[有沙入眼]是咁的，我嘅職業係幫想自殺嘅人寫遺書: 456.十三年前

2003年嘅時候，林伯炒股，而我老豆係炒樓

經過沙士之後，股價同樓價暴跌，林伯同老豆面臨就算破產都要死全家嘅難關

佢地根本無得揀

嗰陣，老梁就向我老豆提出，只要幫手做個手術，就可以攞倒一大筆還完錢仲可以用成世嘅巨款

當時我老豆，就算明知miki比老梁搞，都無選擇嘅餘地，而佢做完個手術就成為共犯，連告發老梁都唔做得





至於林伯，佢只係去搵老梁求救嘅時候，撞正做手術嘅日子

「你地⋯⋯做咩？」我老豆坐喺地下喊，無辦法回應倒

「老林，你啱啱咪話想借錢嘅？」老梁摟住林伯嘅搏頭，再講：「咁多年老友，就咁比左你唔駛還又點話？只要你幫我做一樣野就得。」

「做⋯⋯咩野？」

「你只要當咩都無見過，我就比一億你。」





口水滑過喉嚨

只要唔出聲，當唔知有場咁嘅手術，就有一億

咩都唔洗做，只要唔好多嘴，就即刻有一億落袋

一億喎，還左幾百萬大耳窿仲有九千幾萬

層樓可以即刻供完，以後唔洗再翻工，唔洗受老闆氣，仲可以同阿娟周圍去旅行，食好野





有左一億，唔止唔洗跳樓死，連一直以黎嘅生活質素都提升到上流社會嘅水平

只要唔好講出黎，就有一億

林伯最後，答應左

唯一一個條件，係佢地從此斷絕幾十年嘅朋友關係