《新月派仙術奇譚》之《毒撚•女神•百鬼夜行》: 18. 出神奪舍

面色慘白的波Sir突然停止了顫抖，直視著木仔說：「咪聽呢條死肥佬亂噏呀！今晚開始特訓，12點正嚟殮房揾我。」
波Sir口中發出的是Lily的嗓音！ 
木仔稍微鎮定下來後說：「你唔係叫我冧清冧楚至嚟搵你㗎咩？」 
「你轉數慢，我等唔切呀！講完！」 
波Sir舉起玻璃樽，把整瓶鮮奶倒在自己頭上，然後綠光從波Sir回到烏鴉身上。 波Sir馬上醒過來，搖搖頭，鮮奶四濺，他狼狽地叫喊：「嘩屌！係咩𨳊嘢玩法呀？！鬼上身啊？！」 
窗外的烏鴉用Lily的嗓音罵道：「唔係鬼上身，呢招係『出神奪舍』！」 
烏鴉說罷，喊出「呀！」一聲後就飛走了。 
木仔和波Sir終於能夠切身體會到為什麼九叔不想再收徒弟了，Lily的恐怖徹底地征服了波Sir的意志，他只好無可奈何地批准了木仔的休假⋯⋯ 
木仔臨離開波Sir的辦公室時尷尬地說：「波Sir，話就話放假，總之你一call我，我就即刻仆返嚟幫手，OK？」 
「屌！仆街啦你，快𨶙D走呀！唔係條臭閪又嚟搞𨳊我喇！」




 「Yes sir！」木仔敬禮後就忡忡離開了。 
##### 
為了準備好晚上的特訓，木仔離開警察局後就直接回到家裏睡覺。睡到半夢半醒之際，手機響起來，木仔在被窩裡掙扎起來接聽。 
「喂木仔，我呢舖有運行喇！」是鯊魚！ 
「中左六合彩啊？」 
「未中，遲D先！系主任叫我招呼兩個大陸交流生，聽講背景好猛㗎！有佢哋射住，我第日隨時做中央台主播啊！十三億人聽我報新聞啊！」 
「哦⋯⋯恭喜你囉⋯⋯」 
「唔好講呢D啦，一齊出嚟玩吖！」 
「唔好囉⋯⋯」木仔心裡酸溜溜地想：「唉，我點同D富二代爭吖，條鯊魚被人食硬啦⋯⋯」 
「佢哋兩個都係靚女嚟㗎！」 




「吓？哦……好呀，啱啱我攞左成個月假啊！」 
「掂晒啦！今晚clubbing預埋你喇！Ladies' Night啊！」 
「今晚？幾點啊⋯⋯」 
「都係十點左右開波啦！你遲到唔緊要，記得埋單就得喇！」 
木仔心想：「女神吹雞，焗跟啦，唯有中途用『天外飛仙』兩頭騰啦⋯⋯」 
##### 
晚上十點鐘，木仔準時到達蘭桂坊。對木仔來講，這裏是一個既熟識又陌生的國度。他從來沒有到這裡喝酒跳舞，之前他來蘭桂坊，都是在大時大節執勤維持秩序。 
木仔沿著長長的斜坡往上走，當兩邊燈紅酒綠的景色讓他目眩神往之際，一把熟識聲音在遠處的人群中嚷著他的名字：「木仔！呢邊呀！」 
鯊魚和另外兩個妙齡少女像「美少女戰士」一字排開在一家夜店外俯視著木仔。她們三個沒有穿「美少女戰士」水手服戰衣，而是穿著更要命的摟屌裙！木仔頓時覺得心如鹿撞！ 
「Betty，Yenny，他就是我說的那個帥哥警察木仔喇。」 




「Hi！我是Yenny喔！」Yenny雀躍地說。 
「你好。」Betty叉著手冷傲的說。 
「Hi⋯⋯」木仔靦腆地打招呼，有點不知所措⋯⋯ 
##### 
鯊魚帶他們進去夜店，在一個角落坐下，點了一瓶香檳和一些小吃。鯊魚跟Betty和Yenny說：「木仔是我的好朋友，你們不要客氣，想要什麼隨便點，來，cheers！」
 「Cheers！」 
木仔心想：「嘩屌！一支酒幾錢蚊，攞嚟飲啤酒飲死幾次都得喇！」 
這時DJ播放的音樂節拍越來越強勁，鯊魚嚷著：「出去跳舞吧！」 
木仔尷尬地說：「我唔識跳喎⋯⋯」 
鯊魚拉著他說：「求其印吓印吓就得啦！」 
Yenny也一起拉著他說：「Come on， baby！」 
在擠得水泄不通的舞池當中，鯊魚和Yenny盡情的擺動，木仔在旁努力地模仿。Betty則繼續保持冷傲，只是隨著節拍輕輕地抖動。三個穿著摟屌裙的妙齡少女很自然地引來了大量狂蜂浪蝶。突然Yenny大叫一聲：「What the fuck！」 
一個帶點醉意的醜男從後抱著Yenny的腰肢！ 
當木仔正要上前阻止時，另外一個猛男已捷足先登，迅速握住醜男的手往外一甩，醜男即時跌倒在地上。 醜男和他的朋友們正要上前動手時，那個猛男露出一根伸縮警棍，威武的喝罵：「咪郁！差人呀！」 
醜男一方自知理虧在先，迅即知難而退，邊走邊咕嚕：「差佬大𨶙晒咩！」 




猛男回頭對木仔說：「喂，木仔，咁啱嘅？又撞到你！？」 
「張力？」木仔詫異的說。 
鯊魚帶著仰慕的神情說：「原來識得㗎，一齊玩啦！」