露露小姐]
[哎也..人地唔知呀麻~~黎多次,我今次右至左咁斬~~~~]
[唔好啦唔好啦,我求你放過我,我真係好驚你斬到我呀露棋亞小姐,一係最多我扮虛俾你殺死算啦好無呀]
[又好]
於是者..扮左成晚虛
之後兩個好早就訓,因為第二朝倒塌咁早係西貢碼頭集合
屯門出去真係好煩,又要係西隧轉巴士...
有去過西隧(好似係圓方出面?)轉車既人都應該知道,
佢果d巴士站,一前一後真係遠到仆街
我地係巴士訓著左,差d唔知要落車
一落車,半醒之下好似見到要坐果架巴士
但係..........
同我地落車果個站既距離真係有一段距離
自從經過深水步一役...
真係好耐無同露露一齊跑過
未訓醒加有d眼訓而且又未食飽既時候
要人跑真係好辛苦...
我重要背住成袋野...
露露又要抱住盤蘋果批
但係上唔到呢架車分分鐘會遲到...
今日有咁多人去,廢時要人地等我地...唔好意思嫁麻...
於是就追啦....
點知都係追唔到
當萬念俱灰既時候...
我地見到遠處有d奇怪既野....
[喂~~~~八輩子~~~~~~~你地咁早到既]
你老母
原來成班人岩岩先係唔知邊到食完早餐過緊黎坐巴士入西貢碼頭
早知琴晚班人話約一齊出果陣時我都出啦,攪到我早餐都未食
[仆街啦你死仔包,我同露露岩岩重驚遲到追車點知你班仆街就係後面出黎重要撩住牙]
[唔好嬲唔好嬲一陣去到碼頭,有間ok又有麵包鋪,到時我請你地食包包呀]
[係先好講,另外d人呢?到左啦?]
[係呀~~佢地好似唔知早左入去,話搵魚排喎]
諗兩諗咁大個仔都釣過魚,突然之間露露出聲
[我都想釣魚呀但係我無買魚排]
[岩啦~~叫佢地幫我買多兩個啦]
但係我之後發現...買魚排俾露露係錯誤選擇...
等左陣(都唔係陣...走左架巴士好似要等返幾個字呀都
上到巴士,想訓下啦...
點知roadshow又開到勁大聲
(有無人坐開果條巴士線,平時係唔係都係咁大聲?)
幾經辛苦...落到車,過埋條馬路,買左個包食...
[哇~飽哂]
我同露露一齊講,班人見到都係到笑我地
之後同埋班買魚排既人集合埋,就上船~~~
上到船,大家首先拎哂自己整既野食出黎
哇~好壯觀
女仔整野食好睇又好食我一早估到
但係估唔到班死仔包都整左d三文治呀,白汁意粉呀果d野
之後到我同露露拎我地既蘋果批出黎啦~~~
一拎出黎~~~就聽到童子軍講
[wow~愛情結晶終於出世啦~~~]
露露即刻面紅
我就即刻叫佢咪亂講,小心我係蘋果批落左毒
船出海期間~~見無野做,但係又未肚餓,
大家就開始拎uno呀~~麻雀呀~~啤牌出黎玩
但係露露好似好關心個魚排
於是我就問班人拎左魚排先
一出到去海,船家停左船,班人都開始停低手上工作~~
開始除衫換哂跳落水
但係我唔識游水唯有on99係船上面玩同埋影下相
當我準備行出船頭果陣時
見到班女仔係下層行上黎
wow泳衣~~三點式
但係班女仔行哂出去,落哂水之後,我都唔見露露
佢去左邊呢?
當我行到出船頭,見到班死仔係到公魚果陣時
我發現有個身影,特別細粒
[低b露你做咩係到釣唔落去游水呀你重要著住件白色長袖衫,唔熱咩雖然你著短褲..]
[殊!唔好嘈呀!一陣嚇走哂d魚呀]
.......
[露露你...唔會打算今日釣成日魚呀麻...?你件泳衣呢??]
[我呢我呢~~一直都好想試下釣魚~~依家終於可以俾我試下啦]
仆街...大獲...
[好啦好啦~咁我陪你釣啦]
[好呀,不過你行開d喎,我驚你搶哂我d魚]
[關咩事,唔制,我要攬住你釣~~~]
[唔得呀!一陣有魚上釣我拉唔切佢咪死!]
[你又唔係要釣尼斯湖水怪,果d魚毛仔你一手都扯得起啦..你咁大力]
[有啦有啦,我感覺到啦!!]
咁勁抽!?
[我黎幫手!!],我慢慢扯起條魚線,之後發現咩都無
[哎也!一定係d魚見d野食太少唔吸引!我放多d先!]
