秦天晴 — 有鬼 新章《畫》正式展開: 露營 — 終章（下）
特殊部隊。。。！？原來靈警都有特殊部隊！？
囧。。。自己身為靈警，但係對靈警嘅好多野都係一無所知。。。睇嚟真係要搵軒轅皓好好咁惡補一下先至得啦！
凌嘯峻見我呆住左，就伸手響我面前揚幾揚，然後同我講
“你有啲咩唔明嘅，你隨時都可以問我架！我知嘅我都會講晒你知！不過我地而家要起程去搵左佢地先，我好擔心。。。佢地會有危險。。。”
聽到佢咁講，我對住佢點點頭，然後就開始向住紅點嘅方向跑過去！簡單啲嚟講，我地係向後跑！因為黑白無常帶住我地飛嘅地方，已經超越左佢地所在嘅位置！
我同呀峻兩個不停咁拔足狂奔，響樹林入面極速穿梭，希望可以儘快咁同佢地會合，因為我地都好擔心佢地會遇到骷髏鬼嘅圍攻！
隨著距離變得越嚟越接近，前面果一陣陣嘅打鬥聲，亦都越嚟越清晰咁傳過嚟
“呀東！左面！丫丫。。。唔係，係右面丫！” 可兒把聲好緊張咁話
“哦哦哦！左面！丫！右面！丫丫！”呀東好慌亂咁回應住可兒嘅說話
“上丫！比卡超！出絕招啦！”呢個應該係樂仔把聲。。。
“頂你！叫我比卡超！”比樂仔叫做比卡超嘅某人好不滿咁大叫。。。然後。。。
“十萬伏特！”佢最後都係叫左出嚟。。。聽得出，果個人應該係子歉。。。
聽到呢啲越聽越令人無言嘅對話，已經令我地知道，佢地的確係遇到骷髏鬼嘅圍攻。。。不過。。。佢地仲講得出呢啲野，咁應該都暫時係安全。。。未有啲咩危險。。。
但係，就響我放心左小小嘅時候，忽然聽到為食狗響度怪叫，然後發出啲哀怨嘅“嗚嗚”聲，之後再嚟左個悲鳴！嚇到我即刻加速咁衝過去睇下發生啲咩事！
呢一刻，如果秦天晴聽得明為食狗講野嘅話，佢應該就唔會咁緊張咁跑過去。。。
其實。。。為食狗嘅果幾下怪叫，係因為思語趁佢同骷髏鬼打緊果陣，突然好認真咁同佢講
“呀狗！大力啲拍落去！拍爛佢你就有骨頭咬架啦！”
令到起手拍緊落隻骷髏鬼個頭度嘅佢，忍唔住出聲反駁
“我唔係叫呀狗丫！邊個話狗一定要咬骨頭架！我又唔係普通嘅狗！仲有，人骨有咩咁好咬丫！咁核突！要咬都咬雞脾啦，有骨有肉好味道丫嘛！”
點知，當佢講完之後，就忽然諗起遠處嘅秦天晴，所以就好委屈咁話
“嗚。。。主人。。。我好掛住你丫。。。你快啲番嚟帶走你個好姊妹啦。。。佢心理變態架。。。叫我咬人骨丫！嗚嗚。。。我想食雞脾丫。。。主人。。。”
講到最後，佢突然醒起，根本就無人聽得明佢講乜野。。。就唯有對天長嘆。。。
“有誰明白我的心丫。。。嗚。。。天丫。。。我可唔可以食少一隻雞脾，用嚟換個傾訴對象番嚟丫！”
嘆完之後，就再次全心投入去打骷髏鬼
可惜秦天晴完全唔知道，原來為食狗係為左呢樣野響度叫，仲以為佢地出左事，所以。。。當佢衝到過去嘅時候，就見到令人傻眼嘅一幕
當我繞過前面果幾棵樹，再穿過果堆生到成個人咁高嘅野草，終於都成功咁見到思語佢地，幸運地，佢地並無我想像中嘅危險，而為食狗亦都無受到啲咩損傷，令到我都安心咁鬆左一口氣
不過。。。佢地而家企嘅位置，同做緊嘅行為，就令到我有啲汗顏
雖然，我之前都已經見識過佢地打細路鬼果陣時嘅瘋狂行動，但係而家比起佢地之前所做嘅野，暴力程度真係直升左幾級！
之前佢地淨係識得拎住隻公仔追住佢地嚟打，而家何止公仔，仲連武器都有埋！幾咁犀利丫！都唔知佢地響荒山野嶺邊度執到幾枝鐵通番嚟！而家嘅佢地，一手拎住隻公仔，一手拎住條鐵通，企響舊大石上面打得不知幾爽！
