《我獲得一個願望，我選擇左係學校做一次男神》: 第八十四章：遺下

「阿明！」

「哎呀，啲雪整污糟塊雪地添。」血跡濺到成地都係，有啲恐怖。

「你無野阿嘛。」

「無，咳少少血啫。」

「朋友，你無事阿嘛？使唔使車你去醫院？」





「唔使。」

係呢一刻，我感受到生命即將黎我好遠。

「穎心，係我背囊細拉鍊有一封信，等陣你可以攞黎睇。」

「好對唔住，唔知點解，未到第三日，我就要離開你。」

「咩話...點解啊！」





「我感受到死神已經黎緊接我，但係我好唔捨得你，好唔捨得呢個世界，但係好多謝你，穎心，你為我既人生點上左一滴顏料，就讓我從前黑白既生命變得燦爛。」

「封信寫左好多我要講既野，而家我諗我都講唔到幾多野。」

「我只係想...咳咳...」

「想咩？講啦...」見到穎心喊到崩潰既樣貌，我都走得有啲心酸。

「想你笑住...送我走...」








再見，穎心，再見，世界。




「阿明！！！」穎心向天大叫，但無人回應，佢亦跪低，雙手撐低，流下既眼淚，亦足以融化雪地。

「唔好走...」穎心捉住阿明倒地既身體，開始變冷既身體，穎心甚至成個人撲去阿明身上，但係阿明毫無感覺。

「唔好掉低我自一個...嗚...」








估唔到我會客死異鄉，不過唔緊要啦，地方咁靚，北極光咁正，死係到都唔怕，離開左呢個世界之後，望住穎心攬住我，我都估到佢會好激動。但係我唔想佢自己一個搭飛機返香港，呢個路途會好難受，十幾個鐘，自己一個挨，兩個人去，一個人返，的確有啲唏噓，但係無辦法，我始終係死人一個，陪唔到穎心，

只係希望佢唔好咁傷心，快啲精神返。




「直升機黎左啦，不如你比你朋友上直升機先啦。」

「佢係咪會飛返香港架？」

「係啊，放心啦，我而家車你返機場。」





「唔該你。」




係車程上面，我一路望住窗外風景，亦係到斷斷續續咁喊，的確，我係接受唔到阿明離開左呢個世界，但係我知道佢會過得更好。

好多謝佢帶我黎呢到，比左一個絕美既旅程我，我亦知道佢想黎呢到締造一個最後既回憶比我。




我打開阿明所講既信封，裡面都幾多字。








穎心：

多謝你，能夠作我人生完美既句號，唔知你記唔記得中四個年我同你表白之後，我改變左好多，你離開左香港，離開左我，係呢幾年我都認識左唔少女仔，同過唔少女仔拍拖，但係我發覺，佢地都唔係合適我既女仔，而你，洛穎心，先係最合適我既女仔。




我發覺自己唔能夠忘記你，即使我拍緊拖，即使我做緊野，我腦海都會勾起你，

唔知你會唔會呢？雖然我二十幾歲就走左，但係你仲有好多年日，唔好因為我，而唔去同其他男仔一齊；幸福你已經品嚐過，但係終生既幸福我都要靠其他男仔比你啦；可能我使命真係完成，死而無憾，唯一有少少遺憾既就係你，我知道你肯定會因為我而成日喊，喊到成隻豬頭咁，記住啊，望上天，就會見到我架啦，我話過以後都陪住你架嘛，不過點都好啦，我，白痴明，永遠都咁愛你。








雖然我同你經歷既唔係好多，更加曾經分隔兩地，但係多係你曾經黎尋找過我，只可惜我個次扮唔認得你，好對唔住。第二次你再黎到香港揾我，一開始我都係衰衰地咁同你講野，誓死都估唔到你仲鍾意我，我覺得辜負過太多人，包括你，我唔可以再玩玩下，呢個真係唔係白痴明，從前既白痴明好傻，無人鍾意，甚至好專一，表白凈係識得送朱古力比人，仲要暈低左，係你，你改變我返到最初咁樣，多謝你。




唔知點解我咁衰，你都依然咁愛我，但係我知道，愛一個人，唔需要理由，我亦開始能夠體會，對住你，我愛你啲咩？就係你比我既個種感覺，個種難以言喻既感覺。

哈，寫寫下我都唔知自己寫緊啲咩，對住你，我只係想從前未講出聲，最真摯既講句話比你知，所謂既「遺書」已經變得唔似「遺書」。




穎心，唔知你相唔相信緣分呢？但係我相信，我地咁有緣分，我相信，終有一日，我會化成蝴蝶，飛過黎，揾到我人生要採既蜜，多謝你，穎心。




最後想你記得唔係呢啲既字，呢啲字始終都會過去，希望你珍重既係我地所擁有既回憶，無論係苦，係酸，係甜亦好，回憶，都係屬於我地兩個既。


開開心心咁生活落去啊！

白痴明上


（仍有下文）