Chapter 27生財之策(中)
 

回到4D班的班房,我瞧見盛衣貝坐在我的坐位與宛琳珊聊天,宛琳珊抱怨道:「真係激死我喇!介紹陸泳祥同姚智風嚟做兼職,佢地居然喺返緊工嘅時候打交,一啲面都唔畀我,依家其他同事都唔妥我,睇嚟份工我都做唔長喇!」
 
盛衣貝試探道:「咁其實兩個,妳會揀邊個嘖?」
 
宛琳珊怒道:「兩個我都唔揀,佢地正一害人精嚟架,我介紹佢地返依份工,居然咁樣害我,唔好再講佢地喇!依家我只係想搵錢咋!」
 
盛衣貝道:「好!唔講佢地,講妳諗住搵咩工喔?」
 




宛琳珊嘆了一口氣,道:「唉!唔做上校雞,我真係諗唔到咩兼職啱我。」
 
這時盛衣貝見我回來,便把坐位還給我,我微笑道:「唔該曬!阿嫂。」
 
盛衣貝聞言兩頰升起了一片紅暈。
 
宛琳珊與盛衣貝剛才的對話,我全都聽見了,宛琳珊就是我生財之策最適合的參與者,待盛衣貝走遠,我才向宛琳珊問道:「宛琳珊,乜妳唔想做依家依份工咩?」
 
宛琳珊聞言,雙目放光,問道:「做咩啊?你有工介紹?」
 




我點頭,宛琳珊立時現出一副饒有興趣的樣子,追問道:「做咩架?邊度返架?一日返幾多個鍾?幾錢一個鐘啊?」
 
我道:「林士德隔離嗰間麥噹噹請人,十八蚊個鐘。」
 
宛琳珊聞言像被一盤冷水淋下來一樣,剛才那一腔熱誠頓時冷卻下來,道:「唓!原來你玩我,得十八蚊個鐘,咁不如我做返上校雞。」
 
「每個鐘,我補貼妳三蚊,即係廿一蚊個鐘,點睇?」
 
宛琳珊怔仲了半晌,才道:「你會咁好死無端端補貼我?一定有野要我幫你手。」
 




「妳真係聰明,正所謂等價交換,我補貼妳,自然希望妳幫手。」
 
「你要我入去麥噹噹做有咩目的?」
 
「我希望妳入到去,可以幫我攞啲史露比出嚟。」
 
宛琳珊搖頭道:「唔得,咁樣即係偷野,犯法架!」
 
 
「咁唔得咩?如果妳以員工嘅身份就咁買得唔得啊?」
 
宛琳珊思索了一會,搖頭道:「咁都未必得?其實你想點?可唔可以講畀我聽啊?」
 
於是我粗略向宛琳珊透露我那未完整的生財之策,就是我希望尋找到在老麥的內應,以低廉的價格收購了大量的史露比公仔,然後在熱潮最盛的時候,把這些史露比公仔高價售出,整個生財之策,只是基於很簡單的經濟原則低買高賣,但如何實際地有效操作,達至這個目標,則要詳加考慮。
 




宛琳珊皺著眉頭,道:「你又知史露比公仔一定可以炒得起?」
 
我很難向宛琳珊說明我是來自十八年後的未來人,我道:「依啲野無話百分百,正所謂『謀事在人,成事在天』。」
 
宛琳珊嗯了一聲,道:「但係廿一蚊個鐘咁少,起碼三十蚊啦!」
 
「三十?太高喇!廿二啦!」
 
「廿八。」
 
「廿三。」
 
「底線廿六。」
 
「咁啦!廿三蚊個鐘,事成最多我分返一成純利畀妳。」




 
「三成!」
 
「最多兩成,妳唔應承,最多我搵其他人合作。」
 
「好!廿三蚊個鐘,加成個項目嘅兩成利潤,我地合作愉快。」
 
我苦笑道:「妳真係無死錯人,妳開啲條件都幾辣喎!」
 
宛琳珊展現出迷人的笑靨,道:「你放心,我開出依啲條件,一定全面配合,依個計劃我有份分享成果,我自然全力以赴做到最好,不如商量下點樣去做,先可以得到最大嘅成果仲好啦!」
 
午飯的兩堂物理堂,我與宛琳珊各自拿出了一張白紙來寫出自己的想法,但我瞧到宛琳珊在她的張紙寫出雜亂無章的點子,便不禁搖頭,輕聲道:「都係我做返主導啦。」
 
要做一份計劃書,先要定出目標,我的目的是透過炒賣史露比來獲利。其次是方針,我的方針是低買高賣,將低買高賣,分成兩個步驟:
 