之後露露釣左勁多料...
餵魚咩大佬你...
[露露呀,人地都要用唔好拎咁多啦...放返d入兜啦~~~~]
[佢地好似用好少都釣到好多魚.....]
果然,我望過去屈機佬果邊,己經又釣到條魚,然後隨手扔返落海
[露露呀不如我地上去曬下太陽好無...]
[咁我點釣魚呀]
[一係咁呀!你去游水直接捉魚咪得囉]
[咦~~又係啵但係捉唔捉到嫁你係唔係呃我嫁~~~]
[聰明左喎]
突然班女仔係到大叫,問有無人玩香蕉船~~~
我唔識游水咪攪我
但係班仔就好踴躍
好可惜~~班女仔補充講左句~~
[男仔同男仔坐,女仔同女仔坐]
成班即刻收哂皮
露露聽到,問我咩叫香蕉船,我就話有架船仔帶住一架好似香蕉既船~~
之後船上既人要鬥最遲跌落海(呢句我當講笑咁講)
佢即刻燃起勝利之心
[我要玩呀海草頭~~~預埋我預埋我~~~~]
露露己經跑向海草頭~~
都係件好事黎既,姐係證明佢要著泳衣啦
當我期待之際,我見住露露著住件白色長袖衫坐左落船仔...
佢除左紮起左頭髮同埋除左拖鞋之外
其他裝備無換過
[露露你件泳衣呢]
[哎也哎也~~我見有d凍呀~~~我去玩啦,你睇住我成為最後既生還者啦八輩子]
海草頭班友頭都大哂,咩野生還者
我心諗
架船仔去到遠遠,我見佢地準備開始要玩了~~
露露坐最前~~係到向我
我又係船向返佢
之後突然佢架船一開
佢就驚到捉返實個扶手
佢驚個樣笑左我勁耐
低b妹好白痴
當香蕉船兜完一彎又一彎,女仔跌完又跌...
露露依然咬緊牙關
最尾,佢果然係最遲跌果個~~
佢跌左落海之後~向住我大叫
[ya~~我係最遲跌果個呀]
[wow好叻喎]
[點解露露,濕左身,都透唔到野既,佢係唔係著左好多件衫]
我心諗邊個講野,望返轉頭原來係巫婆藍
佢係我中學同學,女仔黎,中上質素,醒目女
[你問我問邊個你又做咩唔落水呀~~]
[m到囉頂你,重問,過黎幫手啦,準備食lunch啦]
[係係]
鋪好膠檯布~~幫巫婆拎埋野出黎~~擺好哂~~
露露岩岩好上到黎見到我同巫婆藍搬野
[咦..八輩子你做咩幫手既]
[傻婆無野做咪幫下手囉~~你肚餓未呀~~~]
[未呀我又要幫手,你坐低~~~]
之後露露推返我去張木椅到坐,之後佢自己主動幫巫婆藍手
其實,露露好明顯係誤會左d野
但係我又唔知點出聲好
唔講又驚一陣佢地兩個女仔係廚房唔知會講d咩...
當我接近廚房果陣時,巫婆藍岩岩出黎
見到我咁得閒就口痕話
[果陣時同你家政堂一組你又係咁~~懶懶閒,咩都我做哂好彩你同我一組咋,如果唔係你都唔洗指意合格呀當年]
點知,露露就企係巫婆後面...
露露唔出聲,搬住盤野行過左我地兩個
[露露~~~我幫你啦~~~你休息下啦~~]
[唔洗呀..你地傾計啦...]
之後佢又轉身入返廚房~~
[你女朋友,幾可愛喎]
[洗你講~可愛過你先啦八婆~~
[關你鬼事咩,行開d啦阻住我搬野,你哄返你個女朋友仔啦阿八]
於是我就行左入廚房~~點知唔見人
但係我見到露露係廚房後面間房到原來
於是我慢慢行入去,一開門,只
係見到露露除左外白色長袖衫
我即刻驚到關返度門...
就係呢個時候...
露露自己開返度門,拉住我隻手同我講...
[入黎啦..]
點知當我一轉身望住佢既時候
咦..?
[你...原來裡面重有件短袖衫嫁我岩岩重以為你裡面就係內衣,嚇到我即刻關門tim]
[你就想~~色狼~]
[我緊係想~~做咩呀傻婆叫我入黎]
[你呀你呀...同果個巫婆...係唔係舊情人?]
我->->
[你估下~你覺得呢]
佢即刻
[好啦好啦,唔估啦唔估啦~~唔係呀,朋友黎咋,人地出面大把男仔追,你男朋友我咁既樣,得你要嫁咋]
[呵~~真係?唔準呃我啵]
[係啦係啦~~唔呃你~~~~勾手指尾好無?]