佢地就好似響度玩扑傻瓜咁，一有骷髏鬼爬上嚟，就拎住鐵通對住佢個頭一野扑落去，再爬上嚟，又再扑落去。。。然後得閒又拎隻公仔對住骷髏鬼出下咒術咁！不斷循環又循環！
好在！我之前已經有幸咁見識過一次佢地嘅呢種行為，所以我只係傻眼左一下，就馬上恢復正常
不過我隔離嘅凌嘯峻就無咁好彩啦！佢好明顯就比樂仔佢地嘅狂暴行為，完完全全咁震撼住！
唉。。。可憐嘅呀峻。。。你終於都知道你班朋友嘅真面目啦！
為佢默哀左三秒，我就拍一拍佢個膊頭，同佢講左聲
“睇開啲啦！兄弟！”然後就繼續望住大石果邊嘅情況
其實思語佢地咁樣打，睇落好似好安全咁，但事實係好危險！骷髏鬼唔會死，會一直爬上嚟，但係人會餓，會攰，會渴！所以佢地企晒響上面，無退路咁死守，最後就只有死路一條！
而家呢個咁嘅環境。。。我諗。。。我地要趁班骷髏鬼未係太多。。。而其他骷髏鬼又未嚟到之前。。。將佢地從石頭上面帶出嚟！
於是我就轉身同呀峻講左聲，然後就走過去，對住佢地大叫一聲
“為食狗，幫佢地開路！思語你地快啲跑過嚟我呢邊！”
講完，我就拎出符紙，對住面前果堆骷髏大軍不停咁飛過去，同時不斷咁唸
“天地無極，乾坤借法！火矛！”
“天地無極，乾坤借法！水箭！”
“乾坤無極，風雷受命！風刃！”
“乾坤無極，風雷受命！雷降！”
四種咒術不停咁互換，對我面前嘅骷髏鬼不斷咁進行轟炸！
為食狗聽到我講，就配合住我嘅行動！用頭撞，用尾掃，不停咁將啲骷髏鬼甩開！
呀峻響我大叫左果聲之後，就一直企響我身邊，用長槍掩護住我，而其他人就即刻拎實條鐵通，邊行邊開路！
呢個行動大家都配合得好好，所以一直都進行得好順利！
不過去到最後。。。意外。。。始終都係發生左。。。
可兒響拍開隻骷髏鬼嘅時候，唔小心將條鐵通插左入隻骷髏鬼嘅骨罅裡面！搞到棘實左拎唔番出嚟！而比佢插住嘅骷髏鬼就即刻趁機反抗，令到可兒跌左落地！
後面班骷髏鬼一見到地上面嘅可兒，就立即向住佢撲過去！
弊！我即刻用符咒向住果堆骷髏鬼打過去！而子歉就即刻將可兒從地上扶起嚟！但由於我啱啱停低左開路嘅動作，所以搞到成個行動都打亂晒。。。結果。。。我地就被骷髏鬼完全咁包圍住。。。
不過，我地嘅反應都好快，馬上就背對背咁圍成一個圓圈，準備再次打個缺口走出去！但係。。。已經開始有越嚟越多嘅骷髏鬼走緊過嚟。。。再唔快啲郁手嘅話。。。我地要殺出重圍就只會越嚟越難！
唉。。。今次真係麻煩啦。。。
我輕輕咁講左一個方向，然後數左個一，二，三之後，就準備再次殺出一條新血路，點知呢個時候，突然有個粉紅色嘅光圈，將我地完完全全咁包圍住！
咩嚟架。。。咁奇怪嘅。。。？
我地望住個光圈，完全愕住企左響度。。。而我地對面嘅果班骷髏鬼，見到呢個光圈之後，竟然慢慢咁向後退開！
對於呢個特殊情況，大家都你眼望我眼，完全唔知發生啲咩事。。。只有為食狗望住我前面不停咁響度發出啲“咕咕”聲！
見到佢咁嘅反應，我心諗
“唔係掛。。。一波未停一波又起！？唉。。。求神拜佛，千祈唔好又走隻乜野王，乜野大佬出嚟丫。。。嚟多隻我地就真係要死架啦！”
我深深咁吸左一口氣，然後鼓起勇氣咁順住佢嘅方向。慢慢咁望過去，當然，見到嘅並唔係啲咩大佬，而係。。。
我之前見到兩次嘅果個細路。。。
果個細路一見我望過去，就即刻向住我招手！
