《唔係啩！我間房幅牆有個窿》: Chapter 26
一直到走進家門，我都在懷疑自己是不是毀了死妹釘的將來。若果我沒有認識死妹釘，她也會跟這邊的水靈一樣得到幸福吧。
「大叔！大叔！喂大叔！」
「吓? ......咩...咩呀? 」
「做咩呀你，嗌咗你咁多聲先應人。」
「哦? ......啊......我突然發夢啫。」我剛才想著認識死妹釘後導致的所有後果，所以腦袋一直在放空。
其實我還是很在意破壞了死妹釘原來的幸福，雖然有點難以啟齒，但我還是問﹕「其實呢...你會唔會怪我㗎? 」
她不明所以﹕「吓? 怪你咩呀? 」
「令到你同...嗰個男仔咁囉......」
她有點不高興﹕「做咩無嗱嗱提起個衰人喎！」頓了一頓，她還是道﹕「邊關你事啫，佢自己賤格咋嘛！如果嗰晚唔係你，我早就......」說到後面，她的聲音越來越小。
她卻不知道，若果沒有我，她就可以跟『Ron』幸福快樂在一起了。
「咁如果...如果你唔知佢係咁嘅人，同咗佢一齊之後佢又對你好專一，又好錫你，咁你會點呀? 」
「佢一啲都唔尊重我，點會錫我喎，佢剩係想同我......咩咋嘛......」聽她的語氣好像還很憤怒似的，若果告訴她我這邊的水靈要跟Ron結婚的話，她肯定會發飆。
「喂唔講個衰人喇！我問你呀，你暑假會做啲咩㗎? 」
「暑假? 我好多年無放暑假囉喎！」
「我緊係唔係問你而家啦，我係問你讀書嗰陣呀......嗯......即係你會考完咗嗰年嘅暑假做咗啲咩呀? 」
「嗰年呀......」那年我到底做了甚麼呢? 中學的暑假好像都是混混噩噩就過去了。
「呀我記得喇！我嗰年去咗做暑期工呀！」
死妹釘的聲音聽起來很興奮﹕「係咩係咩? 咁你去邊度做暑期工呀? 」
「我哋學校附近咪有個商場嘅，個商場咪有間連鎖pizza店嘅，我咪係喺裏面做囉。諗返起都真係幾辛苦，人工又少，都唔知自己點解會捱到。」
「哦，係呀......係呢大叔你幾時生日㗎? 」
「哈！做咩呀? 想送生日禮物比我呀? 」
死妹釘嗔道﹕「你話咗比我知先啦！」
「8月20呀......不過個窿咁細，你送到啲咩比我呀? 」
「唓！我問吓咋嘛，你咪自作多情啦！」
「係喇係喇，發吓夢都唔比咩? 」這個死妹釘，也不用一口回絕，逗一逗我開心也可以吧。
「大叔呀，你估吓我哋可唔可以整大啲個窿呀喇? 」
「吓? 唔知喎...會唔會好危險㗎? 」我不其然的摸了摸洞口，感覺和一般的洞沒有分別。
「應該唔會啩，我哋之前傳紙仔都無事。而且摸落去好似同個普通嘅窿一樣咋嘛。」
「係就係啫，但我覺得都係唔好亂試好啲，我哋始終都唔知個窿係咩。」
「喂大叔呀，我都覺得個窿好似細咗喎，你睇吓。」
我聞言看了看洞口，確實，比較起初見之時好像真的小了點，現在穿過洞孔的幾條繩子都顯得有點擠逼。
「真係喎...點解呢? 」對於這種超自然的事，我自然無法解釋。
死妹釘好像有點不安﹕「個窿......會唔會有一日無咗㗎? ......」
其實它突然出現，當然就會突然消失。雖然我從前沒有考慮過，但就算有一天真的不再出現我也不會覺得奇怪。
「好可能會㗎，話唔定今晚就係我哋最後一晚傾偈呢，哈哈！」
「呀！我唔制！」紙杯傳來她的叫嚷聲，差啲震破我的耳膜。
「喂！聾啦！唔駛嗌得咁大聲呀? 」
「我...我唔要個窿消失呀......」
我打趣道﹕「哈！唔捨得我呀? 」
她急道﹕「咩...咩呀......鬼先唔捨得你呀！死人咸濕大叔！」
我哈哈笑道﹕「唔係唔捨得就得啦！」
她嗔怒道﹕「你！......死人頭！我瞓覺喇！」她說完這個話，就再沒有聲音傳過來了。
「喂? 喂喂? 」搞甚麼呀? 好端端的幹嘛駡人? 姨媽到嗎? 少女的心事真難理解。
老實說我也有點睏，於是我道﹕「咁早抖啦，我都瞓啦。」
我看著牆壁上的洞口，它會消失嗎? 那麼那一天，我和死妹釘就要各自在自己的世界生活了吧！不過我想，我會掛念她的。
兩個星期後，這天晚上又是下雨天。我在Carmen家中，剛享受她為我做的晚餐，正摟著她一起看電影。
我在她耳邊不懷好意的道﹕「我今晚可唔可以攬住你瞓呀? 」
Carmen瞬間滿面通紅，輕輕推開了我，嗔道﹕「我張床好細㗎，瞓唔到兩個人呀。」
我吃吃笑道﹕「我攬實啲咪得囉，再唔係我砸住你瞓又得，你砸住我瞓亦得，得咗！」
