[有沙入眼]是咁的，我嘅職業係幫想自殺嘅人寫遺書: 230.我講

雖然我無得揀客，而好多時候我對客人基本上無咩感覺

我唔知係我見太多自殺者而特別敏感，定係因為阿dick個氣場令我對佢無好感

我竟然講左句趕客嘅說話

「你發現自己無錢就溝唔倒女，先突然醒覺自己其實好空虛。」

阿dick望住我，個樣有啲似比人當場揭穿假面具嘅老千





「你講咩呀！」一掌拍落枱，砰左一聲

mos burger啲員工即刻望過黎

擁有一切嘅時候醒覺自己空虛嘅人，先係真正嘅醒覺

無左嘅時候會覺得空虛，係人之常情

而阿dick就一路將人之常情昇華為智者嘅覺醒，用呢樣野合理化自殺行為





不過佢搵得我寫遺書，我當然成全佢

「你冷靜啲，我想搞清個前因後果姐。」

個順序係無錢洗，無錢溝女，溝唔倒，先到覺得空虛

「唔搞清楚，會有啲難寫。」我微笑，打圓場，等阿dick覺得我無意冒犯佢

「就咁啦，我唔勉強你講初戀喇。」





我起身想走

「等陣。」阿dick捉住我

「我講。」

你講，我就聽