唔係掛！原來真係有鬼！－現代捉鬼故事: 第九章 - Showtime - 8

男子笑笑，以手抓抓頭。
面上帶著一個彷彿一時間不懂反應的尷尬笑容。

「其實都好耐冇人叫我肥榮喇，哈哈哈。」阿榮一面抓頭一面說。

「喂，但係你點解...」

「瘦左咁多？」

我點點頭。




聽講每一個肥仔決定減肥之前都一定有一條爆炸性嘅導火線，
而我相信，如果冇一個好大嘅動力底下，一個肥矮毒嘅士兵更唔會無啦啦變成一個兇神惡殺嘅MK。不過作為朋友，我都從心底想同佢講句恭喜佢可以脫胎換骨。
其實經過上次石澳BBQ 唔見左佢我都估到少少，但係話曬都咁耐冇見，
少少扮關心都需要的。

「仲好講，咪因為你地囉...」阿榮面色突然一沉。

「又關我事？」

「緊係啦！記唔記得上次見係幾時？」阿榮問。





「咪....達德囉？」我自己都唔太肯定我嘅答案，
因為呢段時間發生得太多事。

「嗰次之後，條死八婆又話我細膽又剩，
過左冇幾耐就發左張退伍證比我喇...」

「當兵就話證啫，退伍都有證？」我聽到呢到，
認唔住笑住咁問阿榮。





「妖，嗰條死港女唔好提喇！
之後我咪把心一橫減肥囉！」阿榮邊說話，一邊將自己企得筆直，
好似一個健身教練要哄你上佢堂之時，用盡佢自己方法去Show off 自己嘅身段。雖然隔住幾件衫，但係都隱約睇到佢個差少少掙爆衫嘅胸肌。

「咁你依家都幾Fit 丫，係呢，咁你依家做緊乜？」

「我？幫緊人做捉.....風水佬囉！
我諗過架喇，上次達德嗰單野，點都唔係咁簡單！
咁我個Uncle 又做開呢Ｄ野，學番一技旁身丫嘛！」
阿榮欲言又止，額角上冒出點點汗珠。

不過我都明嘅，正所謂同是天涯淪落人 ，
同人講做捉鬼，唔比人捉入青山都偷笑，仲邊敢奢求有人信。

「哦...都幾好丫，好過我先啦。」我抬頭望望自己呢個乜都冇嘅帳篷。





「咁你都叫做自己生意丫。」

正當此時，頭先入黎搵人嘅西裝古惑佬由帳篷門口走入黎。
阿榮以眼角一望，即時板起了口面。
古惑佬完全無視我，只是走到阿榮身邊，在阿榮耳邊細說了幾句耳語。
阿榮聽完之後，亦輕輕點點頭，再以手勢命令古惑佬離開。
整個過程都令我呆滯左一下。

「放心啦，我同d兄弟講講，以後盡量唔會令你麻煩。
我都有野做緊，我走先喇，第日飲茶！」

我笑笑點頭。
原來一個港女，當一次兵，就可以令一個小毒撚變左古惑佬，
真係嚇一跳。





「呀！差ｄ唔記得！我卡片。」
阿榮雙手將卡片遞上，其禮貌行為與佢今時今日嘅外觀格格不入。

我雙手接過卡片。

阿榮亦轉身揮手道別。

我未有拿起阿榮的卡片細看，因為就在他轉身的一刻，
他外套背面的圖案已經完全將我震懾，手中的卡片亦不知不覺間掉到地上。

深色的荊棘 互相交織，形成幾個英文字母。
而呢個Print，我喺冇幾耐之前見過。

呢個Print，令我諗起當時，喺石澳，一個以獵殺為樂，氣息恐怖嘅狙魂獵人。





只係估唔到，咁快就可以再相遇。
但係我自己清楚感受到，喺我恐懼之中，
由心最底層，隱藏住一絲興奮。

「Jager」。