《台灣個表妹嚟咗我屋企住》【完】: (五十二)葵涌廣場

跟住同小南一齊行到去地鐵站，然後搭地鐵去到葵涌，一出站，就已經見到呢個店鋪林立美食聖地—葵涌廣場。小南識得嚟呢度朝聖，證明佢都唔蠢得哂。

一入到去，小南就好似個地膽咁帶我周圍行，爭啲唔記得小南冇食午餐，佢個肚嘅容量應該相當之大，所以一嚟就瘋狂咁掃小食。

喺入面仲有冷氣嘆⋯真舒服。

雖則話周圍行，但其實佢都幾有目標，識得去一啲出名嘅鋪頭食嘢，沿途真係買咗好鬼多嘢嚟食，多不勝數⋯⋯手卷、超大塊嘅餅、''極邪惡''嘅芝士撈麵等等，真係數唔哂咁滯。

小南就幸福，咁有口福；而我個銀包就陰公，極快收縮。





望住啲錢一張一張咁拎出去買嘢食，心痛死我。:-(

行下行下，去到有度係買爆谷，小南就立即指示話：「爆谷呀！我要食！」

「吓⋯頭先睇戲咪有食囉，又食？」我話。

「仲好講？畀你食哂呀。」

「哈哈⋯」





頭先場戲，我的確將僅餘三分之二嘅爆谷食哂落肚，咁係因為小南掛住攪住我，完全冇食嘅意思，我先至為環保出一分力而食哂佢。

「唔覺意就食哂啫⋯咁去買囉。」

又要拎多張紙幣出去啦。

小南揀咗朱古力味爆谷，拎住一邊行一邊食，但只有佢食緊咋，因為佢話我喺戲院食得太多，所以唔畀我食。

屌你咩？我畀錢㗎！





跟住經過一間賣彩虹沙冰嘅店鋪，小南又話要試下，迫於無奈又買咗，但我只係買咗一份畀小南飲，我驚我再咁洗錢，連搭車返屋企嘅錢都冇，只好省啲洗。

只能眼甘甘咁望住小南飲嗰個誘惑十足嘅彩虹沙冰，不禁令我吞咗一啖口水。

可能小南知道我想飲，於是就將沙冰遞過嚟畀我話：「表哥你想飲呀？一齊飲啦。」

而我就梗係唔會拒絕啦，立即答返佢：「好呀！」

拎住支沙冰飲落去⋯⋯好爽！係透心涼嘅感覺。可以食返啲凍嘢，確實係呢個炎熱夏天最好嘅補品，否則真係中暑都似。

「喂⋯你唔好飲哂呀。」

「唔會嘅。」

「一人一半㗎！」





「畀我飲多啲啦。」

「唔得呀！」

小南想伸手嚟搶，可惜因爲身高問題，畀我一個轉身就避過咗。

「唔制呀！你再飲就要買多杯畀我㗎喇！」

嘩頂！一聽到要買多杯，我就嚇到賴屎，馬上乖乖還返畀小南飲。

不過我飲咗幾啖都滿足喇，表妹真係好，唔介意飲我啲口水尾。

如此親密，偏偏又如此陌生，其實我仲記得對小南嘅種種疑問，究竟佢係咩人呢？但無論點，我深信佢一定唔會加害於我。





我哋一路行緊嘅時候，我就忍唔住咁講⋯⋯

「表妹⋯我有啲嘢想問下你。」