「你…一定要去?」啫喱一臉無奈。「其實我哋可以幫你趕走個人,或者我哋可以再傾下點對付佢都得架。唔需要…」
「啫喱! 多謝你。」我阻止啫喱繼續講,佢都有少少愕然。「不過暫時我自己都搞得掂。真架,信我。」最後呢幾句,我係同所有人講。
 
我唔等其他人有咩反應,就行咗去門口。
臨出去吩咐咗Kwan仔鎖門,同埋回頭同啫喱講咗句:「今晚可唔可以等一等我?我有啲嘢想同你講。」
啫喱點一點頭,我就出咗去了。
 
我微笑行近H,佢好有風度咁我開車門,讓我先上車。
BMW好快就起咗步,向金鐘方向出發。
 


係車上,H先開口「估唔到你會主動約我喎~ 我今晚Book咗Island Shangri-la嘅Steak House,希望我哋個first dating有啲quality。」
「多謝你先。」我選擇有禮貌咁回應佢。「不過可唔可以先車我去機場?」
 
「機場?你要去接機?」呢個提議無可否認係令H好錯愕。「OK,咁我call間餐廳將個booking壓後先。」
 
H開始用佢嘅藍牙去處理佢要處理嘅事。
而我,就一路靜靜咁望住天。
 
「你真係好鐘意個天喎。」H再次同我講嘢「Ocean講得真係冇錯。」
「你識Ocean個陣,係咪佢啱啱打算嚟香港嗰時?」我淡淡咁問。


「嗯。佢知我同ex都係香港人,就留我哋三日,要我哋教佢香港嘅事。後尾佢重拜託我幫佢搵一個叫路比嘅人,佢話當時你唔肯覆佢email,而你寫低俾佢嘅緊急聯絡人,就只有呢個路比。」
「唔怪得當年佢咁快搵到我,原來係你幫佢手。」我覺得好感慨。呢件事…都差唔多係兩年前嘅事。
「後尾我只係知佢搵到你,再之後係點,我就唔係太清楚。只係知你再返嚟香港,同我公司有星探見過你,俾過你相我睇。」
 
「關於廣告嘅事,sorry,我真係唔想拍。」我坦誠咁同H講。
「我都講咗,我唔會俾我女朋友拋頭露面。所以你應承得出嚟同我約會,我就已經抽起咗你張相。」H其實都係一個快人快語嘅人,如果係朋友,佢會係唔錯嘅人選。
 
講下講下,車已經到咗機場。