[有沙入眼]是咁的，我嘅職業係幫想自殺嘅人寫遺書: 351.遲疑

我除鞋，走入客廳，miki跟住我

阿文撥撥自己額邊嘅頭髮，行到我地對面，坐低

我拎出信封，交比阿文

「幾多錢？」

「唔洗錢。」





「吓？」阿文有少少錯愕

「就當係我報答你，多謝你對我同家姐嘅照顧。」如果唔係有佢，我唔敢想像嗰兩年會幾無助

十八歲無左父母，仲要照顧痙攣同智障嘅金弦，如果無阿文睇住我、幫我，相信我會更加早崩潰

唔洗錢幫阿文寫遺書，或者係死神最後可以幫倒天使嘅事

阿文笑一笑，準備拆開個白信封





有一瞬間，佢纖幼嘅手指停左落黎

我諗翻，嗰日我問阿文最後一次，係咪肯定要寫遺書嘅時候，佢遲疑左兩秒先答我

而家臨開信封，個猶豫跡象又再次出現，雖然只係一剎那，但我睇得好清楚

就好似男女要提升關係之前第一次拖手，或者接吻前嘅猶豫

因為每完成一步，距離目標就近一步





而答我肯定，同拎封遺書出黎，代表阿文距離自殺又行近一步

雖然會猶豫係正常，但到底當中有無包含住唔想死嘅念頭，我仍然未睇得出

但就憑佢嘅一絲猶豫，我覺得阿志救倒佢嘅機會率唔係零

問題係，我望下wtsapp，阿志嘅last seen都係無變過