James將那把曾把我割傷的小刃擱在桌面,刀鋒還沾了血漬,讓我想起了那驚心動魄的被追殺過程。

      「好對唔住,」James低下頭,五官仍然無神,「我地係你去咗廁所之後,就入咗餐廳,然後遇到章千琳。因為事情實在太出乎意料同埋餐廳道大門隔音太好,我地一直係餐廳裏面聽唔到外面既聲。」

      「我地冇心架……Sorry啊……」韻初的神色透露著真摯的難過,讓我心腸軟了下來。

      「算喇算喇……」我沒好氣的道,並將我到廁所遇見一名女子,以及被白髮女孩追殺的經過娓娓道來。總共花費了大概兩分鐘,其中一分鐘以上都是描述那白髮女孩的怪異外表。

      「個女仔好恐怖啊……嗚嗚……」韻初掩著嘴巴驚道,而James則坐近了我,將手擱在鼻子下:「你話個白髮女仔聲稱,自己係被離棄既天使?」





      「係呀,」我提心吊膽的環視漆黑的周遭,「都唔知佢究竟係邊個……係啦,你地呢邊發生咩事?啊千琳佢……」

      對,事情實在太離譜了,同伴進入餐廳合理,在餐廳找到食物合理,就算說他們遇上怪物也合理,但是……怎麼會是千琳?

      「我地入黎餐廳打算搵食物清水,就係餐廳角落遇到千琳。」韻初遞給我一支清水,「我地頭先係廚房隔離個小倉庫搵到唔少乾糧,我地已經食咗啦,你都快D食D補充體力啦。」

      我打開了那樽500毫升的水,毫不猶疑便往嘴裏灌,恍然醒覺自己許久沒進食喝水了。我注視著桌子上的一些麵包、餅乾,小穎會意的道:「我地正係搵到呢D咋,唔好揀飲擇食啦。」

    傻了,有食物進口已經是莫大恩賜了。可我還是大惑不解:「但係,啊千琳你係點解會黎咗呢度架……應該係冇可能架……」





      對,根據先前的觀察,是乘搭137號尾班電車的人,才會被送到這個恐怖異世界的。記憶中我只是和文杰、James、韻初乘車而已,千琳又是怎樣……

      「我……我聽過你地經歷既事情啦,但其實我一醒就係黑暗隧道裏面。」千琳害羞的低下頭,扯著身上的粉紅色校服──她的性格從來都是如此。

      只根據外表而言,章千琳絕對是個Mk妹。深啡色的頭髮,平陰劉海配以馬尾,多年來都貫徹始終。她有明亮的雙眸,配以白裏透紅的V字臉。雙手戴滿了各式各樣潮流特區買來的手飾,刻意穿著短短的灰裙子,而且看上去很有性格似的……

      可是,只要跟她相處五分鐘,便會瞭解她其實是個缺乏自信、卻開朗可愛的純情少女。她儘管為人害羞卻待人真誠,而且很有愛心,經常跟韻初一同在學校後院餵飼流浪貓。她的成績也名列前茅,簡單的性格也逗不少人喜愛。但是,我甚少和她交流,或許因為我倆唯一的共同話題,就只有五月天。

      總括而言,她也算是個不錯的女同學吧。





      「我其實唔係好記得自己係點樣黎到隧道,唔記得搭電車既野……我好唔容易走到出口……之後遇到個痴線男人……好唔容易逃走到醫院,因為見餐廳冇人,所以就一直躲藏,直到遇到你地。所以,我對出面既情況唔係太清楚。」千琳咬了一口手上的白麵包,含羞一笑。

      「其實送我地黎呢個世界既,唔只係一架137號電車。」James脫下眼鏡,「應該係好多架,所以真相應該係,我地同千琳巧合地都搭咗137號電車,只係班次唔同。呢個世界既人,應該係係唔同時間、日子被送黎,咁理解既話,就解釋到點解有D人被完全『侵蝕』咗,而我地仲維持到理智。」

      真的嗎……千琳也是乘搭137號尾班車來的嗎……

      「仲有一樣野好奇怪,」我忽然記起一樣很重要的事情,「個怪女仔殺咗廁所個女仔之後……講咗句『320 Left』……插咗我一刀之後,就話『319 Left』,然後就走咗……」

      「好心寒啊。」小穎如芒刺背的環視四周,滿臉可憐兮兮的。

      「哇……咁講法,即係佢計緊生還人數?本來有321個人,殺咗個女仔就剩低320,殺埋電車男就……」文杰倒抽一口氣。

      「大吉利事,我鬼有死啊?」我怒瞪他一眼,可小穎呢喃著:「可能佢有信心果一刀可以插死你,所以就當你死咗……」

      我按著胸口,心有餘悸的喘息著。





      「唔知,」James總結道,「唔能夠抹煞一切可能。不過白髮怪女既言行舉止,你地唔覺得好奇怪咩?」

      「嗯?」我放棄了追溯那血腥的過去,靜待James的解說。

      「根據天翔所講,佢係隧道已經跟住天翔一次。之後佢可以係廢棄醫院裏面搵到一把電鋸,而且仲可以揮舞自如,唔好講弱質女仔,連壯健既大漢都未必做到。佢甚至講得出『Turn Scarlet』呢句話,呢D野,正常人又點會知道?」

      我非常肯定James只是聽我講述了一次,卻能如此清晰歸納出當中的疑點,實在是非常人能做到。當我正驚嘆之時,身旁的小琳卻不好意思的道:「同埋……佢竟然講得出天翔全名……感覺就好似,佢知道曬所有野咁。」

      對。

      「如果佢話自己係被離棄既天使……唔通佢……」韻初的臉色蒼白起來,連忙扭開了一樽水往嘴裏灌。

      「佢不但擁有異於常人既武力,而且知道太多異世界既資訊。」James盯著手上的眼鏡,「如果係咁,佢好大機會係──」





      「Creator。」我搶先說出了答案。對,怎麼從來沒有想到這點。