【自殺之後，我遇見死神小姐】救贖七個自殺者的故事: Case 6 得到惡報的扭曲之人—(35)
阿Yan揭露出佢嘅自殺原因，佢嘅左半邊臉頰遭到毀容。
「呢片傷痕係……」能造成如此傷痕，只有燒傷可以做到。
「我天生美麗嘅容貌，就係因為呢片傷痕而變成咁難睇，咁核突！你依家明我點解要自殺未？」阿Yan強行睜大佢嘅左眼望住我，但出盡力都好都只能睜開一條線。
我將阿Yan嘅手拉低，俾佢嘅瀏海遮返住片傷痕。
「連你都覺得我個樣好難睇，唔想睇呀？」阿Yan甩開我隻手。
「唔係，對唔住，我唔係有心要揭妳傷疤。」
「你唔使講，就算唔講我都知我個樣好核突。」
「點解妳塊臉會咁樣？」我問。
「被人淋鏹水。」
我感到驚訝，一個原本容貌漂亮嘅少女，因為被淋鏹水而毀掉容貌，更令我驚訝嘅係，究竟點樣先會令一個人被人淋鏹水？
「點解會被人淋鏹水？」我追問。
「因為？妒忌囉！好似我咁靚嘅人，經常被人妒忌係好正常嘅事，有人唔抵得我咁靚，所以就鏹水淋我，要毀我容囉！」
「即係妳無啦啦被人妒忌，然後被人淋？」聽落難以相信。
「係呀。」
如果係無緣無故嘅話，點會無啦啦就被人淋鏹水？
有可能係阿Yan隱瞞咗啲事情，但如果佢本人係咁講嘅話，就只好相信呢個係事實。
「因為毀容，所以妳就自殺？」如果以阿Yan呢個咁以外表為傲嘅女生，因為毀容而自殺係件合情合理嘅事。
叮噹—！學校鐘聲響起。
「哈！」阿Yan嗤笑一聲，「既然你咁想知，你自己去問下其他人咪知。」
阿Yan指嘅應該係問呢度嘅學生。
「依家鐘聲響放Lunch，你趁放Lunch嘅時候快啲去問啦，如果唔係一陣被校工見到當你擅闖私人地方報警拉你。」
我唔明白阿Yan嘅用意，點解佢唔親自同我講，而係要我去問其他人，不過我亦只能聽從佢嘅建議。
我記得中五班級嘅樓層係五樓，目測阿Yan應該都係屬於高中班級，所以我帶住阿Yan同小妹妹直接行上五樓。
由於放午飯關係，走廊同班房只剩低少量學生。
「咦？你咪係上次嗰個人？」一把男聲從後方傳出，我轉頭望，有個男學生企喺我後方。
我對佢好似有啲印象，佢上次好似有份答我問題。
「點解你成日喺度出現？你又想嚟搵龍梓傑？」男生問。
「唔係，我係想嚟問啲嘢。」
「乜原來你已經嚟過呢度……？喔！唔通你幫過Cathy？」阿Yan突然插嘴。
「Cathy？妳點會識Cathy？」我感到驚訝，點解Cathy嘅名會被阿Yan提及。
「你想搵Cathy？」男生疑惑地問我，「我係識Cathy呀。」
「唔係，我唔係想搵Cathy。」雖然我想從阿Yan口中問出更多事情，但喺其他人面前並唔方便問，「但我的確係想問一個人嘅事。」
「邊個？」
「阿Yan。」
「喔！我識佢呀！你想搵佢？」
「嗯，你知道佢……」我考慮應唔應該咁直接講出嗰個字眼。
「嗯，我哋都知，我諗我哋學校無人唔知。」睇嚟男生明白我嘅意思。
「我想問，你哋知唔知點解佢會咁做？」我依然將字眼修飾一下。
「佢被人淋鏹水，左半邊臉毀容。阿Yan話哂都叫喺我哋學校幾出名嘅靚女，唔單止中五級，高年級同低年級，甚至一啲grad咗嘅師兄中，都有唔少嘅愛慕者，被我哋封做女神。佢接受唔到自己毀容掛！一時間靚女變醜婦，之前追佢啲男仔都對佢避之則吉，我諗佢一時接受唔到太大嘅打擊。」男生將自己嘅揣測道出，而呢啲內容亦係我意料中事。
「係呀……」我應道。
「詳情我都唔係好清楚，我同佢又唔熟，又唔同班，如果你想知嘅話可以問下5E班佢哋，佢哋應該清楚啲。」
「好，唔該你。」
我往5E班班房行過去。
「點解妳會識Cathy？」我再次問阿Yan。
「Cathy都係喺呢度讀。」阿Yan乾脆地答。
「咁……妳係咪清楚有關佢同佢男朋友嘅事？」我忍唔住好奇心問。
「吓？你做咩問返我轉頭？」阿Yan態度卻好愕然，「你唔係應該清楚嘅咩？」
「我唔瞭解。」
阿Yan疑惑地望住我，講：「係呀……但點解我要答你？你唔係嚟幫我嘅咩？你無啦啦問Cathy嘅嘢做咩？定係你唔想幫我？」
「唔係……」
阿Yan唔肯回答我嘅問題，我無再追問落去，況且我係嚟幫阿Yan完成心願，其他事情遲啲再問佢。
我行到5E班房，見到有個比我更高大，五管輪廓幾端正嘅男生企喺班房前，用疑惑嘅目光望向我。