低買,一個最平的超值套餐為十八港元,再加十元換購一個史露比公仔,即是成本價最少亦要廿八元,如果我們付出了廿八元,要賣多於廿八元才可以獲利,這是傻子亦知道的事。
 
我在紙上寫道:「妳有辦法可以不買餐,只付十元換購到一隻史露比嗎?」
 
宛琳珊在紙上寫道:「應該難啲,但可以你買一個餐嗰陣,借啲意塞多一兩隻落去,仲有以我所知員工買麥噹噹禮卷,可以有員工優惠九折。」
 
我在紙上寫道:「咁樣不失為一個節省成本嘅方法,但係要搵人排隊,我又要返工,如果搵人排隊又要畀錢,咁樣又會增加成本。」
 
宛琳珊在紙上寫道:「一係我今晚去咗林士德隔離間麥噹噹見咗工先。」
 
我點頭,她在紙上寫道:「無論最後點,你都要補番五蚊一個鐘畀我架!」
 
我苦笑,現在有點後悔找來宛琳珊當合作夥伴,現在連實行計劃的第一步便遭遇困難,但她只著緊自己的利益。
 
這天放學,我趁著離上班還有一點時間,便到林士德附近視察一下,其實我亦不期望可以在這裡找到些什麼?




 
我在林士德附近的葵芳村蹓躂了一會,發現原來這一區亦頗多尼泊爾、孟加拉、印尼、非律賓等少數族裔,讓我想起了在2016年時,那些南亞人在排演唱會門票當黃牛黨,1998年的排隊黨並不盛行,如果我要求他們當排隊黨,他們應該不會收取我很高的報酬吧?
 
正當我打算走向那班坐在公園長椅的少數族裔婦孺之時,我瞧見一群小學生向我走來,為首的兩人是阿興和顧晉榮,兩人瞧見我,均一臉歡喜迎過來。
 
阿興叫道:「哥,點解你會喺到嘅?你今日唔係要返工咩?」
 
「係啊!我就快要走喇!」
 
自從我成功用計偷襲拳佬嫁禍給牛辸明,讓牙佬等人與8座數字幫打過你死我活後,顧晉榮便視我為偶像,他一臉尊敬地喊了我一聲志哥。
 
此時,我瞧見本來與阿興顧晉榮一夥的小學生,其中兩三名向著坐在長椅的少數族裔婦孺走去,這讓我察覺到這些小學生的樣貌異於本地港人。
 
我問道:「乜依家你地間學校咁多南亞人嘅?佢地有無恰你地啊?」
 
阿興道:「無啊!佢地好聽榮仔嘅說話,榮仔阿婆係印尼人,識講識聽佢地啲家鄉話架!」
 
我聞言大喜,立時道:「咁啱喇!榮仔我有野要你幫手。」
 
顧晉榮用手指著自己,訝異道:「嚇!我…」
 
「好簡單咋!我想榮仔幫我說服嗰啲少數族裔幫我排隊去老麥換史露比,你話可唔可以說服到佢地收平啲啦?」
 
顧晉榮道:「志哥,你淨係要啲個公仔,咁啲食物點啊!」
 
「食唔曬!就唔要啦!」
 
「咁大嘥!不如咁啦!你話啲食物畀佢地做報酬,要佢地幫你排隊。」
 
我喜道:「可以咩?」
 
「佢地平時都係坐係公園到無野做架啦!」
 
「咁就太好喇!如果靜間宛琳珊見成工,咁個計劃最快可以聽日進行,到時我畀啲老麥禮卷你,你就幫我做接頭人,畀啲禮卷班南亞人,咁佢地換到啲公仔,你幫我交畀阿興喔!好似好麻煩你,我應該要畀返啲報酬你嘅。」
 
顧晉榮道:「志哥,我唔駛你畀報酬我,我會用自己方法嚟得到我嘅報酬。」
 
我訝道:「嚇!你想點啊?」
 
他道:「我每畀一張禮卷佢地,就收番佢地兩蚊,換言之,佢地除咗要幫你排隊,仲要畀兩蚊我,先可以換到麥噹噹嘅食物。」
 
我聞言嚇了一跳,心想:「眼前這小孩,思想好像要比其他小孩成熟,居然想到自己當中介人的角色來謀利,真不簡單,假以時日,應該可以有一番成就,可能就是他家中複雜的背景,迫使他急速成長。」
 
