無品神探: 第八節
巴黎皇后酒店，座落巴黎市中心，往來各景點極其便捷。裝潢古雅，服務一流，到巴黎嘅商人、名人最鍾意到此下榻。商人中，包括和實集團CEO廖家豪，喺佢失蹤一個月之前，都係住喺度。若果要知道佢身上發生咩事，皇后酒店應該可以提供到一啲資料。
「大佬，我地做緊咩？坐咗喺度好耐啦喎。」阿強坐喺大堂角嘅一張梳發，打咗個喊露。時間已經係夜晚。
「監視。」岑世英飲啖可樂，扮睇報紙。
「監視？監視邊個？嗰面嗰幾個大波妹？」阿強嘅視線不幸被幾個法國妹嘅身材所吸引，生物求偶嘅本能往往好驚人。即使而家係夜晚，唔少人因為Wifi好啲嘅緣故繼續喺大堂。
「接待員。」皇后酒店職員唔少，但按待員只得一個。一間咁出名嘅酒店，只得一個按待員，佢地亦唔會諗請多個人。因為人多就易組織，一組織就易罷工，而罷工就係法國國寶之一。
「有咩好睇？男人黎咋喎。莫非大佬原來你好呢味？」阿強好似茅塞頓開咁樣。
「好你個頭！」岑世英一野想敲落阿強個頭度。
「今次我冇咁傻！哈哈」阿強側一側身閃開咗。
「死仔敢避？」岑世英又要打阿強。
「大佬，大佬你睇嗰面！」阿強見到岑世英又要打佢，即刻手指指。
岑世英循阿強手指嘅方向，見到接待員走開咗，同阿強講：「阿強，你去跟佢，睇下有冇料到，佢講野或者傾電話你就用手機錄低佢，ok?」
阿強點點頭。
*************************************************************************
昨日。
「岑生，你叫我入黎，係咩事？」一個嬌滴滴嘅短髮OL有啲緊張咁問。
岑世英想點支煙食，諗起身陳耀華講過嘅野，又收番個打火機。
「你問咗我想問嘅野。」岑世英低頭笑咗笑，又望番出黎，問：「你叫咩名？」
「Cindy。我個名…有咩關係？」Cindy依舊尷尷尬尬。
「冇，方便稱呼姐。Cindy，頭先你喺出面，我見你好似有啲野想講。你可以放心同我講，做我呢行，個嘴要密實。」岑世英講。
「…係。我要講…關於陳生嘅野。」Cindy細細聲咁講。
「陳耀華？」
「係。」
*************************************************************************
「大佬，條法國佬去廁所蛇皇傾電話咋喎。」阿強行番黎，將頂帽拉一拉落，等自己個樣收得好啲。
「有冇錄到？」岑世英坐喺同一張梳發度問。
「有。」
「有就得，你send去我電話，而家你坐喺度等。」岑世英除咗頂帽、企起身，行過去接待處。
接待處個法國男人，見到岑世英行過黎，即刻微笑住問： “What can I do for you, sir?” (先生，有咩幫到你？)
“Yes, I am looking for a friend of mine.” (啱呀，我黎搵我老友。)岑世英答。
“Of course, and that would be…?” (冇問題，請問係邊位呢？) 接待員保持微笑。
“This. My friend, Derek.”（呢個，我老友，廖家豪）岑世英從西裝套內袋拎張廖家豪嘅相出黎。
接待員撓咗撓個鼻，個樣有啲疑惑：“ Sir, am I supposed to know him?” （先生，我唔識佢喎。）
岑世英笑咗笑： “Maybe. He stayed in this hotel almost a year ago, for a month. But you should have him in your record, for staying that long in your hotel.”（ 你可能識可能唔識。佢一年前喺度住咗一個月。不過佢住咁耐，酒店紀錄應該會有佢。）
接待員點點頭，低頭禁電腦： “Well, sir. Let me check.” （等我睇個…）
“Yes.Please. He stayed here starting from 3rd July.” （啱啦，唔該。佢七月三日喺度住。）岑世英望住接待員張檯。
“Is his name Liu Ka Ho?” （佢個名係咪廖家豪？）接待員一路低頭check，一路問。
“Yes.”
“Well sir.” 接待員抬頭皺眉，慢慢咁講：“He checked out already on 30th July.” （佢七月三十號就已經走咗。）
岑世英望住接待員，問：“That’s it? Did anything abnormal happen?” （就咁？有冇咩奇怪野發生過？）
接待員望住岑世英對眼，緩緩咁答： “That’s it, sir. Your friend checked out personally. I helped him call a taxi and then he left.” （就係咁，你老友自己走嘅，我幫佢叫架的士，跟住佢就走咗。）
岑世英笑咗笑，跟住點點頭，講： “Ok thanks for your help.” （多謝曬你。）
接待員保持微笑，講：“No problem.” （冇問題。）佢講完係度執張檯。
岑世英行番番去阿強度。阿強喺度用手機睇緊漫畫。
「條法國佬有冇畀料你？」阿強睇住漫畫，問。
岑世英坐低，偷偷地睥個接待員，講：「佢冇畀…不過我照搵到料。」
「咩料？」
岑世英講：「條法國佬收咗錢，講大話。我地等下睇好戲，佢一定有古惑。」