《我獲得一個願望，我選擇左係學校做一次男神》: 第七十章：咖啡妹妹

今日天蕊要係屋企趕工，我都費事阻佢，去左CU行下，真係成日都見到有人特登入黎影相，做遊客，CU就黎變做一個旅遊景點。

「唔該，要杯Mocha啊。」行到無無聊聊，去左上次買Mocha比天蕊飲個間咖啡店，坐低睇下書，扮下文青，享受下清淨既環境，誰不知，咁都有人搭枱。

望下間咖啡店，明明就人跡罕見，但係我眼前既女仔係都要坐落黎。

再望真啲，原來係頭先冲咖啡個個女仔。


「杯Mocha好唔好飲啊？」





「下？好，唔錯啊。」突如其來既一條問題，真係有啲唐突。

「真係既？我見你琴日已經買我杯Mocha飲啦喎。」邊有人咁搞笑，話杯Mocha係自己既。

「係啊，我覺得唔錯咪買都杯囉，你咁得閒，唔洗冲咖啡啦咩？」

「一個客都無喎，冲比鬼飲咩。」

「我唔係客人咩，真係啊。」





「係呢，我叫藍楠啊，你呢？」

「藍楠幾好聽喎，我叫阿明。」

「阿明，小明啊？哈哈哈...」呢個咖啡妹藍楠好小朋友，但係可以自製笑點，一個樂觀但係矮小既女仔。

「咦，你有睇呢本書架？」我手上攞住一本村上春樹既挪威的森林，唔通有知音人？

「係啊，我覺得幾好睇啊。」其實我完全未開始睇，都話只係扮下文青，但係藍楠呢個女仔又比我呢本書吸引到。





「你知唔知啊，挪威的森林入面呢...」

佢講左差唔多半個鐘，我差唔多無講過野，只係不斷點頭，因為我唔知內容係咩，唔能夠同佢討論。

「講到有啲攰添。」

藍楠一手攞起我杯咖啡，一啖飲到盡頭，見到呢個情景，我呆左。

「啊！舒服晒！唔好意思啊，飲左你杯野添，再冲多杯比你啊。」佢好得意咁摸摸自己個頭，低頭講野，好似帶著內疚感。

「唔洗啦，傻妹，最多下次黎你冲杯特飲比我啦。」

「嗯，好啦。」





「咁我走先啦，你都有客黎啦，Bye。」

「Bye Bye。」藍楠露出可愛既笑容，雖然矮小，但係唔會忘記佢金黃色既秀髮，長長既馬尾，烏黑既雙眸，帶著天真爛漫既笑容，唔講都以為佢只係一個中學生；望住佢，又令我諗返起芊雪，唔知，佢而家點呢？





咁可愛，動人既女仔，加上識冲咖啡呢個技能，我對藍楠充滿了好奇心，好想認識佢更多，更深。




「今晚食飯？」





「好啊，去邊到食？」天蕊提出左一個情侶之間第二難答既問題，第一當然就係阿媽同女朋友跌落海，你會救邊個，可惜，我根本唔識游水，呵。

「我煮？」但係我知道有個答案，係萬能，就係我煮。

「真係既？」天蕊比左個驚訝既表情符號我，睇黎我要讓佢對我刮目相看。

「係啊，你等陣去我樓下，我係個到等你。」

「好啦，唔好食既話，我以後唔比你入廚房架。」天蕊講得出呢句野，煮飯應

該都有一手，唔可以衰比天蕊睇！








買完餸，返屋企，準備好材料，時間亦啱啱好，落去接天蕊先。

不過，落到去，見到既並非天蕊，而係藍楠...

「咦，又見到你既？真係有緣啊。」

「係囉，你住呢頭架？」其實係屋企樓下同一個女仔傾計，比天蕊見到，肯定會有啲誤會。

「唔係啊，我黎同親戚食飯咋，我住北角。」

「你企係到等人啊？」

「係啊，我等我女朋友。」

「哦，女朋友...」聽到我有女朋友之後，藍楠好似有啲失落。





「咁，唔阻你啦，再見。」一秒之後，佢又可以綻放佢燦爛帶有陽光既笑容，呢個女仔真係搞笑。

「再見。」




「阿明！」天蕊見到我立即攬住我，唔通佢見到藍楠？

「做咩啊？」

「好耐無見啦，掛住你啊。」哦，原來係咁，嚇死我。

「上去先啦，肚餓啦。」

「嗯。」我拖住天蕊隻手，好似兩公婆咁，返屋企，好溫馨。




「係呢，今晚你煮咩啊？」哈，我當然唔會話比佢知。

「等陣你咪知囉。」

「懶神秘咁。」

入到門口，哎呀，屋企隻小白衝左出黎，唔記得擺返佢入房添，唔知天蕊驚唔驚狗...

「好得意啊，你叫咩名啊。」哇，一秒做朋友？哈，鍾意小白就好啦，等陣煮飯既時候就唔會阻住我啦。

「你地去梳發玩啦。」天蕊純熟咁抱起小白，帶佢去到梳發到坐。

「唔阻你玩啦，我去煮飯，等住今晚成為你人生最好食既晚餐啦。」