我點頭道:「好,只要你做到我要求你做嘅事,我唔理你點去賺取你嘅利益。」
 
顧晉榮笑道: 「志哥,你放心啦!我一定唔會令你失望。」
 
我交代了一些細節,便趕著去物流公司上班。
 
這個星期,聰哥他們調回早更,我與另一批夜更同事搭擋,這批夜更同事有之前教導我使用公司system的RAY、較為資深的BEN,以及被其他同事視為麻煩友的米仔。
 
BEN分配工作的時候,對我道:「victor,依度你盡做啦!收工嗰陣,啲手尾畀番米仔跟啦!」
 
我聞言已有預感有麻煩,BEN負責美洲水、RAY則亞洲及澳洲、而米仔則負責歐洲。
 
果然在七時正,BEN、RAY和我三人正在忙得不可開交之際,米仔才施施然回來,我坐在他的對面,瞧見他悻悻然檢閱BEN分配給他的工作。
 
他雖然對BEN分配給他的工作感到不滿,但因BEN年資比他深,他不敢向他發作,只好拿我開刀,他先毫不客氣檢閱我桌上的文件,我保持禮貌道:「米哥,你想搵咩?不如我幫你喔!」
 
米仔把兩個LOK放在我桌上,道:「你搞掂埋佢啦!」
 
其實剛才BEN分工給我時,叫我在放工時把手尾交給米仔,我已決定為免麻煩要在放工前把工作完成,本來時間已經很倉卒,現在情況更加惡劣,我道:「依啲工作係BEN哥分配,一係你問下BEN哥先。」
 
米仔驀然怒道:「依家你搵阿BEN嚟壓我啊?」
 
米仔的說話驚動了BEN,BEN走過來了解後,道:「victor,你幫幫手,做埋佢喔!」
 
如果是聰哥的話,相信定必會替我主持公道,但遇上性格懦弱、「老好人」的BEN,柿子他當然挑軟的來捏。
 
米仔見狀現出得意的笑容,雖然我是心生不忿,但我知道除非我是決定不幹,否則現在發難與他對罵,只會於事無補,為了有本錢去實行炒賣史露比的計劃,這口氣我只能吞下去。
 
已經十點了,還有米仔給我的兩個LOK未完成,我對米仔說:「米哥,BEN哥話,我收工啲手尾要麻煩你跟返。」
 
米仔翻了翻兩個LOK,冷哼一聲道:「嘩!兩個LOK你鬱都無鬱就畀返我,唔係啊?」
 
我有點光火,道:「嚇!我做到無停手,你地食飯嗰陣,我都係一邊咬住個包一邊打單!」
 
BEN聞言過來打完場,道:「victor,依排旺季,我地都好多野做,你拍硬擋留多陣幫幫手喔! 」
 
很明顯BEN繼續柿子挑軟來捏,使用了一招「道德綁架」,我雖然看穿他的把戲,但除非我是選擇不幹,否則我亦只能夠妥協,我道:「哦!咁我幫多陣喔!」
 
這時,我才有空查檢米仔給予我的兩個LOK是什麼東西,那裡的都是異常麻煩shipment:sub house、電池、DG貨、over pack、雪貨、貴貨、手打master waybill等,這裡我亦不去每樣詳述是什麼東西?總之就是一位資深的forwarder亦很容易出錯,幸好我在這一行曾打滾多年,如果我真的是一位剛入行不久的小伙子,只能拿著這堆文件發呆。
 
由於這些shipment真的異常麻煩,到了十二點時,我才完成了七成,RAY走過來,道:「victor,你掂唔掂?」
 
RAY翻閱我埋好的LOK,道:「嘩!依次真係考牌戰!BEN哥,你過嚟睇。」
 
BEN聞言過來翻閱,讚道:「victor,叻仔喎!又險貨、又貴貨,依度要我埋,我諗我做咗十幾年都有機會埋錯。」
 
BEN這番話,很明顯是示好,他先前不反對米仔把原本屬於他自己的工作交給我,現在說一兩句好聽的話來和稀泥。
 
米仔道:「嗱!依家你地知我平時嘅工作係幾咁艱辛啦!」
 
RAY輕聲告訴我:「條友成日畀CS投訴打錯單架。」
 
凌晨一點正,我總算把所有文件埋好,但還有一堆手尾要善後。
 
RAY走過來,道:「victor,係咪搞掂曬喇?」
 
我苦笑道:「仲差pre-alert同send confirm email出去。」
 
「嚇!依家成點鐘喇!我幫你搞啦! 」
 
「咁點好意思啊!你都有野要做!」
 
「欸!萬一你頂唔順,唔做,到時我地隨時做到早更返嚟!」
 
「咁真係唔該曬!」我向RAY交代接手的工作。
 
RAY輕聲道:「你走嗰陣唔好打卡,我幫你打多一兩個鐘。」
 
「嚇!多謝,下次請你食飯。」
 
我離開吾萬達物流有限公司已經是一點二十分,我由打磚坪街經和宜合道,走到大隴街,在大LIFT附近,我瞧見布正麗、譚慧詩、許詠欣與她們的童黨朋友在街上一邊抽菸一邊蹓躂,布正麗瞧見我,便走過來,道:「餵!你叫成…成皇志喔嘛!你唔係乖學生嚟咩?咁夜仲係條街到做咩啊?唔通你又…」
 
