簡介

里數太少 比賽太多





阿榮

二零一六年九月十二日

我叫做阿榮,五年前今日開始跑步,估唔到五年後今日,我竟然仲有跑步。我自細鍾意睇傑斯踢波,諗住大個做足球員。點知每次麥當勞青訓我都無份,跟住就唔好講!我由winning 開始到而家Fifa,我都會edit 自己入game成為球王。

Week 1

MON





今日有報導話最新港姐講粗口,我先至知尋晚原來選港姐,成晚我同老婆坐係梳化都係睇另一個台。我從來對港姐印象都係麻麻,細個試過有一屆睇足全場,而嗰屆冠軍係向海嵐。
----------------------------

TUE

中午食飯時間睇左一個節目講班男女脫毒, 我懷疑佢地既角色擺位係參考稻中兵團。今個星期日有比賽, 放工彈閘去攞選手包,原來間舖咁近我返工地方。以後買裝備又多一個地方。今晚冇去跑步,選擇去打波。
----------------------------

WED





十點開完舖,望吓電話點解咁多訊息,,原來係話可以報渣馬。連我老婆都問我報咗未,我完全唔記得咗係今日開始。反正有兩個星期時間去報名抽籤,早報又唔會有著數,而且我又一早報左台北馬。

今年改左抽籤代替先報先得,梗會有支持同反對。你問我抽籤好唔好?我會話先報先得好D囉,原因係跑步呢個運動,你要完成目標係有方法冇捷徑,你係要付出,花時間練習而唔係等運到。想報到比賽就比報名時間更早起身,甚至隨時預備plan B「郵寄報名」。

而抽籤的確係公平D,但你問我咩係公平?對自己有利咪公平囉,因為我咁多年都報到渣打全馬嘛。至於有人話報跑會咪可以優先報,實有位。大佬呀,唔通我想睇劉德華演唱會就加入華仔天地咩!
----------------------------

THU

今日中秋,老婆一早講定去外母屋企食飯。我暗中祺求老闆唔好早放。結果我五點已經係外母屋企附近既超市,我企左係賣酒嗰行超過一個鐘。突然電話響:老婆:「係邊?」我㖔㖔吐吐咁話:「超市,駛唔駛買酒上黎?」「榮,上黎啦,大家都到齊。」我再問:「夠唔夠餸,駛唔駛斬料?」語氣加重:「今晚好多餸,你咩都唔駛買,快D上黎!」





超市離外母屋企只隔一條百幾米斜路,但我覺得呢條斜路係難行過西隧嗰條。係踏出超市門口嗰一刻,我有諗過買包煙,等我食支事前煙,之後好好上路。
--------------------------------------

FRI

尋晚睇理曼聯作客比賽先訓,其實成場波我睇咗十分鐘到,一起身見到落後緊就入房訓。原本諗住八點起身去出頂跑港島徑, 結果十二點我先出門口係屋企附近跑幾K就算。今日好猛太陽,我懷疑我中暑, 結果成個下晝冇出過街。夜晚食完飯後突然有種罪惡感,走去左打一陣波。返黎俾老婆話一日要洗兩轉衫。
----------------------------

SAT

我係返六日工,所以今日要開工。大家既心情都係想快D放工,我都唔例外。

今朝大腿有D酸,可能尋晚打波太落力,想彌補星期五朝早個運動量。放工whatsapp 老婆叫佢今晚煮多D, 等我聽朝比賽前有早餐食。
----------------------------





SUN

清晨六點鐘鬧鐘響,作為港島區居民,諗起比平時返工仲早起身, 仲要去東涌比賽好似好戇居。咁點解仲要報呢個比賽?因為我貪佢跑完七K就有完成獎牌。而我之前為山賽買番黎既背包同山鞋終於可以攞出黎著吓,因為咁我經常比老婆話我亂買野。

本來加利仔都有參加,但佢話今日要練長課所以唔黎。用左個半鐘頭多D終於黎到鳳凰山山頂,係最後嗰段上石級,我唔擔心隻腳會抽筋,反而係擔心前面嗰個人會唔會放屁多D。

係離地九百三十四米飲大會提供既咖啡,望住心曠神怡既山景。如果呢度有理乾淨既廁所就完美,因為我有D搞肚痛。返到屋企都兩點,沖完涼訓一陣就起身食飯。曼聯亦都係呢個時候開波,九十分鐘後有D失落,我醒起我仲未熨黎緊成個星期返工著既恤衫。
----------------------------

 
已有 0 人追稿