荒山野嶺，有個肯定唔係人嘅細路面無表情咁對住你招手，真係心血少啲都比佢嚇親！
見佢不停咁招手。。。咁我地應該過去。。。定唔過去呢。。。？
上次多得佢指住棵芭蕉樹，我地先至可以走得出個樹林。。。
我諗。。。佢咁佢應該係無惡意掛。。。？
就響我內心不斷咁掙扎去定唔去嘅時候，一直面無表情嘅細路。。。竟然望住我皺眉加嘟嘴，然後做左一樣令到我眼都凸埋嘅野！
佢伸直隻手，指住我面前果幾隻骷髏鬼，對住佢地嘅心口，發出左一道粉紅色光芒嘅射線！
“噗！噗！噗！”全中紅心！
我面前果幾隻骷髏鬼嘅心口，即時穿左一個頭咁大嘅窿！
為食狗即時對住個細路吠左一聲，樂仔佢地就嚇到成個人都彈左一彈，而呀峻就好警惕咁望住果個細路嘅方向
見到呢個情況，我再望一望身邊圍住果個圈圈，我大概明白，果個細路係響度一直咁保護住我地。。。
於是我就望住呀峻同佢講
“我地跟住佢走。。。佢會保護我地離開呢度。。。”
講完，我就伸手指一指個細路，點知呀峻佢聽我講完，再望一望我指嘅位置之後，竟然神色凝重咁同我講
“我乜野都見唔到。。。你。。。見到啲乜野。。。”
咦。。。？見唔到！？我望一望呀峻，再望一望細路。。。又再望一望呀峻。。。
唔係掛。。。唔會得我一個見到掛。。。
但係當我問埋其他人之後，得出嘅結論係。。。得我同為食狗兩個先至可以見到佢！
對於呢個發現，我都唔知應該笑好定喊好！
細路一直嘟住個嘴，不停咁向住我招手，而響我地嘅身後，就已經堆滿晒骷髏鬼！所以。。。我地其實根本就無得揀。。。
我輕輕咁講左句“跟住我！”，就向住細路行過去，其他人聽到之後，亦都跟住我後面行過嚟，我地一邊行，個粉紅圈就一邊緊緊咁包圍住我地，而骷髏鬼就一直緊隨住我地嘅身後面。。。
我地一直行，一直慢慢咁跟住佢行，雖然唔知佢要帶我地去邊，但係依照呀峻部電話嘅GPS顯示，我地而家係向住山頂進發！
但係。。。咁落去都唔係辦法！距離兩個鐘頭嘅時限，就只係淨番一個鐘。。。
時間無多！我唯有停低響度，對住個細路開口叫左聲
“小朋友。。。”
個細路聽到我嘅叫聲，就即刻停底響度，擰轉身好疑惑咁望住我
見佢眼甘甘咁望住我，我就吞一吞口水，然後搏一搏咁問
“我地要去山頂搵一棵桃樹，一棵好耐之前種嘅桃樹，你有無見過丫？”
我問完之後，佢就即刻對住我，點頭，再點頭，不停咁快速點頭
見佢點頭，我即刻鬆左一口氣，至少山頂都有棵桃樹！雖然唔肯定係咪陣眼所在嘅位置，但係有個希望，都好過乜都無丫！不過。。。望住狂點頭嘅佢。。。唔知點解總係覺得佢個頭會突然之間甩左出嚟。。。
所以，我決定馬上問過另一個問題
“咁你可唔可以帶我地過去。。。？我地要儘快去到！”
聽到我咁問，佢個頭終於都停左落嚟，望住我眨左兩下眼，然後。。。佢轉身就跑。。。！仲連帶埋佢果個粉紅保護圈都跟埋佢一齊跑！
望住飛走左嘅圈圈。。。我伸手扶額。。。心諗。。。今次慘啦。。。！
果班骷髏鬼一見到我地無左個保護圈，就即刻向住我地撲上嚟！
我地見到咁嘅情況，就緊係三十六計，走為上計啦！我即刻跟住細路跑，而佢地就跟住我跑，而班骷髏鬼就跟住我地尾不停咁追住我地！
哇丫。。。。！實在係太刺激啦！刺激到我地個個都邊跑邊慘叫丫！因為班骷髏鬼唔會腳軟！我地會丫！
好在當佢地就快追上我地，而我地又跑到無力嘅時候，細路就會停低響我地前面，直到我地喘完氣之後，佢先至會繼續跑，然後我地又再次跟住佢跑落去！
