剪個頭髮啫,點解件事會變成咁???
天呀?! 我究竟做錯咗啲咩?
 
話說同buddy行咗去師父間T.Y. Salon到,buddy就由師父親自招呼;而我,當然就梗係揀嗰個型到震嘅Willson。
我認,我係外協會員,無論揀女、定揀其他人,好多時我都係睇樣行先。
唔係話師父唔得,其實如果任我揀,我都會想揀師父。
嘩大佬~佢作為一個老闆,斷估手勢唔會衰過啲stylist啩。
咁但係我最愛嘅buddy都揀咗佢囉,我就當然揀Willson啦。
雖然我係不分偏b,但有個靚b幫我整頭,個感覺真係好high high!




就係Willson幫我研究緊點剪個頭而又不失霸氣嘅時候,佢沒頭沒腦咁講咗句:「你係咪同嗰個亞青一齊咗?」
「吓?! 你點知架? 我哋唔係咁揚架咋喎。」我忍唔住O住咀咁問佢。


「上星期五Taz搞嗰個BTF  Party,我見到你同佢拖住手一齊出現。所以我咁估啫。」Willson透過面前的鏡望住我。頂!! 我竟然有少少面紅嘅感覺添。
「呵呵呵~ 乜我哋咁羨煞旁人,可以吸引到咁多人嘅目光架?」
「哼~」Willson無講任何嘅說話,只係咀角微微咁揚咗一下當係笑咗,跟住又好cool咁繼續幫我整頭。
既然對方都唔想繼續呢個話題,我都唔好意思繼續去撩佢講嘢。




大約兩個鐘之後,我同路比都以一個新look出嚟去見班鄉親父老。
咁當然,以我一頭undercut 加鴨屎綠嘅染髮為之最型啦! 
Wow~ 唔知我女神會覺得點呢? 會唔會覺得我型到無朋友呢? 會唔會迷死咗佢啦???
嘻嘻嘻…呵呵呵~
點知,就係臨走嘅時候…
「喂樂少!」Willson叫住咗我,示意一齊出去「呼吸」下。

「咩事?」Willson用佢嘅zippo幫我點咗支煙,我吸咗啖煙之後先問。
Willson呼出一個煙圈:「只係想提你,如果你係諗住同青係玩玩下,冇問題。但如果你諗住認真…我會建議你考慮清楚、睇真啲先。」



「你…咁係咩意思?」我發現自己拎住煙嘅個隻手,開始有啲拎唔實支煙。
「冇…唔想你俾人玩啫。」Willson想轉身就走。
「喂!」我即刻拉住佢「咁即係點呀?講清楚好喎。」
「哼~」又係冷冷嘅一笑「係老蘭有條女,出名爛玩。但佢唔玩ons唔玩sp,佢專玩感情。至於佢係邊個、或者佢係咪修心養性,咁我真係唔知! 我要講嘅係咁多。」講完,Willson就返咗入T.Y.。

剪個頭髮啫,點解件事會變成咁架???

我個女神,係PLAYER中嘅PLAYER???
天呀?! 我究竟做錯咗啲咩?​