呢餐飯嘅結局,就係大家食完重係人哋間舖入面吹多個幾鐘水,等靖嘅酒氣過咗先走得。
 
「……Sky!」突然沈默咗嘅路比突然叫我,再小心翼翼咁探問:「下星期四…你打算點?!」
輪到靖大惑不解:「下星期四?24號?咩事呀?」
「…」我低頭沈默咗一陣「個日…咪照過囉,可以點過?!」拎起枱上路比的杯,把餘下大半杯啤酒一飲而盡。
「喂!」靖都嚟唔切阻止,我已經將空空如也嘅杯放咗係枱面。「搞咩呀?明知自己唔飲得,就咪飲啦!路比!咩事呀?」
「嘎!我…我…sorry 囉!」路比立刻扶住搖晃緊嘅我,並阻止我向侍應再叫啤酒。
 
「唔想問都要問!究竟Sky你咩事啫?有咩咁困擾住你,走唔到出嚟?」靖終於忍唔住問。
 


可能頭先飲得太快,開始有種飄飄然嘅感覺。
「嗯~我…唔想講!」我雙手托住頭,把臉埋在手心「路比…你幫我講啦!」
「吓?!我講?真係?」
「講啦~」我轉望向靖「你呀…你要保守秘密,唔可以同人講架!」說罷,我就伏在枱上,醉眼望著兩位知心老友。
 
「咁…由邊到講起呢?」路比摸住自己後尾枕嘅動作,真係一直都冇變。
「嗯…咁你都知兩年幾三年前,Sky去咗台灣,去咗間民宿到做嘢兼學師架啦。」
「知!嗰間民宿叫OC,宜家Knot就係由嗰間民宿嘅概念而嚟嘛!」靖將佢知道嘅事都全盤托出。
靖繼續講佢所知嘅:「個傻妹留咗大半年到,就返咗嚟香港,嗰時都已經覺佢有啲失魂落魄,又奇奇怪怪咁唔知搞咩鬼。但係一個月都唔夠,佢又飛返台灣,後尾你都過咗去成個月,嗰時問極你都唔肯講!我記得Sky係舊年1月2號返香港,我重去接機。之後佢自閉咗半年,成日香港台灣兩邊飛。後尾…機緣巧合下我買咗海邊間舖位,就提議Sky完成佢夢想,租咗俾佢開cafe囉!」
 


無錯!靖其實係一個小富婆,亦都係我嘅包租婆!
Silence同Knot嘅舖位,同埋好似重有一、兩個單位,都係佢投資有道而賺返嚟架!