星期三,又係要開舖嘅日子。
 
一早啫喱就送咗今日嘅貨嚟,重有Knot麵包。
今日個包有少少唔同,入面有一粒一粒紅紅哋嘅…車厘子乾?!
「知你鍾意食車厘子,咪加入去俾你囉!」啫喱傻笑住咁講「唔好成日齋包咁悶呀嘛。」
「多謝你!」
 
啫喱飲埋佢杯凍咖啡嘅最後一啖,正打算返過餅店:「係喎,街尾間舖好似裝修完,星期六開喎。」
「係咩?」我一邊整理好啲蛋糕,一邊講「開咩呀?」
 


「叮叮噹噹~」大門嘅小撞鐘,開始佢一日嘅工作。
「Welcome to Knot!」
抬頭一望,係一對les couple,個b唔係好man嗰type,但從佢對身邊個g嘅照顧,你會知道呢對couple有幾著緊對方。
 
佢哋選擇咗坐係8號枱,拍牆邊嘅一張二人枱。
「早晨!請問想要啲咩?」因為一早就見到一對恩愛couple,我心情覺得特別好。
「呀…你一定係Sky嗱!而你就係Jerry?」TB問。
「你識我哋?你係…?」啫喱第一時間行咗去我身邊,並用大半邊身隔係我同個TB之間。似乎H嘅事,令佢覺得所有叫得出我個名嘅B都唔係好人。
 
「其實我哋係街尾新開間salon嘅。佢叫師,我叫欣。係啲街坊話我哋知呢間cafe嘅。」G亦感到啫喱嘅威脅,立即解圍。


「嘻嘻…放心喎Jerry,我哋都聽聞過你哋嘅事,我有我bb,唔會威脅到你架!」師笑住咁講,似乎都係個好玩嘅人。
「叫我啫喱得喇!唔好意思,哎…係邊個講你知架?」啫喱尷尬地笑一笑。
 
「樂少!」我、師同欣三個都異口同聲咁講。
「嘻嘻~其實我哋想同Sky你book 一晚night party,等幫朋友嚟完我新舖開張之後,可以一齊玩返晚。呢個星期六晚得唔得呀?」師問。
「OK呀!」遞上menu「你睇下先要啲咩,轉頭話我知。」
「呀!」師突然叫停想回工作枱嘅我。
「我班friend會叫我做師父,而佢,就係師太喇!」