最後我決定請Scarlett聽日先正式返工。雖然只係part time,但因為暑假真係太忙,所以佢係暑假期間會同楊言一樣,暫時會轉做full time先。


咁即係話,直到8月尾,Knot Cafe會有三個全職員工、一個咖啡師、同埋一個part time做清潔嘅梅姐。
終於可以叫做鬆咗一口氣。
可以用多少少時間去諗下台灣之旅我究竟想點。


今日真係一個好奇怪嘅日子,點解會有咁多朋友「分批」咁出現係Knot嘅呢?
2:30pm,我竟然見到樂少同路比呢對活寶貝一齊出現!




「Hi Sky~」路比坐咗係吧枱對住我嘅位置,露出佢大大嘅笑容。
而樂少亦唯有跟隨路比嘅選擇,放棄咗佢嘅4枱,坐咗係路比隔離。
「路比?! 好似好耐冇見過你咁。好忙咩呢排?」面對久違咗嘅路比,我有一份講唔出嘅親切感。
「早排多case嘛,但係宜家好好多。咪放過假,過嚟見下你…哋囉。」路比把玩住杯凍茶嘅飲管,一直都冇望過我。


「我都係喺出面見到buddy,咪同佢一齊入嚟囉。亞青去咗上堂,我諗住係到等佢呀。」樂少似乎覺得我哋冷落咗佢,嘗試主動攞返個主導權。
「喂buddy,我想去剪下頭髮,超熱! 我見街尾開咗間新salon,你估間嘢得唔得呀喇?」路比摸一摸自己個頭,再向樂少投以詢問嘅目光。




「哦~ 師父間salon,我諗都ok架。我見過佢其中一個髮型師,個頭都幾型架喎。喂不如咁,我哋宜家一齊殺過去。我諗都唔駛搞好耐,我應該可以到5點去接女神!」樂少自逕地係到打緊個如意算盤。


「好喎…」路比突然轉向望住我。「Sky,今晚得唔得閒? 一齊食飯呀。」
「好呀~」我欣然咁答應。「不如我約埋靖啦。我地三個都好耐冇一齊食飯喇~」
「呀…」唔知點解,我覺得路比有少少失望咁,但呢個感覺好快又一閃即逝。「好呀! 咁你約佢呀。諗下去邊到食,我一陣剪完再返嚟搵你。」




兩個人快手快腳飲埋杯凍茶,就離開咗Knot喇。