我沒有理會布正麗的暗示,她這暗示很明顯就是說看到我從拳佬受襲的小巷走出來的那件事,我皺著眉別過頭,道:「我啱啱做完兼職收工?」
 
布正麗瞧見我現出厭惡的表情,道:「咩啊!你唔鍾意聞到煙味咩?」
 
「食煙會致癌、會死人架!妳都係唔好食咁多喇!」
 
布正麗反駁道:「唓!食豆腐都會有人哽食啦!係生係死,個天晨早整定啦!」
 
「其實妳有無為自己打算?我睇妳都係唔鍾意讀書,不如諗下有咩工作適合妳自己,妳依家叫後生,有春青畀妳揮霍,但係過多幾年,妳可能會後悔妳浪費咗依幾年嘅時間?」
 
布正麗哈哈一笑道:「唔怕同你講喔!有個高人話我命格貴不可言,將來會成為皇后啊!」
 
我道:「若果嗰個高人睇錯,又或者佢只係呃妳呢?」
 
「超!命理依家野你識條春咩?」
 
「就算妳本身有咁嘅命格,都要妳後天去努力,唔係可以HEA住等運到,妳諗深一層,妳諗樣真係做到皇后?」
 
布正麗聞言挺起了她那對G奶,自豪道:「咩啊?乜你無聽過吳林紫娣第一校花係邊個咩?」
 
我頷首道:「我知妳係吳林紫娣最索嗰個,但係做皇后唔係得個殼,係要母儀天下,為國民豎立榜樣,到妳真係做咗皇后嘅時候,每個人都會睇住妳有無犯錯,妳一舉手一投足都會成為焦點,全個國家嘅人民都會監察妳嘅言行舉止。」
 
布正麗白了我一眼道:「你依啲叔父,講野無句好聽,淨係識潑冷水,都費Q事同你講,早抖!」
 
「餵!其實妳係咪因為受到啲咩打擊,所以變成咁?」
 
原本轉身離開的布正麗,聞言為之卻步,反問道:「哼!我會受到啲咩打擊啊?」
 
「妳變成咁係咪因為…湯—仲—謀?」
 
布正麗聞得湯仲謀三字全身發顫,別過頭來,問道;「你講咩啊?」
 
布正麗這樣的反應,加強了我的想法,湯仲謀影響了她,這個吳林紫娣的傳奇人物流傳了很多不知真偽的傳聞:讓多名女生懷孕;誘騙了很多女生賣淫。
 
我在中一的時候,曾與湯仲謀有數面之緣,他的確是長得非常俊朗,非常有女人緣,經常有美女相伴。我記憶所及,曾碰過他與布正麗在一起。
 
但回到1998後,我未曾碰見湯仲謀,並不知他的近況如何,是否仍在8座的數字幫裡混?
 
我語重心長道:「我聽過一啲關於湯仲謀嘅傳聞,佢唔係咩好人,妳都係唔好痴埋佢度。」
 
布正麗怒道:「你係我邊個?我嘅事關你咩事?需要你理咩?」
 
布正麗反應之大出乎我意料之外,難道那個湯仲謀在她心目中真的那麼重要?
 
此時,那個叫南乳的臭飛走過來,向我指罵道:「餵!你喺度仲乜撚野啊?」
 
我與南乳對望了一眼,南乳向布正麗問道: 「布甸,發生咩事啊?係咪條友恰妳?駛唔駛揼柒佢?」
 
布正麗因為剛才的激動反應而急喘了幾口氣,她喘氣的動作牽動了她那對驕人的豪乳不受控地上下晃動,但這風頭火勢下,我當然不敢明目張膽去瞪著看。
 
布正麗向南乳搖了搖手,道:「無事,我地走喇!」
 
回家後,我連澡也沒洗便上床睡覺,想起剛才自己未免太多管閒事,布正麗和誰一起與我何干,我為什麼要去操心呢?瞧見人家臉蛋長得漂亮便想去關心人,最後還不是熱臉貼在冷屁股上,成皇志,人家是你那位?人家愛粘著誰,便粘著誰。
 
難道我喜歡了她?她的確很動人,但想起了她複雜的背景,便不禁卻步,我和她存在著很多分歧,我們是屬於兩個世界的人。
 
哼!成皇志,你是什麼新鮮蘿白皮?人家好歹亦是吳林紫娣的首席校花,追求者多的是,你有什麼地方,讓人家看得上眼?
 
其實如果換轉了是呂靜宜、柳豔、楊鳳瑤、宛琳珊等,我相信我亦會說出同樣的一番話,這只是對認識的人提出忠告,並沒有任何特殊情感牽涉在內。
 
一定是這樣的,現在最重要的是進行炒賣史露比的事情。
 
夜已深,多想無益,還是早點睡,明天還有很多俗務要處理。





以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl
已有 0 人追稿