瞓咗一個上晝,感覺已經好咗好多。
韓國啤酒,真係唔可以睇少。
 
再次落到舖面,正值係午市時間。
我即刻著上圍裙,走入工作枱,走到咖啡機前面開始沖調咖啡;Kwan仔亦都同我互相補位,改為主力幫忙處理食物部分。
 
我忙裏偷閒望一望舖面。12點已經有七、八成入座率,楊言同Scarlett亦都配合得好好,睇嚟我決定請多一個人呢個決定係啱架。
 
同Kwan仔一直留係工作枱入面忙。
襯稍稍得閒,我沖咗杯香桃冰茶俾佢:「飲啖嘢啦,成日對住個焗爐你都會乾架!」


「吓?哦…唔該Sky!」Kwan仔飲咗一大啖冰茶,再長長咁呼咗口氣「呼~~舒服晒!都係Sky你沖嘢飲叻啲,完全掌握到人哋嘅口味同喜好。」
我微微一笑:「呢排都辛苦你同楊言喇!」
「唔辛苦!我真係當攞經驗架,所以如果你有事要行開行埋,我哋都ok架!」
「知你哋乖喇!反而我8月尾去台灣一個星期,你同楊言就真係可以去玩下抖下。」
 
「嗯…係呀Sky!」Kwan仔突然壓低聲音,似乎唔想俾其他人聽到我哋嘅對話「我想問,嗰個Scarlett係咩人?」
「嗯?!咪講咗係Taz係美國嘅朋友,1/4 mix,返香港搵機會,咁宜家冇嘢做,咪搵份短工打下先囉。」
「呀…哦!冇…今朝教佢做嘢嗰時,佢係咁問起啫喱同你嘅事,又對你啲繩結好有興趣咁,我先八卦問下你啫。」
「啫喱?啊…今朝啫喱送貨個時介紹咗佢哋識,可能咁佢先問啫!一陣午市過咗,我會正正式式咁brief佢一次,應該ok架喇!」
 


Kwan仔並冇再繼續個話題,因為新一輪嘅單,又再蜂擁而至!