我直接去詢問：「唔好意思，我想問你清唔清楚阿Yan嘅事情？」
「喔？阿Yan？你話佢自殺？」男生直接將呢個字眼道出。
「係。」
「佢被人毀容呀嘛，跟住就出事喇！其實佢呢個人係個極品港女，最鍾意收兵同釣狗公，使啲兵做佢阿四，請佢食飯，甚至買禮物送畀佢嘛！佢平時出入就好似公主出巡咁，成堆兵自動波黐住佢護駕。依家毀咗容，啲兵唔理佢，無得做女神指指點點，我諗佢接受唔到自己女神變醜婦，無得收兵掛！」男生嘅語氣十分惡劣，佢對阿Yan似乎印象極差。
我望向阿Yan，佢雖然裝作無事，但佢嘅眉頭微微地跳動。
「唔信你問下佢哋。」佢指住另一群男生。
我走去問其他同學。
「我諗啲仔唔so佢，佢接受唔到掛！佢平時好鍾意姣仔嘅，ig成日po埋啲露波相，周圍direct啲仔，成日見到佢同唔同嘅男仔出街，轉頭又畀帽人哋戴，都唔知佢被幾多個男人中出過。依家佢變成咁，啲仔見到佢都走啦！或者呢啲就係做太多壞事嘅報應。」一堆男生群講。
「哦！你話佢，佢九成九係接受唔到自己毀容嘅事啦！佢平時份人又做作，扮哂ABC咁款，又鍾意po埋啲p到唔知想點嘅相上ig，都唔知搏乜！見到靚仔有錢仔就狗衝，毒撚窮撚就收做兵。而家毀容，無得再享受呢啲女神福利，睇怕佢接受唔到走去自殺掛！」一個女生道。
「喂！妳把口唔好咁衰啦！佢人都死咗……都算係件不幸嘅事情……」旁邊一個女生勸道。
「咁係呀嘛！妳話有錯咩！同佢一齊拍拖四年條仔，因為被佢嫌無錢，唔夠人靚仔，唔夠人型，就走去飛咗佢，過咗唔夠幾日就同條有錢仔一齊。做人做到佢咁拜金咁cheap都算叫做經典。話唔定佢被人毀容都係因為以前得罪太多人，所以被人報仇……佢都算自作自受啦！」嗰個女生無收到口，似乎佢好憎阿Yan。
阿Yan表情依然無變化，只係默默咁望住眼前女生。
「都幾慘嘅佢……無啦啦毀咗容，對佢嚟講都係件幾慘嘅事，佢身邊啲女仔friend都係同佢扮friend，見佢靚女又受歡迎咪扮同佢friend下，叨下光咁，事實上暗地裡好唔妥佢，啲仔更加唔使講，全部用下體諗嘢先會埋佢身。佢毀咗容，已經唔係單單無咗個外貌咁簡單，而係連朋友都無哂，對佢嚟講等於失去一切，對佢嚟講佢會選擇自殺亦唔難料。」另一名女生講。
「你哋知唔知佢有自殺念頭？」我追問。
「咁又無，自從佢毀完容，就無人再主動接近佢，雖然佢有主動搵返佢啲friend，但無人理佢。至此之後，佢就無再喺學校出過聲。」
綜合咗咁多人嘅睇法，雖然當中部份意見都幾極端，但總括嚟講都係描述到阿Yan係一個有外貌無內涵嘅港女，為人極之做作，只會收兵同拜金，身邊啲人都係想叨光先同佢做朋友，其實身邊啲人暗地裡都極唔妥佢。
「你係咪想知阿Yan嘅事？我有啲嘢可以話畀你知。」有個戴眼鏡，個樣有少少毒嘅男仔同我搭話。
「係咩？」我問。
「雖然阿Yan份人係唔抵幫，但其實佢都幾慘。自從佢毀容之後，啲朋友就離棄佢，佢每日返學都飽受恥笑，無人可憐佢，有啲被佢收過做兵或者妒忌佢嘅女仔重試過當面向佢報復，整蠱佢。本身毀容對個咁靚嘅女仔嚟講已經係好大打擊，重要發現身邊啲人原來咁憎佢，無人支持佢。我試過幫佢出頭，去關心佢，不過都無用呀……得我一個根本幫唔到佢啲咩，到最後都係阻止唔到佢自殺。
「你知道佢想自殺？」我追問。
「都feel到嘅，但到最後都係阻止唔到佢。」男生搖頭道。
「係咁呀……唔該哂你。」
「唔使。」男生嘴角唔協調地翹起，然後離開。
睇嚟阿Yan嘅同學係極討厭佢。就算阿Yan被毀容，阿Yan自殺，佢哋多數人連一絲可憐畀阿Yan都無，而佢哋唔鍾意嘅原因在於阿Yan平時所作所為，而家落得咁嘅收場都叫做自作自受。
有人講過，一個人嘅一生是好是壞，就取決於佢死後人們對佢嘅評價。
人們從唔會去注意一個人嘅功德如何，直到嗰個人死後，先會回想起嗰個人嘅一生事跡，評論佢嘅功德，為佢定下最後嘅裁決。
就好似消防員咁，佢哋每次出勤都可能係冒住生命危險去救人，然而社會上唔會有人注意呢啲功績，主動去尊敬佢哋，直至死後。
如果阿Yan身邊同學對佢嘅死係如此冷淡，阿Yan生前為人應該真係十分差勁。
不過……阿Yan嘅下場，真係抵佢死？