如是者，跑停跑停左五次之後，我地除左跑到無左大半條人命之外，都總算平安咁上到山頂！
而上到山頂之後，我地就比眼前嘅果棵樹深深咁震撼住！因為棵樹實在係太大棵啦！而且茂盛嘅樹枝上面，長滿左粉紅色嘅花！響月光嘅照耀之下，別有一番風味。。。
可惜，我地而家唔係欣賞風景嘅時候，而且情況亦都唔許可！
望一望隻錶，只係淨番十分鐘！
但係呢度究竟係咪陣眼嘅所在點，我地根本就唔知道！
不過就算唔係，我地都無辦法再去搵第二棵桃樹。。。
儘過力。。。拼過命。。。而家就唯有聽天由命！
呀峻行到去樹腳邊，然後拎起枝長槍，向住手腕位置輕輕咁割開。。。
鮮血立即由傷口度慢慢咁向住地下流落嚟
而隨住呀峻嘅行動，所有嘅骷髏鬼都突然暴躁起嚟！佢地竟然一個個都唔怕死咁向住我地撲埋嚟！一隻兩隻三隻，不停咁撲，撲到粉紅圈出現缺口，就衝入嚟向住呀峻撲過去！
我地即刻圍住呀峻保護佢！而細路就擋住響我地面前，撐起左三層保護罩！然後擰轉頭，望住我奶聲奶氣咁話
“你。。。血。。。快。。。！”
我。。。血。。。快。。。！？即係。。。
用我啲血！快！？
我馬上拎起呀峻枝長槍，學佢對住自己隻手腕，然後一下咁割落去！嚇到呀峻即刻“喂。。。！”左我一聲，不過已經太遲啦。。。
一割落去。。。血。。。瞬間不停咁流出嚟，流得比呀峻更加快。。。更加多。。。亦都連帶住我嘅眼淚，不斷咁流出嚟。。。因為實在係太痛啦！！！
嗚。。。陣法你一定要激活丫！如果唔係。。。我死都死得唔眼閉架！
或者，上天聽到我嘅心聲，響我腳軟跌左落地嘅時候，地上面終於都發出左一陣陣嘅金光，不過啲光並唔強烈，而係暗暗淡淡咁。。。
我望一望隻錶。。。淨番三分鐘。。。
擰過去望一望思語佢地果邊。。。得番最後一層保護罩。。。
再望一望眼前，面色蒼白嘅呀峻。。。
我合埋雙眼，吸左一口氣。。。然後擘大眼，響為食狗嘅悲鳴之下，我將自己另一隻手嘅手腕，向住長槍嘅位置一下擦過去。。。
痛。。。好痛。。。痛到入心入肺。。。
望住血流如注嘅雙手。。。我內心好無奈咁諗。。。如果咁都唔夠嘅話。。。我就真係無能為力啦。。。
金光慢慢咁變得越嚟越強烈，而圍繞住粉紅保護罩嘅果堆骷髏鬼，亦都已經開始停止左活動，但係陣法偏偏就仲未完全咁激活。。。
就響呢個時候，我身邊嘅周圍，突然發出左強烈嘅粉色光芒，向住地面一下咁打落去！
金光瞬間同粉光融合，變成烈光，照耀住整個山頭！然後地上面終於都出現左《五行封印陣》呢五個大字！
見到呢五個字，呼。。。我終於都安樂晒。。。成個人都癱瘓左響桃樹嘅腳下。。。
我望住呀峻爬埋嚟我身邊，對住我嘅雙手施咒，再望住思語佢地喊晒口咁跑埋嚟，呢一刻。。。我好想對佢地笑一笑，好想同佢地講”我無事”，但係我完全做唔到。。。
好攰。。。好眼瞓丫。。。
我慢慢咁合埋我嘅雙眼，但係合埋左之後，就聽到一把陌生嘅男人聲，不停響我耳邊一句又一句咁話
“晴晴！唔好瞓丫！”
“晴晴！快啲擘大隻眼！望住我！”
“秦天晴！你敢瞓。。。你以後就知味道！”
我敢瞓，我以後就知味道！？
哼！敢威脅我！好丫！睇下點！
呢一刻，秦天晴根本就唔知道同佢講野嘅人，對佢以後嘅人生會影響咁大，而且仲大到無上限嘅地步。。。
以至於佢嘅往後，一諗番起今日。。。都會非常後悔自己當初點解唔努力咁擘大對眼呢。。。