她的臉更加紅了，那個嬌豔欲滴的模樣更加吸引我，她佯怒道﹕「你再亂咁噏我就唔睬你！」
雖然我很想推倒她，但也不急在一時，這種事還是你情我願比較好，所以我也只是逗逗她而已。
我裝作可憐兮兮道﹕「唔好唔睬我呀......都係我個嘴啦，亂噏嘢，等我打過佢先。」說罷我就「啪啪啪」的拍了自己的嘴巴幾下。
Carmen馬上抓著我的手，柔聲道﹕「得喇得喇，你唔亂講嘢就得喇。」然後湊上來在我唇上吻了一下，嬌羞道﹕「咁樣滿意未呀? 捨得返屋企啦。」
我撒賴道﹕「唔夠，要錫多啖！」然後伸長了嘴巴。
她沒好氣的看著我，又親了我一下，然後馬上將我推到大門口﹕「好喇，快啲返去沖涼瞓覺喇，聽日仲要返工呀。」
我帶著笑意回到家中，正想去洗澡時，風鈴卻響過不停。
「喂大叔，咁夜先返屋企嘅? OT呀? 」
要跟死妹釘說我跟Carmen已經在拍拖嗎? 嗯......還是等她有了新目標才說吧，免得讓她覺得我丟下她一個人了。
「哦，係呀，啱啱先返到嚟。你搵我有事? 」
她嗔道﹕「有事先搵得你咩? 傾吓偈得唔得呀? 」
「得得得，你點話點好啦。」她還真有大小姐脾氣啊！
「嘻...我前幾日搵到暑期工啦，你估吓係做咩嘅? 」
只得十六歲那有甚麼地方會聘用? 大概是快餐店吧。
「麥記呀? 」
「哈！差唔多喇。不過唔係。」
差不多? 咦? 難道是......
「你唔係話我知你去我做過嗰間餐廳做呀? 」
「Bingo！啱咗！」
她到底要幹甚麼? 為甚麼要到我做暑期工的地方打工?
「喂喂喂！你想做咩呀? 你咪搞16歲嘅我喎！」
「咩搞搞聲咁難聽啫！而家間餐廳你開㗎咩? 我唔去得做㗎? 不過話時話，你16歲個樣同而家都係差唔多，都係成個阿叔咁，呵呵~」
哼！要你管！
「同埋呢，佢真係好鬼怕醜喎，同佢say個hi都即刻口窒窒，又即刻面都紅哂。哈哈哈哈......」紙杯隨即傳來她誇張的恥笑聲。
說話結巴，面紅......他媽的！那邊的我還真是和我一模一樣，遇見吸引的女生就會變成這個樣子。沒想到十六歲的我還真的被她吸引了。
「喂！你究竟想點呀? 」
她嗔道:「咩啫！你而家講到我好似有咩不軌企圖咁，而家識多個朋友都唔得呀？駛唔駛問過你呀？」
我沒好氣道:「你咪識我囉，駛乜又去識多次呀？」
她急道:「咁我平時都剩係夜晚先可以聽到你把聲，我而家想多啲見到你呀嘛！」
我有點垂頭喪氣:「喂你到底想點呀大小姐？做咩咁想見到我啫? 你......」咦？想多點看見我？喂喂喂...不會吧......
「......你唔係鍾意咗我呀？......」
等待了好一會兒都沒有得到回覆，正想說話之際，她就大聲吼叫:「你慳啲啦！你無鏡都搵盤水照吓自己個樣啦！我係覺得你個樣好搞笑，想多啲見到你嚟氹自己開心咋！自大狂！」
搞笑？不是吧？我的樣子很滑稽嗎？
我還沒反應得過來，她又接著道:「唔同你講啦，好眼瞓要瞓覺啦，係咁啦，拜。」
「喂? 喂喂? ......」紙杯再沒有聲音傳過來，看來她真的說睡就睡了。
這個死妹釘，說話不留情面的，甚麼「搞笑」？你的樣子才「搞笑」呢！......嗚...還是找天問問Carmen我的樣子是否真的很可笑吧。
「阿靜，我有啲嘢想問吓你呀。」這天晚上，我跟Carmen在家裏吃飯。
「嗯？問啦。」
「我個樣係咪生得好搞笑呀？」
她抿嘴一笑:「嘻！做咩咁問呀？」
我看著她的笑臉，心裏對她的答案有點不安。
我的臉真的這麽滑稽嗎？
我急道:「你答咗先啦！」
她笑道:「唔係吖，我覺得幾可愛呀！」
天啊！ 竟然用可愛形容我！
我面如死灰:「你知唔知用『可愛』嚟形容一個就嚟三十歲嘅男人係一種侮辱嚟㗎？」
Carmen笑意盈盈的看著我:「我就係鍾意你可愛，唔好咩？」
可愛? 阿靜你當我是甚麼？鬆弛熊嗎？
我苦著臉道﹕「一啲都唔好囉......」
她看著我無奈的樣子不斷在偷笑，過了好一會兒後道﹕「係喎，月尾靈姐姐生日喎，阿Ron問我哋去唔去生日party? 」
水靈生日嗎? 那麼死妹釘的生日也快到吧！
「好呀，不過佢兩個唔駛二人世界咩? 」
「靈姐姐係30號生日，個party係星期六晚27號搞，所以唔會阻到佢哋呀。」
原來死妹釘的生日是6月30日，要準備一份生日禮物給她嗎?