望住條通往上層嘅樓梯,我選擇先係樓下停一停、諗一諗。
 
我好清楚,自己係鐘意Taz嘅。
我知道如果同佢一齊,我需要繼續擔當好「姐姐」嘅角色。
但經歷過以前嘅感情,我知我需要啲咩。
我唔介意照顧人多啲,但我需要長久一啲嘅關係,我需要…承諾。
 
好多人會覺得Taz係一個未定性嘅人,太過隨心、太過傻大姐。
會覺得如果要同佢長久發展,要佢肯給予承諾,會係一件天方夜譚嘅事。
 


但係,我就有一個完全相反嘅睇法。
 
話說兩年多前,我啱啱鼓勵完Sky,將我新投資嘅舖位連樓上起居室,租咗俾佢開cafe加民宿。
由於我係做生意上有豐富經驗,所以都順理成章,成為Sky係做生意上的顧問。
 
有一日,我應Sky嘅邀請,過咗嚟同佢一齊睇裝修。
就剛剛睇到一半嘅時候,竟然有班古惑仔嚟收佗地。
咁當然,我哋係唔會俾啦。
就係佢哋以為可以蝦我哋兩個女仔嘅時候,有個頭髮短短、高高瘦瘦、一身街坊裝嘅女仔走咗過嚟。
佢聲大大咁喝住古惑仔:「作死你班仆街呀?講咗幾多次呢到附近都係我睇!再係度搞搞震,信唔信我聽朝係早茶嘅時候,同你哋大佬打小報告呀嗱!」


 
成班古惑仔無個敢出聲,個個好似鵪鶉咁:「對唔住…對唔住Taz姐!宜家即走!」
呢個叫Taz嘅女仔係跟住班古惑仔尾走之前,轉身同我哋講:「放心啦!冇事架啦,無人會再夠膽搞你哋。」
 
基於好奇,我都偷偷地跟住佢哋尾,就係附近嘅轉角,俾我見到呢一幕:「喂,光仔!你同我企係到,其他人唔關事嘅,同我走!」嗰個Taz又叫停咗其中一個古惑仔。
成堆人入面,其中一個睇落最細個嘅金毛仔企咗出嚟:「Taz姐,又點呀?」
「光仔,我知如果叫你唔行古惑,你實覺得我好老土。我應承得你亞媽睇住你,我就實會遵守個諾言。總之你肯嘅話,我係酒樓死都死個位俾你做。你自己諗清楚啦!」講完,Taz係褲袋入面拎咗啲錢出嚟「袋住佢,唔好俾你啲兄弟知。萬一阿公要交數,呢度都可以hea一陣。咪亂用,Taz姐冇乜錢剩架啦!」
 
睇到呢度,我突然覺得眼前呢個女仔好特別。
後嚟,我真係見到呢個光仔,去咗Taz 老豆間酒樓到做。


就係佢個種正義感、重承諾、重感情…一直吸引住我。
後尾識佢耐咗,我對佢嘅感情,更加係日漸加深。
 
但係…
Taz 心入面係有我架,呢個我係好肯定!
只係以前一直都唔明白,究竟我同佢之間,重差啲咩嘢?
重有邊方面做得未夠好,令佢對我未有信心?
今日先發現,原來一切都係因為柔。
 
問題已經唔係我肯唔肯再去付出。
原來佢一直都係一個人去承受同面對。
佢究竟係用咩心情嚟接觸我?
係咪其實,一路都痛緊,一路都受緊傷?
我覺得,我好似有份傷害緊佢咁。