[嘻~~好~~]
之後個傻妹即刻伸手右手,係到同我勾住隻手指尾,係到fingfingfing
[你咁乖,我獎勵你呀~~~你想要咩]
我..
[其實呢,我想你著泳衣我睇]
[哦..咁咋麻~~~我呀~~著左係裡面啦~~只係我見太大風凍凍地,所以先著住d外衣之麻]
當佢想除埋件短袖衫果陣時又覺得自己好變態
[講笑咋~~我想你一陣陪我上去曬太陽好無~?]
[係咪嫁~~唔。好。後。悔。喎］
你一隻一隻字讀出黎好引誘...
[係呀係呀....唔後悔呀~~~]
[噗,老公,你今日好似突然變到好可靠]
見到佢笑個樣咁天真...邊捨得向佢下手
[喂~~食飯啦阿八~快快趣攪埋佢好出黎啦~~]
巫婆藍
[攪咩??]
露露問我
[無~無野~~出去食野啦]
巫婆藍
出到去,等齊人派好野就開餐
雖然只係一個類似朋友大食會既活動
但係我同露露琴晚整完果陣時己經諗緊班人會覺得好唔好食
於是我地兩個開始望下兜蘋果批有無人食
但係班人一開始就洗哂兜波羅腸先
你班人為左飽肚竟然咁求其
一陣飽哂無人食咁我點算呀
於是我開始叫班人,
試下食個蘋果批,露露都係到大力宣傳
[阿八~~老實同你講,我覺得幾好食..不過都係唔夠我整既好食~]
巫婆藍
[唔係喎,我覺得好食過你果兜死人棷汁糕唔知牛奶糕定棷汁糕黎]
童子軍一講完呢句野,巫婆藍己經開始追擊佢,童子軍放低個兜即刻跑走
之後班人都係到大笑
食飽飽,執好野~~~
露露走埋黎同我講~~
[點呀~ok未?上去哂太陽啦]
拎住盒維他奶,上到船頂~~
陽光普照,船頂又暖粒粒,唔會太熱,訓係到真係爽到仆街
飲住維他奶,聽住海浪聲,望住白雲
手抱女友,眼見d朋友係到玩
真係好幸福好休閒
露露突然捱係我肩膀,聞佢頭髮d香味真係
[你眼訓既話訓陣先囉,今朝咁早起身,你都未訓夠嫁啦?]
[唔啦..我驚你一陣驚悶,無人應你你喊呀]
兩個人係船頂..又無人...
我慢慢伸手右手,拓起露露下巴,之後慢慢對位錫落去
露露都閉起左眼
雖然無打車輪,但係輕輕一吻反而合依家呢個咁溫馨既氣氛~~
錫完之後,兩個係到攬埋一舊傻笑,真係好低能
之後架船駛左去唔知咩島仔,個島仔有幾間屋咁...
之後班人係沙灘玩閃避球(又玩
但係我見到有玻璃碎
但係班人話唔怕
但係玩左陣班人都係話危險,玩數字球算
玩雙NUMBER果隻
咁本身都無野,但係玩玩下,有同學俾玻璃碎介親~~
攪到大家都唔想玩,返上船算,點知露露好衰唔衰...
追住隻金毛尋回犬係到跑(果到d外國人養的)
唔小心係果d石屎地仆親,滕頭哥損哂
佢話有d痛...
我驚到即刻抱起佢走向碼頭
點知架船係出面,大家又無拎手機落船打俾船夫
急到我
點知巫婆藍突然趕到我身邊,拎枝清水幫露露洗傷口
然後佢叫班男仔一齊大叫
我地叫到仆街架船終於聽到過黎
一上到船,傷員有3個
陰功,之後我唔俾露露落水
於是者就同露露兩個係船頂訓左成個下午
走果陣時,我同左巫婆藍講唔該
佢只係咬住口煙同我講
[傻啦,我果陣時中學俾老師屈,你咪又係幫過我,咁熟咁客氣做咩鳩呀,好好錫住你女朋友啦~好女黎嫁]
我聽到佢講野,突然覺得好感動,因為連我本來都己經唔記得左件事
之後就各自返屋企~~
返屋企途中,露露同我講
[巫婆藍其實好好人~~佢幫我洗傷口果陣時,佢同我講可能會有少少痛~好細心呀佢]
[係咩係咩~咁我即時抱起你又點先~~~]
[呵呵~~緊係好啦~~最好係你啦]
[傻婆~~今日開唔開心?]
佢望住我,諗左陣~~
[不能說的秘密喔]