呢排天氣真係唔知搞咩,時晴時雨,搞到好噏焗,真係好討厭!
好彩我間舖開係近海邊,有啲海風吹下,唔係日日咁開冷氣,齋俾電費都唔掂!
 
「衰婆!好熱,整杯凍嘢嚟飲啦!」Taz一入嚟咩都唔理,就一個屁股坐係吧枱角落。
我整咗杯Homemade Lemonade俾佢,由得佢繼續玩電話。
呢個係佢個專屬位,佢話貪呢個位可以一見望晒全間舖,同露天位喎。
講真,我間Coffee Shop又唔係真係咁大,其實咩位置基本上都一眼睇晒架啦。
講嚟講去,咪又係情意結問題。
 
情意結,呢間Coffee Shop對我嚟講,都係一個情意結。


 
我間舖日頭就係Coffee Shop,賣下咖啡飲品三文治蛋糕咁;夜晚通常就俾人包場搞party。但好多時都係自己班friend嚟踩場,一個帶一個咁,搞到晚晚都好似les bar咁。
 
不過唔係得班friend撐場,我間舖執咗九世。BTW, 我呢到冇酒賣,要飲,隔離街間七仔幫到你。所有friend同客都知規矩,唔知,唔好嚟!
 
規矩係咩?OK!就講多次。
呢到冇酒牌,我費事申請。但冇人講過你唔可以自己買酒入嚟飲,當然,有咩事自己負責。
樓上有三間房。一間我自己嘅,另外兩間,係短租。前一晚玩夜咗,需要間房,或者需要搬開一排,可以諗下我呢到架。你就當我呢到係coffee shop 加民宿囉。




咩話?好似好熟口面?唔出奇呀!我幾年前去咗台灣學師,我間舖概念上都係抄台灣嗰間。嗰間叫OC,店主叫Ocean。

我?我咪Sky! 
This is my coffee shop.  
Welcome to Knot!